കിം കർദാഷിയാന്റെ അപര ക്രിസ്റ്റീന ആഷ്ടെൻ ഗൂർകാനി അന്തരിച്ചു; അന്ത്യം ഹൃദയാഘാതം മൂലം

റിയാലിറ്റി ടിവി താരം കിം കർദാഷിയാന്റെ അപരയും ഒൺലി ഫാൻസ് മോഡലുമായ ക്രിസ്റ്റീന ആഷ്ടെൻ ഗൂർകാനി (34) അന്തരിച്ചു. ഹൃദയാഘാതം മൂലമായിരുന്നു അന്ത്യം. ക്രിസ്റ്റീനയുടെ കുടുംബമാണ് മരണവാർത്ത പുറത്തുവിട്ടത്. ഏപ്രിൽ 20 നാണ് മരണം സംഭവിച്ചതെന്നും കുടുംബാം​ഗങ്ങൾ അറിയിച്ചു. ക്രിസ്റ്റീനക്കായി ആരംഭിച്ച ​ഗോഫണ്ട്മി പ്ലാറ്റ്ഫോമിലാണ് കുടുംബാം​ഗങ്ങൾ മരണം സംബന്ധിച്ച വിശ​ദാംശങ്ങൾ പങ്കുവെച്ചത്.

ഏപ്രിൽ 20 ന് പുലർച്ചെ ഏകദേശം 4:31 ന് ഞങ്ങളുടെ ഒരു കുടുംബാംഗത്തിൽ നിന്ന് ഒരു ഫോൺ കോൾ എത്തി. അയാൾ കരയുകയും ആഷ്ടെൻ മരിച്ചെന്നു പറഞ്ഞ് വിലപിക്കുകയും ചെയ്യുന്നുണ്ടായിരുന്നു. ഹൃദയസ്തംഭനത്തെത്തുടർന്നായിരുന്നു മരണം”, ആഷ്ടെന്റെ കുടുംബാം​ഗങ്ങളിൽ ഒരാൾ ഏപ്രിൽ 25-ന് ​ഗോ ഫണ്ടി മി പ്ലാറ്റ്‌ഫോമിൽ കുറിച്ചു.

Also Read- ശരീരത്തിൽ കാമുകന്റെ പേര് പച്ചകുത്തി; വേദന മാറും മുമ്പ് കാമുകൻ ഉപേക്ഷിച്ചു പോയി

ആരുടെ മുഖത്തും പുഞ്ചിരി വിടർത്തുന്ന കരുതലും സ്‌നേഹവുമുള്ള വ്യക്തിത്വം ആയിരുന്നു ആഷ്ടെന്നിന്റേതെന്ന് കുടുംബാം​ഗങ്ങളിൽ ഒരാൾ അനുസ്മരിച്ചു. ആഷ്ടെന്റെ മരണത്തിൽ തങ്ങൾ അ​ഗാധമായി ദുഃഖിക്കുന്നു എന്നും മരണവാർത്ത കേട്ട് തങ്ങളുടെ ഹൃദയം തകർന്നെന്നും കുടുംബാം​ഗങ്ങൾ കുറിച്ചു.

ആഷ്ടെന്റെ ശവസംസ്‌കാരത്തിനു വേണ്ടിയാണ് ഫണ്ട് സ്വരൂപിക്കുന്നതെന്നും കുടുംബാ​ഗങ്ങൾ പോസ്റ്റിൽ കൂട്ടിച്ചേർത്തു. ”ഞങ്ങളുടെ നഷ്ടം വലുതാണ്. അതു സഹിക്കാൻ ഞങ്ങൾക്ക് വേണ്ടത്ര ശക്തിയില്ല. ഞങ്ങളുടെ കുടുംബത്തെ സഹായിക്കാൻ സാധിക്കുന്നവർ ഒത്തുചേരണമെന്ന് അഭ്യർത്ഥിക്കുന്നു. ഈ കുടുംബത്തിന് നിങ്ങൾ നൽകുന്ന പിന്തുണയ്ക്ക് ഞങ്ങൾ എന്നും നന്ദിയുള്ളവരാണ്. ക്രിസ്റ്റീന ആഷ്ടെൻ ഗൂർക്കാനിക്ക് നിത്യശാന്തി നേരാം”, എന്നും പോസ്റ്റിൽ പറയുന്നു.