തിരുവനന്തപുരം മേയർക്ക് 'മധുരമുള്ള സ്നേഹം' നൽകി കോഴിക്കോട്ടുകാർ

പ്രളയദുരിതാശ്വാസ പ്രവർത്തനങ്ങൾക്ക് നേതൃത്വം നൽകിയ തിരുവനന്തപുരം മേയർക്ക് മധുരമുള്ള സ്നേഹം സമ്മാനിച്ച് കോഴിക്കോട്ടുകാർ. മലബാറിലെ പ്രളയബാധിതമേഖലകളിലേക്ക് സാധനങ്ങൾ കയറ്റിയയച്ച ലോറി മടങ്ങുവരുമ്പോൾ, കോഴിക്കോടൻ ഹൽവയാണ് സമ്മാനമായി അവിടുത്തുകാർ നൽകിയത്. മേയർ വി.കെ പ്രശാന്ത് ഫേസ്ബുക്ക് പോസ്റ്റിലൂടെ അറിയിച്ചതാണ് ഇക്കാര്യം. ഈ പോസ്റ്റ് ഇതിനോടകം സോഷ്യൽ മീഡിയയിൽ വൈറലായി കഴിഞ്ഞു. പ്രളയദുരിതാശ്വാസത്തിനായി മേയറുടെ ആഭിമുഖ്യത്തിൽ തിരുവനന്തപുരം നഗരസഭ ഒരുക്കിയ കളക്ഷൻ സെന്‍ററിന് വൻതോതിലുള്ള പിന്തുണ ലഭിച്ചിരുന്നു.

മേയറുടെ ഫേസ്ബുക്ക് പോസ്റ്റ് പൂർണരൂം...

#സ്നേഹത്തിന് ഇത്ര മധുരമോ?
തിരുവനന്തപുരം #നഗരസഭയിൽ
നിന്ന് #കോഴിക്കോട്ടേക്ക് പോയ ലോറി മടങ്ങി വന്നപ്പോൾ അവിടെ നിന്നും കൊടുത്തയച്ച കുറച്ച് #ഹൽവയാണിത്....
ഞങ്ങൾ കയറ്റി അയച്ച #സാധനങ്ങളെക്കാൾ ഭാരമുണ്ടിതിന് .... #സ്നേഹത്തിന്റെ ഭാരം
ഈ മധുരത്തിന് തിരുവനന്തപുരത്തിന്റെ
#നന്ദി അറിയിക്കുന്നു ...