കണ്ണൂരിൽ ലോറി ക്ലീനറെ ഡ്രൈവർ ജാക്കിലിവർ കൊണ്ടടിച്ചുകൊന്നു; ഇരുവരും കൊല്ലം പത്താനാപുരം സ്വദേശികൾ

കണ്ണൂര്‍: ലോറി ഡ്രൈവര്‍ ക്ളീനറെ ജാക്കിലിവര്‍ കൊണ്ടടിച്ചുകൊന്നു. കണ്ണൂര്‍ പേരാവൂര്‍ പൊലീസ് സ്റ്റേഷന്‍ പരിധിയില്‍ നിടുംപൊയിലിന് സമീപം മാനന്തവാടി ചുരത്തില്‍ ചൊവ്വാഴ്ച പുലര്‍ച്ചെ 4.30 ഓടെയാണ് സംഭവം.

കൊല്ലം പത്തനാപുരം സ്വദേശി സിദ്ദിഖാണ് (28) കൊല്ലപ്പെട്ടത്. മൃതദേഹം റോഡരികില്‍ ഉപേക്ഷിച്ച്‌ പോയ ലോറി ഡ്രൈവര്‍ പത്തനാപുരം സ്വദേശി നിഷാദ് (29) കണ്ണവം പൊലീസ് സ്റ്റേഷനില്‍ കീഴടങ്ങിയിട്ടുണ്ട്.

ആന്ധ്രയില്‍ നിന്ന് സിമന്റ് ലോഡുമായി കൂത്തുപറമ്പിലേക്ക് വരികയായിരുന്ന ലോറിയിലെ ജീവനക്കാരാണ് സിദ്ദിഖും നിഷാദും. ഇരുവരും തമ്മില്‍ വാക്കേറ്റം ഉണ്ടാവുകയും സിദിഖിനെ ജാക്കിലിവര്‍ കൊണ്ട് നിഷാദ് അടിക്കുകയുമായിരുന്നുവെന്ന് പൊലീസ് പറഞ്ഞു. മൃതദേഹം പേരാവൂര്‍ താലൂക്കാശുപത്രി മോർച്ചറിയിലേക്ക് മാറ്റി.

Also Read- മദ്യപിച്ച് യുവാക്കൾ ഗ്ലാസ് വലിച്ചെറിഞ്ഞു; ചോദ്യം ചെയ്ത ആളെ മര്‍ദിച്ചു കൊലപ്പെടുത്തി

പൊലീസ് സ്ഥലത്തെത്തി മേൽനടപടികൾ സ്വീകരിച്ചശേഷമാണ് മൃതദേഹം പേരാവൂർ ആശുപത്രിയിലേക്ക് മാറ്റിയത്. പോസ്റ്റുമോർട്ടം നടപടികൾ പൂർത്തിയാക്കിയശേഷം മൃതദേഹം ബന്ധുക്കൾക്ക് വിട്ടുനൽകും. സംഭവം അറിഞ്ഞ് സിദ്ദിഖിന്‍റെ ബന്ധുക്കൾ പത്തനാപുരത്തുനിന്ന് കണ്ണൂരിലേക്ക് തിരിച്ചിട്ടുണ്ട്. നിഷാദിനെ ഇന്നുതന്നെ കോടതിയിൽ ഹാജരാക്കുമെന്ന് പൊലീസ് വൃത്തങ്ങൾ അറിയിച്ചു.