Covid 19 | രാജ്യത്ത് 24 മണിക്കൂറിനിടെ 46,963 പുതിയ കോവിഡ് കേസുകള്‍; പ്രതിദിന കണക്കില്‍ കേരളം മുന്നിൽ തന്നെ

ന്യൂഡൽഹി: ഇരുപത്തിനാല് മണിക്കൂറിനിടെ രാജ്യത്ത് 46963 പേർക്ക് കൂടി കോവിഡ് സ്ഥിരീകരിച്ചു. ഇതോടെ ആകെ രോഗബാധിതരുടെ എണ്ണം 82 ലക്ഷത്തിലേക്കടുക്കുകയാണ്. ആരോഗ്യ-കുടുംബക്ഷേമ മന്ത്രാലയം പുറത്തുവിട്ട ഏറ്റവും പുതിയ കണക്കുകൾ പ്രകാരം രാജ്യത്ത് ഇതുവരെ 81,84,082 പേർക്കാണ് കോവിഡ് സ്ഥിരീകരിച്ചത്. ഇതിൽ 74,91,513 പേർ രോഗമുക്തി നേടിയിട്ടുണ്ട്. നിലവില്‍ 5,70,458 പേരാണ് ചികിത്സയിൽ തുടരുന്നത്. 91.54% ആണ് നിലവിലെ രോഗമുക്തി നിരക്ക്.

Also Read-ഡൊണാൾഡ് ട്രംപിന്‍റെ 18 റാലികളിൽ പങ്കെടുത്ത 30000 പേർക്ക് കോവിഡ് പിടിപെട്ടിരിക്കാം; 700 പേർ മരിച്ചേക്കുമെന്നും പഠനം

അതുപോലെ തന്നെ മരണനിരക്കിലും രാജ്യത്തെ കുറവ് രേഖപ്പെടുത്തുന്നുണ്ട്. 1.49% ആണ് മരണനിരക്ക്. കഴിഞ്ഞ ഇരുപത്തിനാല് മണിക്കൂറിനിടെ 470 മരണങ്ങളാണ് റിപ്പോർട്ട് ചെയ്യപ്പെട്ടത്. നാല് മാസത്തിനിടെ റിപ്പോർട്ട് ചെയ്യപ്പെടുന്ന ഏറ്റവും കുറഞ്ഞ പ്രതിദിന കണക്കാണിത്. 1,22,111 കോവിഡ് മരണങ്ങളാണ് രാജ്യത്ത് ഇതുവരെ റിപ്പോർട്ട് ചെയ്യപ്പെട്ടിട്ടുള്ളത്.

Also Read-Covid 19| തമിഴ്നാട് കൃഷി മന്ത്രി ദൊരൈക്കണ്ണ് കോവിഡ് ബാധിച്ച് മരിച്ചു

കോവിഡ് പരിശോധനകളും പ്രതിദിനം കൂടുന്നുണ്ട്. കഴിഞ്ഞ ദിവസം മാത്രം 10.91ലക്ഷം സാമ്പിൾ പരിശോധനകളാണ് നടത്തിയത്. ഇതോടെ ഇതുവരെയുള്ള കോവിഡ് പരിശോധനകൾ പതിനൊന്ന് കോടിയിലേക്കടുക്കുകയാണ്. ആദ്യഘട്ടത്തിൽ കോവിഡ് വ്യാപനം രൂക്ഷമായ പല സംസ്ഥാനങ്ങളിലും ഇപ്പോൾ കോവിഡ് കേസുകൾ കുറഞ്ഞു വരുന്നത് ശുഭസൂചന നൽകുന്ന കാര്യമാണ്.

Also Read-ഗ്യാസ് ബുക്കിംഗിന് പൊതുനമ്പർ; ഇന്ന് മുതൽ നടപ്പിലാകുന്ന മാറ്റങ്ങൾ

നിലവിൽ പ്രതിദിന കോവിഡ് കേസുകളിൽ രാജ്യത്ത് മുന്നില്‍ നിൽക്കുന്നത് കേരളമാണ്. കഴിഞ്ഞ ദിവസം മാത്രം സംസ്ഥാനത്ത് 7983 പേർക്കാണ് കോവിഡ് സ്ഥിരീകരിച്ചത്. ഇതിൽ 7049 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. പുറത്തുവിട്ട കണക്കുകൾ അനുസരിച്ച് സംസ്ഥാനത്ത് ഇതുവരെ 4,33,105 പേർക്കാണ് രോഗം സ്ഥിരീകരിച്ചത്. ഇതിൽ 3,40,324 പേര്‍ രോഗമുക്തി നേടിയിട്ടുണ്ട്. നിലവിൽ 91,190 പേരാണ് ചികിത്സയിൽ തുടരുന്നത്.