• HOME
  • »
  • NEWS
  • »
  • crime
  • »
  • Bank Frauds | ബാങ്ക് തട്ടിപ്പുകൾ: രാജ്യത്തെ ഏറ്റവും വലിയ നാല് സാമ്പത്തിക തട്ടിപ്പുകളെക്കുറിച്ച് അറിയാം

Bank Frauds | ബാങ്ക് തട്ടിപ്പുകൾ: രാജ്യത്തെ ഏറ്റവും വലിയ നാല് സാമ്പത്തിക തട്ടിപ്പുകളെക്കുറിച്ച് അറിയാം

34,000 കോടി രൂപ തട്ടിയ ഇന്ത്യയിലെ ഏറ്റവും വലിയ സാമ്പത്തിക തട്ടിപ്പാണ് ഡിഎച്ച് എഫ്എല്‍ തട്ടിപ്പ്.

  • Last Updated :
  • Share this:
    യെസ് ബാങ്ക്-ഡിഎച്ച്എഫ്എല്‍ ബാങ്ക് (Yes Bank-DHFL bank) വായ്പ തട്ടിപ്പുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ മഹാരാഷ്ട്രയിലെ (Maharashtra) രണ്ട് ബില്‍ഡര്‍മാരുടെ 415 കോടി രൂപയുടെ സ്വത്തുക്കള്‍ എന്‍ഫോഴ്സ്മെന്റ് ഡയറക്ടറേറ്റ് (ED) കണ്ടുകെട്ടിയിരുന്നു. 34,000 കോടി രൂപ തട്ടിയ ഇന്ത്യയിലെ ഏറ്റവും വലിയ സാമ്പത്തിക തട്ടിപ്പാണ് ഡിഎച്ച് എഫ്എല്‍ (DHFL) തട്ടിപ്പ്. മൊത്തം 17 ബാങ്കുകളെയാണ് ഡിഎച്ച്എഫ്എല്‍ വായ്പ തട്ടിപ്പിന്റെ പേരില്‍ വഞ്ചിച്ചത്.

    ഈ സാഹചര്യത്തില്‍ രാജ്യച്ചെ ഏറ്റവും വലിയ നാല് സാമ്പത്തിക തട്ടിപ്പുകള്‍ ഏതൊക്കെയെന്ന് പരിശോധിക്കാം:

    1. 34,000 കോടി രൂപയുടെ ഡിഎച്ച്എഫ്എല്‍ തട്ടിപ്പ്
    17 ബാങ്കുകൾ ഉള്‍പ്പെടുന്ന കണ്‍സോര്‍ഷ്യം 2010നും 2018നും ഇടയില്‍ 42,871 കോടി രൂപയുടെ വായ്പയാണ് നൽകിയത്. ഇതിന് പിന്നാലെ 2019 ജനുവരിയിലാണ്, ഫണ്ട് തട്ടിയെടുത്തെന്ന് സംബന്ധിച്ച് ഡിഎച്ച്എഫ്എല്ലിനെതിരെ വാര്‍ത്തകള്‍ പുറത്തു വരുന്നത്. ഇതേതുടര്‍ന്ന് ഡിഎച്ച്എഫ്എല്ലിനെതിരെ അന്വേഷണം ആരംഭിച്ചു.

    തുടര്‍ന്ന് ബാങ്കുകൾ, 2019 ഫെബ്രുവരി 1-ന് ഒരു മീറ്റിംഗ് കൂടുകയും 2015 ഏപ്രില്‍ 1 മുതല്‍ 2018 ഡിസംബര്‍ 31 വരെയുള്ള ഡിഎച്ച്എഫ്എല്ലിന്റെ 'പ്രത്യേക അവലോകന ഓഡിറ്റ്' നടത്തുന്നതിന് കെപിഎംജിയെ നിയമിക്കുകയും ചെയ്തു. ഇതില്‍ ക്രമക്കേട് കണ്ടെത്തി. ഇതേതുടര്‍ന്ന് ഡിഎച്ച്എഫ്എല്ലിന്റെ പ്രൊമോട്ടര്‍മാരായ കപില്‍, ധീരജ് വാധവാന്‍ എന്നിവര്‍ക്കെതിരെ 2019 ഒക്ടോബര്‍ 18-ന് ലുക്ക് ഔട്ട് നോട്ടീസ് പുറപ്പെടുവിക്കുകയും ചെയ്തിരുന്നു.

    ഡിഎച്ച്എഫ്എല്‍ പ്രൊമോട്ടര്‍മാരുമായി സഹകരണമുളള 66 സ്ഥാപനങ്ങള്‍ക്ക് 29,100 കോടി രൂപ നല്‍കിയെന്നും ഇതില്‍ 29,849 കോടി രൂപ കുടിശ്ശികയാണെന്നും അക്കൗണ്ട് രേഖകള്‍ പരിശോധിച്ചതില്‍ നിന്ന് കണ്ടെത്തി. ഇത് കണ്‍സോര്‍ഷ്യത്തിലെ 17 ബാങ്കുകള്‍ക്ക് 34,615 കോടി രൂപയുടെ നഷ്ടമാണ് ഉണ്ടാക്കിയത്.

    2. എബിജി ഷിപ്യാർഡ് തട്ടിപ്പ്
    വിവിധ ബാങ്കുകളുടെ കണ്‍സോര്‍ഷ്യത്തിൽ നിന്ന് 22,842 കോടി രൂപ തട്ടിയെടുത്തതിനെ തുടര്‍ന്ന് എബിജി ഷിപ്പ്യാര്‍ഡ് ലിമിറ്റഡ് കമ്പനിക്കെതിരെ സിബിഐ കേസെടുത്തിരിന്നു. ഇതേതുടര്‍ന്ന് പ്രമോട്ടര്‍ ഋഷി അഗര്‍വാള്‍, എക്സിക്യൂട്ടീവുമാരായ സന്താനം മുത്തുസ്വാമി, അശ്വിനി കുമാര്‍ എന്നിവര്‍ക്കെതിരെ സിബിഐ ലുക്കൗട്ട് നോട്ടീസ് പുറപ്പെടുവിച്ചു.

    നിശ്ചിത തീയതികളില്‍ പലിശയും ഗഡുക്കളും നല്‍കുന്നതില്‍ കമ്പനിക്ക് കഴിയാതെ വന്നതോടെയാണ് തട്ടിപ്പിന്റെ കഥ പുറത്ത് അറിയുന്നത്. എസ്ബിഐയില്‍ നിന്നും കമ്പനി വലിയ തുകയാണ് വായ്പ എടുത്തിരുന്നത്.

    വിശാലമായ ഷിപ്യാർഡുകൾ, അന്താരാഷ്ട്ര ഉപഭോക്താക്കള്‍, പ്രതിരോധ കപ്പലുകളും അന്തര്‍വാഹിനികളും നിര്‍മ്മിക്കാനുള്ള ലൈസന്‍സ്, 55-ലധികം അനുബന്ധ കമ്പനികൾ എന്നിവയുണ്ടായിരുന്ന എബിജിക്ക്, 2015-16 കാലഘട്ടത്തില്‍ കമ്പനിയുടെ പ്രൊമോട്ടര്‍മാര്‍ ചുവട് മാറിയതോടെയാണ് പ്രതാപം നഷ്ടപ്പെടാന്‍ തുടങ്ങിയത്.

    ക്രമക്കേട് കണ്ടെത്തിയതിനെ തുടര്‍ന്ന്‌ മുംബൈയിലെ ഡയറക്ടറേറ്റ് ഓഫ് റവന്യൂ ഇന്റലിജന്‍സ് എബിജിക്ക് കാരണം കാണിക്കല്‍ നോട്ടീസ് നല്‍കി. കമ്പനി അക്കൗണ്ട് നിഷ്‌ക്രിയ ആസ്തി (NPA) ആയി മുദ്രകുത്തുകയും ചെയ്തു.

    3. ആംടെക് ഓട്ടോ കേസ്

    2022 മെയ് മാസത്തില്‍ ഡല്‍ഹി ഹൈക്കോടതി അഭിഭാഷകനായ ജസ്‌കരന്‍ ചൗളയുടെ പരാതിയെ തുടര്‍ന്നാണ് ആംടെക് ഓട്ടോ പ്രൊമോട്ടര്‍മാര്‍ നടത്തിയ 12,000 കോടി രൂപയുടെ തട്ടിപ്പ് കേസില്‍ സിബിഐ, എന്‍ഫോഴ്സ്മെന്റ് ഡയറക്ടറേറ്റ് (ഇഡി) എന്നിവ അന്വേഷണം നടത്തിയത്.

    കമ്പനിക്ക് പണം തട്ടിയെടുക്കുന്നതിന് ഇടനിലക്കാരായി നിന്ന ആംടെക് ഗ്രൂപ്പിലെ 27 ജീവനക്കാരുടെ പേരുകളാണ് പരാതിയില്‍ ഉയർന്നു വന്നത്. അതേസമയം, നിരവധി ബാങ്കുകളിലെ ജീവനക്കാരുമായി ചേര്‍ന്ന് ആംടെക് ഓട്ടോയിലെ ഉന്നത ഉദ്യോഗസ്ഥര്‍ അഴിമതി, ബാങ്ക് വായ്പ വെളുപ്പിക്കല്‍ എന്നിവ നടത്തിയെന്നും പരാതിക്കാരനായ ഡല്‍ഹി ഹൈക്കോടതിയിലെ അഭിഭാഷകനായ ജസ്‌കരന്‍ ചൗള ആരോപിച്ചിരുന്നു.

    ആംടെക് ഓട്ടോയുടെ പ്രൊമോട്ടര്‍ അരവിന്ദ് ധാം, 27 കമ്പനി ജീവനക്കാര്‍, റെസല്യൂഷന്‍ പ്രൊഫഷണല്‍ (ആര്‍പി) ദിനകര്‍ വെങ്കട്‌സുബ്രഹ്‌മണ്യന്‍, പാര്‍ട്ണര്‍ വിവേക് അഗര്‍വാള്‍,
    ആംടെക് ഓട്ടോയുടെ ഇടപാടുകളുടെ ഫോറന്‍സിക് ഓഡിറ്റ് റിപ്പോര്‍ട്ട് തയ്യാറാക്കിയ ഏണസ്റ്റ് ആന്‍ഡ് യങ് (EY), കൂടാതെ ഐഡിബിഐ ബാങ്കിലെ ഏതാനും ഉദ്യോഗസ്ഥര്‍ക്കെതിരെയും പരാതിക്കാരന്‍ ക്രിമിനല്‍ അന്വേഷണം ആവശ്യപ്പെട്ടിരുന്നു.

    ആംടെക് ഗ്രൂപ്പിന് 25,000 കോടി രൂപയിലധികം കുടിശ്ശികയുള്ളതായാണ് റിപ്പോര്‍ട്ടുകൾ. ഇതിനിടെ, ഈ മാര്‍ച്ചില്‍ കോര്‍പ്പറേറ്റ് കാര്യ മന്ത്രാലയം ഗ്രൂപ്പിന്റെ പ്രമോട്ടര്‍മാരില്‍ നിന്ന് 2,320 കോടി രൂപ തിരിച്ചെടുക്കാന്‍ നടപടി സ്വീകരിച്ചതായും റിപ്പോര്‍ട്ടുകൾ പുറത്തു വന്നിരുന്നു.

    ഇതിനിടെ, കമ്പനിയുടെ വായ്പാ കുടിശ്ശികയെക്കുറിച്ച് വിശദമായി അന്വേഷിക്കാന്‍ സീരിയസ് ഫ്രോഡ് ആന്‍ഡ് ഇന്‍വെസ്റ്റിഗേഷന്‍സ് ഓഫീസിനോട് (എസ്എഫ്‌ഐഒ) മന്ത്രാലയം ആവശ്യപ്പെട്ടു.

    4. ഭൂഷണ്‍ പവര്‍ ആന്‍ഡ് സ്റ്റീല്‍

    മുംബൈയിലെയും ഡല്‍ഹിയിലെയും റസിഡന്‍ഷ്യല്‍ പ്രോപ്പര്‍ട്ടികള്‍ വാങ്ങുന്നതിനായി ഭൂഷണ്‍ പവര്‍ ആന്‍ഡ് സ്റ്റീല്‍ ലിമിറ്റഡിന്റെ (ബിപിഎസ്എല്‍) വൈസ് ചെയര്‍പേഴ്സണ്‍ ആരതി സിംഗാളും ഭര്‍ത്താവ് സഞ്ജയ് സിംഗാളും ചേര്‍ന്ന് നിരവധി ബാങ്കുകളില്‍ നിന്ന് കോടികള്‍ തട്ടിയെടുത്തതായി സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫീസ് (എസ്എഫ്‌ഐഒ) ഡല്‍ഹി കോടതിയെ അറിയിച്ചു. 5,500 കോടിരൂപ തട്ടിയെടുത്തെന്നാണ് കേസ്.

    സംഭവത്തില്‍ ആരതി സിംഗാളിനെ അറസ്റ്റ് ചെയ്തെങ്കിലും ദിവസങ്ങള്‍ക്കകം അവര്‍ക്ക് ജാമ്യം ലഭിച്ചിരുന്നു. പിന്നീട് പഞ്ചാബ് നാഷണല്‍ ബാങ്ക് 2015 ഡിസംബര്‍ 31-ന് ഭൂഷണ്‍ പവര്‍ & സ്റ്റീല്‍ ലിമിറ്റഡിന്റെ അക്കൗണ്ടുകള്‍ നിഷ്‌ക്രിയ ആസ്തിയായി (NPA) പ്രഖ്യാപിച്ചു.

    2018ല്‍, ഭൂഷണ്‍ പവര്‍ ആന്‍ഡ് സ്റ്റീല്‍ ലിമിറ്റഡ് കമ്പനി ധനകാര്യ സ്ഥാപനങ്ങള്‍ ഉള്‍പ്പെടെ 33 വ്യത്യസ്ത ബാങ്കുകളില്‍ നിന്ന് വായ്പാ എടുത്തിട്ടുണ്ടെന്ന് കാണിച്ച് സിബിഐ എഫ്ഐആര്‍ ഫയല്‍ ചെയ്തു. ഭൂഷണ്‍ പവര്‍ ആന്‍ഡ് സ്റ്റീല്‍ ലിമിറ്റഡ്, ബാങ്കുകള്‍ക്ക് വായ്പ തിരിച്ചടക്കുന്നതില്‍ ബോധപൂര്‍വം വീഴ്ച വരുത്തിയെന്നും എഫ്ഐആറിൽ ആരോപിച്ചു.

    അതേസമയം, 2019-ല്‍ സിബിഐ സമര്‍പ്പിച്ച എഫ്ഐആറിന്റെ അടിസ്ഥാനത്തില്‍ ഇഡി കള്ളപ്പണം വെളുപ്പിക്കൽ സംബന്ധിച്ച് അന്വേഷണം ആരംഭിച്ചു. കമ്പനി വ്യാജ രേഖകളിലൂടെയും അക്കൗണ്ടുകളിലൂടെയും ബാങ്ക് ഫണ്ടുകള്‍ ദുരുപയോഗം ചെയ്തുവെന്ന് എൻഫോഴ്സ്മെന്റ് ഡയറക്ടറേറ്റ് കൂട്ടിച്ചേര്‍ത്തു. കുടുംബത്തിന് ആസ്തികൾ വാങ്ങുന്നതിനായി ബിപിഎസ്എൽ (ഭൂഷണ്‍ പവര്‍ ആന്‍ഡ് സ്റ്റീല്‍ ലിമിറ്റഡ്) ഫണ്ട് വകമാറ്റിയതായും ഏജൻസികൾ വ്യക്തമാക്കി.

    പിന്നീട് 2021 മാര്‍ച്ചില്‍, ഭൂഷണ്‍ പവര്‍ ആന്‍ഡ് സ്റ്റീല്‍ ലിമിറ്റഡിനെ ജെഎസ്ഡബ്ല്യൂ സ്റ്റീല്‍ ഏറ്റെടുത്തു. എന്നാല്‍ എസ്എഫ്‌ഐഒ, സിബിഐ എന്‍ഫോഴ്‌സ്‌മെന്റ് ഡയറക്ടറേറ്റ് തുടങ്ങിയ ഏജന്‍സികള്‍ കമ്പനിയുടെ ക്രമക്കേടുകളില്‍ അന്വേഷണം തുടരുകയാണ്.
    Published by:Jayesh Krishnan
    First published: