HOME » NEWS » Buzz » HERE IS A MOTIVATIONAL NOTE FOR CHILDREN AND PARENTS WHO CANNOT SECURE FULL A PLUS FOR SSLC EXAM

'ഫുൾ എ പ്ലസ് ഇല്ലാത്തവരുടെ കളി തന്തതള്ളമാരും സാറൻമാരും കാണാനിരിക്കുന്നേയുള്ളൂ'; ഈ കുറിപ്പ് ഒന്നൊന്നര മോട്ടിവേഷനാണ് സാറേ!

പത്താം ക്ലാസിൽ തേർഡ്​ ക്ലാസ്​ ആയിരുന്ന താൻ ജീവിതത്തിൽ പിന്നിട്ട വിജയവഴികളാണ്​ ഇപ്പോൾ രാജീവ് ഗാന്ധി സെന്‍റർ ഫോർ അക്വാകൾച്ചറിന്‍റെ മറൈൻ ഫിൻഫിഷ് ഹാച്ചറി പ്രൊജക്ടിന്‍റെ പ്രോജക്റ്റ് ഇൻ ചാർജ് ആയ ജിയോ പങ്കുവെക്കുന്നത്​.

News18 Malayalam | news18-malayalam
Updated: July 18, 2021, 4:00 PM IST
'ഫുൾ എ പ്ലസ് ഇല്ലാത്തവരുടെ കളി തന്തതള്ളമാരും സാറൻമാരും കാണാനിരിക്കുന്നേയുള്ളൂ'; ഈ കുറിപ്പ് ഒന്നൊന്നര മോട്ടിവേഷനാണ് സാറേ!
ജിയോ ക്രിസ്റ്റി ഈപ്പൻ
  • Share this:
ഈ വർഷത്തെ എസ്​എസ്​എൽസി ഫലം​ പുറത്തുവന്നതോടെ ഫുൾ എ പ്ലസിനെ കുറിച്ചായിരുന്നു എല്ലാവരും സംസാരിച്ചത്. ഫുൾ എ പ്ലസുകാരുടെ എണ്ണം കൂടിയപ്പോൾ അത്​ നേടാനാകാതെ പോയവർ നിരവധി. എ പ്ലസുകളുടെ എണ്ണം കുറഞ്ഞതിലും തോറ്റതിലുമൊക്കെ വിഷമിച്ച്​ കഴിയുന്നവരെ ആശ്വസിപ്പിച്ചുകൊണ്ട്​ ഒട്ടേറെ കുറിപ്പുകളാണ് സോഷ്യല്‍ മീഡിയയിൽ വന്നത്. എസ്​ എസ്​ എൽ സിക്ക്​ തോറ്റവർക്ക്​ കൊടൈക്കനാലിലേക്ക്​ സൗജന്യ വിനോദയാത്ര അടക്കമുള്ള ഓഫറുകൾ വന്നതും വലിയ വാർത്തയായിരുന്നു. ഇപ്പോൾ ഇതാ എസ്​എസ്​എൽസിക്ക്​ മികച്ച വിജയം കൈവരിച്ചില്ല എന്ന്​ വിഷമിച്ചിരിക്കുന്നവർക്ക്​ ഒന്നാന്തരമൊരു 'മോട്ടിവേഷൻ' ആകുകയാണ്​ ജിയോ ക്രിസ്റ്റി ഈപ്പന്റെ ഫേസ്​ബുക്ക്​ പോസ്റ്റ്​.

പത്താം ക്ലാസിൽ തേർഡ്​ ക്ലാസ്​ ആയിരുന്ന താൻ ജീവിതത്തിൽ പിന്നിട്ട വിജയവഴികളാണ്​ ഇപ്പോൾ രാജീവ് ഗാന്ധി സെന്‍റർ ഫോർ അക്വാകൾച്ചറിന്‍റെ മറൈൻ ഫിൻഫിഷ് ഹാച്ചറി പ്രൊജക്ടിന്‍റെ പ്രോജക്റ്റ് ഇൻ ചാർജ് ആയ ജിയോ പങ്കുവെക്കുന്നത്​. കമ്പ്യൂട്ടർ അറിയാത്തതിന്​ ടീച്ചർ കളിയാക്കി വിട്ട താൻ പുസ്​തകം നോക്കി എം എസ്​ ഓഫിസ്​ പഠിച്ച്​, ആ ടീച്ചറിന്‍റെയടക്കം റെ​ക്കോർഡ്​ ബുക്കിന്‍റെ ഫ്രണ്ട്​ പേജ്​ ഡിസൈൻ ചെയ്​തതും എറണാകുളത്ത് പൊരിവെയിലത്തും ടൈയും കെട്ടി പുസ്തകം വിറ്റ് നടന്ന് ഇംഗ്ലീഷ് പറയാൻ പഠിച്ചതും പിഎസ് സിയുടെ സുവോളജി കോളജ് അധ്യാപക പരീക്ഷയുടെ റാങ്ക് ലിസ്റ്റിൽ കയറിപ്പറ്റിയതുമൊക്കെ ജിയോ വിവരിക്കുന്നുണ്ട്.

Also Read- 1990-91 ൽ SSLC പാസായ ഷിബു കാക്കനാടിന് അഭിനന്ദനങ്ങൾ ! നാട്ടിൽ മുഴുവൻ ജാതി പറഞ്ഞുള്ള ഫ്ളക്സ് ബോർഡുകൾക്കുള്ള മറുപടി

കുറിപ്പിന്റെ പൂർണരൂപം

പത്താം ക്ളാസിൽ ഫുൾ A + കിട്ടാത്ത എല്ലാ മിടുക്കരുടെയും ശ്രദ്ധയ്ക്ക്.
ഫുൾ A + പോലും. കോപ്പാണ്.
ഈ തൂങ്ങിക്കിടക്കുന്ന ഞാൻ പത്താം ക്ളാസിൽ 3rd ക്ളാസ് ആണെന്ന്. !

തലക്കകത്ത് കേറാത്ത കണക്ക് പ്രീഡിഗ്രിക്ക് ഒഴിവാക്കി 2nd ഗ്രൂപ്പ് എടുത്തപ്പോ 2nd ക്ളാസ് വാങ്ങി. അതിൽ പണി തന്ന ഫിസിക്സ് തൂക്കി എറിഞ്ഞ് സൂവോളജി എടുത്തപ്പോ 1st ക്ളാസായി. പിന്നെ കെമിസ്ട്രിയും കളഞ്ഞ് എല്ലാരും ചിരിച്ച് തള്ളിയ സൂവോളജി പഠിച്ച് 1st ക്ളാസിന്റെ സ്റ്റാൻഡേർഡ് ലേശം കൂട്ടി.

കമ്പ്യൂട്ടർ അറിയാത്തതിന് "നിനക്ക് പറ്റിയത് ചീട്ടുകളി ആണെടാ" എന്ന് പറഞ്ഞ് ഇറക്കിവിട്ട ടീച്ചറുടെ ക്ളാസീന്ന് നേരെ മുണ്ടും മാടിക്കുത്തി ഇറങ്ങി മഹാരാജാസിന്റെ ഗേറ്റിലെ അമൃതാ ബുക്സ്റ്റോളിന്ന് 40 രുപക്ക് വാങ്ങിയ "കമ്പ്യൂട്ടർ കളിക്കാം പഠിക്കാം" എന്നോ മറ്റോ പേരുള്ള പുസ്തകം (റാണാപ്രതാപൻ കെ ശേഖരൻ സാറെഴുതിയത്- എന്ന് ഈ പോസ്റ്റി ന് ശേഷം പിടികിട്ടി സാറിന്റെ കമന്റിൽ നിന്ന്) വായിച്ച് ചിറ്റൂർ റോഡിലെ കഫേയിൽ പോയിരുന്ന് എം. എസ് ഓഫീസ് പഠിച്ച് ആ ടീച്ചറിന്റെതടക്കം റെക്കോർഡ് ബുക്കിന്റെ ഫ്രണ്ട് പേജുകൾ സ്വയം ഡിസൈൻ ചെയ്ത് ഡി റ്റി പി ചെയ്ത് നൈസായിട്ട് പകരം വീട്ടി. (2002-ൽ ആണ് സംഭവം)
കൂടെ പഠിച്ച പഠിപ്പിസ്റ്റുകളെ പിന്നിലാക്കി Net പാസായി.
എറണാകുളത്ത് പൊരിവെയിലത്തും ടൈയ്യും കെട്ടി പുസ്തകം വിറ്റ് നടന്ന് ഇംഗ്ലീഷ് പറയാൻ പഠിച്ചു.

പി ജി ക്ക് എന്നെ പഠിപ്പിച്ച ഗസ്റ്റ് ലക്ചററിനോടൊപ്പം പങ്കെടുത്ത സൂവോളജി യു ജി സി സബ്സ്റ്റിറ്റ്യൂട്ട് അദ്ധ്യാപക ഒഴിവിൽ ആ പാവത്തെയും പിന്നിലാക്കി മൂന്ന് വർഷം കോളജ് അദ്ധ്യാപകനായി. വൈവയ്ക്ക് വന്ന ജോർജ് ഏബ്രഹാം സാറിനൊപ്പം പഠിപ്പിച്ചു. പി ജി ക്ക് പഠിപ്പിച്ച പ്രിയപ്പെട്ട വിജയകുമാരി ടീച്ചറിനൊപ്പം എം ജി വാഴ്സിറ്റി പോസ്റ്റ് ഗ്രാജ്വേഷൻ പരീക്ഷകളുടെ പേപ്പർ വാല്യുവേഷനും കൂടി.
ഇടക്കാലത്ത് ട്യൂഷനെടുത്തപ്പോൾ കിട്ടിയ ഇക്കണോമിക്സ് അറിവുവച്ച് സമുദ്രോത്പന്ന കയറ്റുമതി വികസന അതോറിറ്റിയുടെ നേഷൻ വൈഡ് ഇന്റർവ്യൂവിൽ ഒരേയൊര് ഒഴിവിൽ തൊഴിലിന് കയറി. ഇതിനിടെ പി എസ് സിയുടെ സൂവോളജി കോളജ് അദ്ധ്യാപക പരീക്ഷയുടെ റാങ്ക് ലിസ്റ്റിലും കയറി.

പിന്നെ അറിയാത്ത ജലകൃഷി ചെയ്ത് പഠിച്ച് ഇന്ന് രാജീവ് ഗാന്ധി സെന്റർ ഫോർ അക്വാകൾച്ചറിന്റെ മറൈൻ ഫിൻഫിഷ് ഹാച്ചറി പ്രൊജക്ട് പ്രോജക്റ്റ് ഇൻ ചാർജ് ആയി മാന്യമായി ജീവിക്കുന്നു.
ഒരു ബഞ്ചിൽ ഒപ്പമിരുന്ന് പത്തിൽ 3rd ക്ളാസ് വാങ്ങിയ വേറൊരു ഗഡി ഉണ്ട്. ഹിജാസ് കെ ബഷീർ. അവൻ ഇന്ന് ജിയോളജിക്കൽ സർവ്വേ ഒഫ് ഇന്ത്യയിൽ സയന്റിസ്റ്റ് ആണ്..



പണ്ട് പി എസ് സി ഇന്റർവ്യൂവിൽ ചോദിച്ച അവസാന ചോദ്യം ഇതായിരുന്നു. "താങ്കൾ ഒരു "ഗുരു" ആകണം എന്ന് എഴുതിയിരിക്കുന്നു റെസ്യൂമെയിൽ. എന്താ "ടീച്ചർ" എന്ന് എഴുതാത്തത് !?" എന്ന്.
ഉത്തരം കൊടുത്തു.
"Sir, A teacher is someone. who teaches his students what he learned from a particular subject but a 'Guru' is someone who shows his desciples what he learned from his life, so that the desciple will follow what is right ". എന്ന്.
തീർന്നില്ല.

"സർ എനിക്ക് ന്യൂമെറിക്കൽ ഡിസെബിളിറ്റി ഉണ്ട്. 70×30 എത്രയാണെന്ന് സാർ ചോദിച്ചാൽ എനിക്ക് പറയാനാകില്ല പക്ഷെ എന്റെ മുൻപിലിരിക്കുന്ന എന്റെ വിദ്യാർത്ഥികളിൽ ഒരുവന് ഇതേപോലുള്ള അവസ്ഥ ഉണ്ടെങ്കിൽ അവനെ എനിക്ക് തിരിച്ചറിയാനും സഹായിക്കാനും ആകും.
That's the reason why I want to be a Guru rather than a mere teacher" -എന്ന്.
അന്ന് പി എസ് സിഇന്റർവ്യൂ ബോർഡ് ചെയർമാൻ അന്ന് തന്ന ഹാൻഡ് ഷെയ്ക്ക് എനിക്ക് ധാരാളം മതിയെന്ന്.

സർക്കാർ വക കോളജ് അദ്ധ്യാപന ഉദ്യോഗം കിട്ടിയില്ല. എന്നാലും പുല്ലാണെന്ന്. ഇതിനോടകം ആയിരക്കണക്കായ ജനങ്ങൾക്ക് മാന്യമായി ജീവിക്കാനും വിജയിക്കാനുമുള്ള മാർഗം കാട്ടിക്കൊടുക്കുന്ന ആളാണ് ഞാൻ. ഇന്നും. ഇനിയും. അതല്ലേ "ഗുരു" എന്നതിന്റെ സാരവും.
പോകാൻ പറടാ ഉവ്വേ..

ഫുൾ എ പ്ളസ് ഇല്ലാത്തവരുടെ കളി തന്തതള്ളമാരും സാറൻമാരും കാണാനിരിക്കുന്നേയുള്ളെന്ന് പോയി പറഞ്ഞേക്ക്.
P.S: സകലമാന ഗുരുക്കൻമാർക്കുമായി ഒരു ലോഗോയും ഡിസൈൻ ചെയ്ത് കൊടുത്തിട്ടുണ്ട് പണ്ടത്തെ 3rd ക്ളാസുകാരൻ. "Logo for teachers " എന്ന് ഇമേജ് സെർച് ചെയ്താൽ ആദ്യം കാണുന്ന വിക്കിപീഡിയ ലിങ്കിൽ.
Published by: Rajesh V
First published: July 18, 2021, 3:57 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories