കാമുകൻ സമ്മാനിച്ച ബാഗുകളെല്ലാം വ്യാജം; അബദ്ധം പറ്റി ചൈനീസ് യുവതി

കണ്ണടച്ച് വിശ്വസിച്ച കാമുകൻ പറ്റിച്ചതിനെ തുടർന്ന് വികാരാധീനയായി സാമൂഹ്യ മാധ്യമത്തിലൂടെ സങ്കടം പങ്കുവച്ചിരിക്കുകയാണ് ഒരു ചൈനീസ് യുവതി. പ്രണയ സമ്മാനമായി കാമുകൻ നൽകിയ ഡിസൈനർ ബാഗുകൾ എല്ലാം വ്യാജമായിരുന്നു എന്നാണ് യുവതി പറയുന്നത്. കാമുകൻ തനിക്ക് പ്രണയസമ്മാനമായി നൽകിയിരുന്നത് ഡിസൈനർ ബാഗുകൾ ആയിരുന്നുവത്രേ. ഒടുവിൽ ബാഗുകൾ നിറഞ്ഞ് മുറിയിൽ സ്ഥലമില്ലാതായതോടെ കുറേയെണ്ണം വിൽക്കാൻ യുവതി തീരുമാനിച്ചു. അപ്പോഴാണ് തന്നെ അയാൾ കബളിപ്പിക്കുകയായിരുന്നുവെന്ന് യുവതി മനസിലാക്കിയത്.

വമ്പൻ ബ്രാന്റുകളുടെ പേരിൽ കാമുകൻ നൽകിയത് മുഴുവൻ വ്യാജ ബാഗുകൾ ആയിരുന്നു. ആകെ തകർന്ന് പോയ യുവതി കാമുകനോട് തന്നെ നേരിട്ട് കാര്യം അന്വേഷിക്കുകയായിരുന്നു. എന്നാൽ അയാളുടെ പ്രതികരണം ഞെട്ടിക്കുന്നതായിരുന്നു എന്നും യുവതി പറയുന്നു. അയാൾ സമ്മാനമായി നൽകിയ ബാഗുകൾ എങ്ങനെ വിൽക്കാൻ തോന്നിയെന്നും, നിന്റെ പ്രണയം തന്നെ വ്യാജമായത് കൊണ്ടല്ലേ നിനക്ക് അങ്ങനെ ചെയ്യാൻ തോന്നിയത് എന്നുമാണ് കാമുകന്റെ ആരോപണം.

Also read-ഇത്തിരി വലിയ കുടുംബം; മഹാരാഷ്ട്രയിലെ ഈ വീട്ടിലുള്ളത് ഒരു കുടുംബത്തിലെ 61 പേർ

എന്നാൽ യുവതി പറയുന്നത് താൻ ബാഗുകൾ വിൽപ്പനയ്ക്ക് വച്ചത് നന്നായി എന്നാണ്. അതുകൊണ്ടാണ് തനിക്ക് കാമുകൻ നൽകിയത് വ്യാജ ബാഗുകൾ ആണെന്ന് മനസിലാക്കാൻ സാധിച്ചത്. ഇല്ലെങ്കിൽ താനത് അറിയുകയേ ഇല്ലായിരുന്നു. അയാൾ എനിക്ക് ഡിസൈനർ ബാഗുകൾ സമ്മാനമായി തന്നതിൽ ഞാൻ വളരെ സന്തോഷിച്ചിരുന്നു. പക്ഷേ ഇത് ഇങ്ങനെയാകുമെന്ന് ഞാൻ ഒരിക്കലും കരുതിയിരുന്നില്ല എന്നും യുവതി കൂട്ടിച്ചേർത്തു. വ്യാജ സമ്മാനം നൽകുന്നതിനേക്കാൾ യഥാർത്ഥവും വിലകുറഞ്ഞതുമായ എന്തെങ്കിലും സമ്മാനിച്ചാൽ മതിയായിരുന്നുവെന്നും യുവതി പിന്നീട് തന്റെ പോസ്റ്റിലെ കമന്റിൽ പ്രതികരിച്ചു.

സോഷ്യൽ മീഡിയ ഇക്കാര്യത്തിൽ വ്യത്യസ്ത അഭിപ്രായമാണ് ഉയരുന്നത്. കാമുകൻ വ്യാജ ഉൽപ്പന്നങ്ങൾ സമ്മാനമായി നൽകിയത് നിരാശാജനകമാണെന്ന് ചിലർ പറഞ്ഞു. യുവാവ് വ്യാജ ബാഗുകളാണ് സമ്മാനമായി നല്കിയതെങ്കിൽ ഒരുപക്ഷേ അദ്ദേഹത്തിന്റെ ഹൃദയവും പ്രണയവും വ്യാജമായിരിക്കാം എന്നും ആളുകൾ പ്രതികരിച്ചു. വില കൂടിയ ബാഗുകൾ ലഭിച്ച സമയത്ത് പെൺകുട്ടി സന്തോഷവതിയായി ഇരുന്നെന്നും ഇപ്പോൾ ബാഗുകൾ വ്യാജമാണെന്ന് തിരിച്ചറിഞ്ഞതോടെ അതിൽ അസ്വസ്ഥയായെന്നും മറ്റൊരു കൂട്ടർ യുവതിയെ കുറ്റപ്പെടുത്തി പറഞ്ഞു. ബന്ധങ്ങൾ പണത്തിൽ മാത്രം അധിഷ്ഠിതമാകുന്നുവെന്നാണ് ഇത് വ്യക്തമാക്കുന്നതെന്നും ചിലർ കൂട്ടിച്ചേർത്തു.