കേരളത്തിലെ മാലിന്യ പ്രശ്‍നത്തെക്കുറിച്ച് മോഹൻലാല്‍ 6 വര്‍ഷം മുമ്പ് മുഖ്യമന്ത്രിക്ക് എഴുതിയ കത്ത് വീണ്ടും ചര്‍ച്ചയാകുന്നു
ബ്രഹ്മപുരം തീപിടിത്തത്തില്‍ സിനിമാതാരങ്ങള്‍ പ്രതികരണവുമായി എത്തവെയാണ് വര്‍ഷങ്ങള്‍ക്ക് മുന്‍പുള്ള മോഹന്‍ലാലിന്റെ കത്ത് വീണ്ടും ചര്‍ച്ചയാകുന്നത്
- News18 Malayalam
- Last Updated :
മാലിന്യ സംസ്‌കരണവുമായി ബന്ധപ്പെട്ട് ആറ് വര്‍ഷം മുന്‍പ് മുഖ്യമന്ത്രി പിണറായി വിജയന് നടൻ മോഹന്‍ലാല്‍ എഴുതിയ കത്ത് വീണ്ടും ചര്‍ച്ചയാകുന്നു. കത്തിന്റെ സ്‌ക്രീന്‍ഷോട്ടുകളും മോഹന്‍ലാല്‍ യൂട്യൂബില്‍ വര്‍ഷങ്ങള്‍ക്ക് മുന്‍പ് പങ്കുവെച്ച വീഡിയോയും ശ്രദ്ധ നേടുകയാണ്. കേരളത്തിന്റെ മുഖ്യമന്ത്രി വായിച്ചറിയാൻ എന്ന തലക്കെട്ടോടെ തുറന്ന കത്തെഴുതുകയായിരുന്നു മോഹൻലാല്‍ ബ്ലോഗില്‍.
ഇത് മോഹൻലാല്‍ എന്ന നടൻ പിണറായി വിജയൻ എന്ന മുഖ്യമന്ത്രിക്ക് എഴുതുന്ന ഒരു സൗഹൃദക്കത്തല്ല. കേരളത്തില്‍ ജീവിക്കുന്ന മോഹൻലാല്‍ എന്ന മനുഷ്യൻ കേരളത്തിന്റെ മുഖ്യമന്ത്രിക്ക് നല്‍കുന്ന നിവേദനമാണ് എന്നായിരുന്നു ബ്ലോഗിന്റെ തുടക്കം. കേരളം നേരിടുന്ന ചില വിഷയങ്ങള്‍ അക്കമിട്ട് നിരത്തുകയായിരുന്നു മോഹൻലാല്‍. അതില്‍ ആദ്യത്തെ വിഷയമായി മോഹൻലാല്‍ ചൂണ്ടിക്കാട്ടിയത് മാലിന്യത്തെ കുറിച്ചായിരുന്നു. ‘മാലിന്യം എന്ന ഭീകരൻ’ എന്ന തലക്കെട്ടോടെയായിരുന്നു കുറിപ്പ് എഴുതിയത്.
മാലിന്യം എന്ന ഭീകരൻ
കേരളത്തെ പേടിപ്പിക്കുന്ന ഭീകരൻ ആരാണ് എന്ന് ചോദിച്ചാല്‍ മാലിന്യം എന്ന് മാത്രമേ ഞാൻ ഉത്തരം പറയൂ. നമ്മുടെ ഒന്നിലധികം പ്രശ്‍നങ്ങള്‍ക്ക് കാരണം എല്ലായിടത്തും കുമിഞ്ഞുകൂടുന്ന മാലിന്യമാണ്. പകര്‍ച്ച വ്യാധികള്‍ മുതല്‍ അലഞ്ഞ് നടക്കുന്ന നായ്ക്കൾ വരെ മാലിന്യക്കൂമ്പാരത്തിന് ചുറ്റും നിന്ന് ഉണ്ടാകുന്നതാണ്. ഞാനടക്കമുള്ള എത്രയോ കലാകാരൻമാര്‍ ഇതിനെതിരെ ബോധവത്കരണ പരസ്യങ്ങള്‍ ചെയ്തിട്ടുണ്ട്. എന്നിട്ടും ഒരു കാര്യവുമില്ല. റോഡിനിരുവശത്തെയും മാലിന്യക്കൂമ്പാരം കേരളമെങ്ങും കൂടുകയാണ്.
സ്വന്തം വീട്ടിലെ മാലിന്യം പൊതുവഴിയില്‍ ഉപേക്ഷിക്കുന്ന മാന്യൻമാര്‍ നമ്മുടെ നാട്ടില്‍ വര്‍ദ്ധിക്കുകയാണ്. ഞങ്ങള്‍ ഇതെവിടെയാണ് കൊണ്ടുപോയി കളയുക എന്ന കാതലായ ചോദ്യവും നഗരവാസികള്‍ ചോദിക്കുന്നു. ഈ രണ്ടു കാര്യങ്ങളെയും അഭിമുഖീകരിക്കേണ്ടതുണ്ട്. മാലിന്യം നിക്ഷേപിക്കാൻ കൃത്യമായ സ്ഥലങ്ങളും സൗകര്യങ്ങളുമുണ്ടാക്കുകയും എന്നിട്ടും പൊതുസ്ഥലത്ത് മാലിന്യം ഉപേക്ഷിക്കുന്നവരെ കര്‍ശനമായി ശിക്ഷിക്കുകയും വേണം. ഈ യജ്ഞം ഒരു കഠിനവ്രതമായി അങ്ങ് ഏറ്റെടുക്കുമെന്ന് ഞാൻ പ്രതീക്ഷിക്കുന്നു.
അല്ലെങ്കില്‍ അടുത്ത അഞ്ചു വര്‍ഷം കഴിഞ്ഞുള്ള കേരളത്തെക്കുറിച്ച് ഓര്‍ക്കാന്‍ പോലും എനിക്ക് പേടിയാകുന്നു. തിരക്കിനിടയില്‍ എപ്പോഴെങ്കിലും ഒന്ന് കണ്ണടച്ചിരിക്കുമ്പോള്‍ അങ്ങും ഒന്ന് ഓര്‍ത്ത് നോക്കൂ.. എന്നുമാണ് മോഹൻലാല്‍ ബ്ലോഗില്‍ എഴുതിയിരുന്നത്.
ബ്രഹ്മപുരം തീപിടിത്തത്തില്‍ സിനിമാതാരങ്ങള്‍ പ്രതികരണവുമായി എത്തവെയാണ് വര്‍ഷങ്ങള്‍ക്ക് മുന്‍പേ മാലിന്യപ്രശ്‌നത്തില്‍ നടപടി ആവശ്യപ്പെട്ടുകൊണ്ടുള്ള മോഹന്‍ലാലിന്റെ കത്ത് വീണ്ടും ചര്‍ച്ചയാകുന്നത്. താരത്തിന്റെ സ്വന്തം കൈപ്പടയിലുള്ള കത്താണിത്.
ഏറ്റവും വിശ്വാസ്യതയുള്ള വാർത്തകള്‍, തത്സമയ വിവരങ്ങൾ, ലോകം, ദേശീയം, ബോളിവുഡ‍്, സ്പോർട്സ്, ബിസിനസ്, ആരോഗ്യം, ലൈഫ് സ്റ്റൈൽ വാർത്തകൾ ന്യൂസ് 18 മലയാളം വെബ്സൈറ്റിൽ വായിക്കൂ.
