'പ്രിയപ്പെട്ടവരുമായി എത്രയും വേഗം ഒന്നിക്കാനാകട്ടെ': കഴിഞ്ഞ വിഷുവിന്റെ ഓർമ പങ്കു വച്ച് പൃഥ്വിരാജ്

എല്ലാവർക്കും വിഷു ആശംസകളുമായി നടൻ പൃഥ്വിരാജ്. ആടുജീവിതം ചിത്രീകരണത്തിനായി നിലവിൽ ജോർദ്ദാനിലുള്ള പൃഥ്വിയും സംഘവും ലോക്ക് ഡൗണിനെ തുടർന്ന് അവിടെ കുടുങ്ങിയിരിക്കുകയാണ്. അവിടെ നിന്നാണ് ഭാര്യ സുപ്രിയയും ഒന്നിച്ചുള്ള കഴിഞ്ഞ വർഷത്തെ വിഷു ചിത്രം പങ്കുവച്ച് പൃഥ്വിയുടെ ആശംസ.

'കഴിഞ്ഞ വിഷുവിലെ ചിത്രമാണിത്.. ഞങ്ങളെ ഞങ്ങളാക്കിത്തീർത്ത എല്ലാവരുടെയും കുടുംബത്തോടൊപ്പമായിരുന്നു അന്നത്തെ ഉച്ചഭക്ഷണം.. കൊറോണ വൈറസും തുടര്‍ന്നുള്ള ലോക്ക് ഡൗണും മൂലം ഈ വർഷം മറ്റ് പല കുടുംബങ്ങളെയും പോലെ ഞങ്ങളുടെ കുടുംബവും രണ്ടിടത്തായിരിക്കുകയാണ്.. എന്നിരുന്നാലും എത്രയും വേഗം നമ്മുടെ പ്രിയപ്പെട്ടവരുമായി ഒന്നിക്കാൻ കഴിയട്ടെയെന്ന് നമുക്ക് പ്രതീക്ഷിക്കാം.. പ്രാർഥിക്കാം.. വിഷു ആശംസിച്ചു കൊണ്ട് പൃഥ്വി കുറിച്ചു.