Covid 19 | കോവിഡിന്‍റെ 200 ദിനങ്ങൾ: കേരളജനത അസാമാന്യ ആത്മധൈര്യത്തോടെ പോരാടിയെന്ന് മുഖ്യമന്ത്രി

തിരുവനന്തപുരം: കോവിഡ് 19 നെതിരായ പോരാട്ടത്തില്‍ കേരളത്തിലെ ജനത അസാമാന്യ ആത്മവിശ്വാസം പ്രകടിപ്പിച്ചെന്ന് മുഖ്യമന്ത്രി പിണറായി വിജയന്‍. സംസ്ഥാനത്ത് ആദ്യ കോവിഡ് പോസിറ്റീവ് കേസ് സ്ഥിരീകരിച്ചിട്ട് 200 ദിവസങ്ങള്‍ പൂർത്തിയാകുമ്പോഴാണ് മുഖ്യമന്ത്രിയുടെ പ്രതികരണം. ട്വിറ്ററിലൂടെയാണ് മുഖ്യമന്ത്രി ഇക്കാര്യം പറഞ്ഞത്. 

"കോവിഡ്-19 പ്രതിസന്ധിയുടെ 200-ാം ദിനത്തിലാണ് നമ്മള്‍. ഈ കാലഘട്ടം നിരാശയുടെയും നഷ്‌ടങ്ങളുടെയും മാത്രമല്ലെന്ന് പിന്നിലേക്ക് തിരിഞ്ഞുനോക്കുമ്പോള്‍ നമുക്ക് അഭിമാനത്തോടെ പറയാന്‍ സാധിക്കും. ധൈര്യം, അനുകമ്പ, അതിജീവനം, ഉന്മേഷം എന്നിവയുടെ കൂടിയായിരുന്നു ഈ ദിനങ്ങൾ. കേരളത്തിലെ ജനങ്ങള്‍ ഈ പ്രതിസന്ധിഘട്ടത്തെ അതിശയിപ്പിക്കുന്ന ആത്മവീര്യത്തോടെ നേരിട്ടു" ട്വിറ്ററിൽ മുഖ്യമന്ത്രി പറഞ്ഞു.

ഇന്ത്യയിലെ ആദ്യമായി കോവിഡ് 19 സ്ഥിരീകരിച്ചത് കേരളത്തിലാണ്. ചൈനയിലെ വുഹാനിൽനിന്ന് തിരിച്ചെത്തിയ വിദ്യാർഥിനിക്ക് ജനുവരി 30 നാണ് കോവിഡ് സ്ഥിരീകരിച്ചത്. ആദ്യ കോവിഡ് കേസ് റിപ്പോര്‍ട്ട് ചെയ്‌ത് 200-ാം ദിവസമാണിന്ന്. ഇപ്പോള്‍ കേരളത്തിലെ കോവിഡ് വ്യാപനം അതിരൂക്ഷമായിരിക്കുകയാണ്.

You may also like:ഓണത്തിനു മുമ്പ് സര്‍ക്കാര്‍ ജീവനക്കാര്‍ക്ക് ശമ്പളവും ആനുകൂല്യങ്ങളും നൽകും: മന്ത്രി തോമസ് ഐസക്ക് [NEWS]യുഎസ് സ്കോളർഷിപ്പ് നേടിയ ഇരുപതുകാരിയുടെ മരണം; രണ്ടു പേർ അറസ്റ്റിൽ [NEWS] 'കരാര്‍ നിയമനങ്ങള്‍ നടക്കുന്നില്ലെന്ന വാദം അദ്ഭുതകരം; PSC ചെയർമാൻ സര്‍ക്കാരിനെ വെള്ള പൂശുന്നു': രമേശ് ചെന്നിത്തല [NEWS]

നിലവിൽ ദിവസവും ആയിരത്തിലേറെ കോവിഡ് കേസുകളാണ് സംസ്ഥാനത്ത് സ്ഥിരീകരിക്കുന്നത്. കഴിഞ്ഞ ദിവസം 1608 പേർക്കാണ് കോവിഡ് റിപ്പോർട്ട് ചെയ്തത്. സംസ്ഥാനത്ത് ഇപ്പോൾ സ്ഥിരീകരിക്കുന്ന കോവിഡ് കേസുകളിൽ ഭൂരിഭാഗവും സമ്പർക്കത്തിലൂടെയാണ്.