എംപിയുടെ വീട് വെള്ളത്തിലായത് 'ചെന്നിത്തല ഡാം' തുറന്നുവിട്ടതുകൊണ്ടോ? പരിഹാസവുമായി മന്ത്രി എം.എം മണി

കൊച്ചിയിലെ വെള്ളപ്പൊക്കത്തിൽ മേയറെയും കോൺഗ്രസ് നേതാക്കളെയും പരിഹസിച്ച് മന്ത്രി എം.എം മണി. കഴിഞ്ഞ വർഷത്തെ പ്രളയം ഡാമുകൾ തുറന്നുവിട്ടുള്ള മനുഷ്യനിർമ്മിത ദുരന്തമാണെന്ന് കോൺഗ്രസ് വിമർശനത്തിനുള്ള മറുപടിയായാണ് കൊച്ചിയിലെ വെള്ളപ്പൊക്ക വിഷയത്തിൽ മന്ത്രിയുടെ പരിഹാസം. കൊച്ചിയിലെ വെള്ളപ്പൊക്കത്തിൽ എം.പിയുടെ വീട് ഉൾപ്പടെ വെള്ളത്തിലായത് മുല്ലപ്പള്ളിയും കൂട്ടരും ചേർന്ന് 'ചെന്നിതല ഡാം' തുറന്നുവിട്ടതുകൊണ്ടാണോയെന്നും മന്ത്രി ചോദിച്ചു.

'കഴിഞ്ഞ ദിവസം രണ്ടു മണിക്കൂർ പെയ്ത മഴയിൽ കൊച്ചി വെള്ളത്തിനടിയിലായത് കൊച്ചി മേയർക്ക് 'പ്രത്യേക പ്രതിഭാസം' മാത്രം. കഴിഞ്ഞവർഷം ഒരാഴ്ചയിലേറെ തുടർച്ചയായി പെയ്ത അതിതീവ്ര മഴയിൽ വെള്ളപ്പൊക്കമുണ്ടായത് കൊച്ചി മേയറുടെ നേതാക്കളായ ചെന്നിത്തലയ്ക്കും മുല്ലപ്പള്ളിക്കും കൂട്ടർക്കും 'മനുഷ്യനിർമ്മിത ദുരന്തം''- മന്ത്രി മണി പറഞ്ഞു.

മേനോൻ ഇപ്പോഴും പഴയ തറവാട് വീടിന്റെ ഉമ്മറത്ത് എണ്ണയും കുഴമ്പും തേച്ച് പിടിപ്പിച്ച് ചാരു കസാലയിലങ്ങനെ നീണ്ടു നിവർന്നു കിടക്കുകയാണോ?

യാഥാർത്ഥ്യവുമായി ഒരു ബന്ധവുമില്ലാത്ത കാര്യങ്ങൾ പറഞ്ഞ് ജനങ്ങളെ കബളിപ്പിക്കുകയും, ദുരന്തമുഖങ്ങളിൽ പുറംതിരിഞ്ഞു നിൽക്കുകയും ചെയ്യുന്ന ഇത്തരം കോൺഗ്രസ്സുകാർ യഥാർത്ഥത്തിൽ 'പ്രത്യേക പ്രതിഭാസങ്ങളും' 'ദുരന്തങ്ങളും' ആയി മാറുകയാണെന്നും മന്ത്രി മണി പറഞ്ഞു.