11 വർഷം മുമ്പ് തമിഴ്നാട്ടിൽനിന്ന് കാണാതായ ഹനുമാൻ വിഗ്രഹം ഓസ്ട്രേലിയയിൽനിന്ന് കണ്ടെത്തി

ചെന്നൈ: 11 വർഷം മുമ്പ് അജ്ഞാതർ കൊള്ളയടിച്ച ഹനുമാൻ വിഗ്രഹം ഓസ്ട്രേലിയയിൽനിന്ന് കണ്ടെത്തി. തമിഴ്നാട്ടിൽനിന്ന് മോഷണം പോയ വിഗ്രഹമാണ് ഓസ്ട്രേലിയയിലെ ഒരു യുവാവിന്‍റെ പക്കൽനിന്ന് കണ്ടെത്തിയത്. തമിഴ്നാട് പൊലീസ് നടത്തിയ ഏറെക്കാലം നീണ്ട ശാസ്ത്രീയ അന്വേഷണത്തിനൊടുവിലാണ് വിഗ്രഹം വീണ്ടെടുക്കാനായത്.

അരിയല്ലൂർ ജില്ലയിലെ സെണ്ടുറൈക്ക് സമീപമുള്ള വരദരാജ പെരുമാൾ ക്ഷേത്രത്തിൽ നിന്ന് 2012 ൽ വരദരാജ പെരുമാൾ, ശ്രീദേവി, ബൂദേവി എന്നീ മറ്റ് മൂന്ന് വിഗ്രഹങ്ങൾക്കൊപ്പമാണ് ഹനുമാൻ പ്രതിമയും  അജ്ഞാതർ കൊള്ളയടിച്ചത്.

ഏറെക്കാലം അന്വേഷണം നടത്തിയെങ്കിലും വിഗ്രഹം കണ്ടെത്താനായിരുന്നില്ല. ഇതിനിടെയാണ് വിഗ്രഹം രാജ്യത്തിന് പുറത്തേക്ക് പോയതിന്‍റെ സൂചന പൊലീസിന് ലഭിച്ചത്. തുടർന്ന് പ്രത്യേക സംഘം രൂപീകരിച്ച് അന്വേഷണം നടത്തി. ലോകത്തെ പ്രശസ്തമായ ചില ആർട്ട് ഗാലറികളുമായി ബന്ധപ്പെട്ട് ചെന്നൈ പൊലീസ് നടത്തിയ അന്വേഷണമാണ് ഇപ്പോൾ ഫലം കണ്ടത്.

അമേരിക്കയിലെ ന്യൂയോർക്കിലുള്ള ക്രിസ്റ്റീസ് മ്യൂസിയത്തിൽ പ്രദർശിപ്പിച്ചിരിക്കുന്ന ഹനുമാൻ ലോഹ വിഗ്രഹം തമിഴ്നാട്ടിൽനിന്ന് മോഷണം പോയ വിഗ്രഹമാണെന്ന് പൊലീസ് തിരിച്ചറിഞ്ഞു. എന്നാൽ ചെന്നൈ പോലീസ് അന്വേഷിച്ചെത്തിയപ്പോൾ വിഗ്രഹം ലേലത്തിൽ പോയതായി മ്യൂസിയം അധികൃതർ അറിയിച്ചു. ഇതോടെയാണ് കലാസൃഷ്ടികളുടെ ശേഖരമുള്ള ഓസ്ട്രേലിയൻ യുവാവിലേക്ക് പൊലീസ് എത്തുന്നത്. ഇദ്ദേഹമാണ് ന്യൂയോർക്ക് മ്യൂസിയത്തിൽനിന്ന് ഹനുമാൻ വിഗ്രഹം ലേലത്തിൽ സ്വന്തമാക്കിയത്.

തുടർന്ന് തമിഴ്‌നാട് പോലീസ് ഇന്ത്യയിലും ഓസ്ട്രേലിയയിലുമുള്ള ഇരു രാജ്യങ്ങളുടെയും നയതന്ത്ര ഉദ്യോഗസ്ഥരുടെ സഹായത്തോടെ വിഗ്രഹം കൈവശമുള്ള യുവാവിനെ കണ്ടെത്തുകയും അത് വീണ്ടെടുക്കുകയുമായിരുന്നു. വിഗ്രഹം സംസ്ഥാനത്തെത്തിയ ശേഷം കുംഭകോണത്തെ പ്രത്യേക കോടതി വഴി തമിഴ്‌നാട്ടിലെ ക്ഷേത്രം അധികൃതർക്ക് കൈമാറുമെന്ന് പൊലീസ് അറിയിച്ചു.

“കേസ് അന്വേഷണ ചുമതല ഏറ്റെടുത്ത വിഗ്രഹം വിഭാഗം സിഐഡി, വിദേശത്തെ ആർട്ട് ഗാലറികളുടെയും മ്യൂസിയങ്ങളുടെയും വെബ്‌സൈറ്റുകളിൽ പ്രദർശിപ്പിച്ച വിവിധ വിഗ്രഹ ചിത്രങ്ങൾ പരിശോധിച്ചു. മോഷണം പോയ ലോഹ വിഗ്രഹങ്ങളുടെ എല്ലാ ചിത്രങ്ങളും ലോകത്തെ വിവിധ മ്യൂസിയങ്ങളിൽ പ്രദർശിപ്പിച്ച ഫോട്ടോ ചിത്രങ്ങളുമായി താരതമ്യം ചെയ്തു. അമേരിക്കയിലെ ന്യൂയോർക്കിലുള്ള ക്രിസ്റ്റീസ് മ്യൂസിയത്തിൽ പ്രദർശിപ്പിച്ചിരിക്കുന്ന ചിത്രവുമായി ഹനുമാൻ ലോഹ വിഗ്രഹത്തിന്റെ ചിത്രവുമായി സാമ്യമുണ്ടെന്ന് കണ്ടെത്താനായത് അന്വേഷണത്തിൽ നിർണായകമായി”- തമിഴ്നാട് ഡിജിപി പറഞ്ഞു.