ആക്രി കച്ചവടത്തിന്‍റെ മറവില്‍ ആളൊഴിഞ്ഞ വീട്ടില്‍ മോഷണം; 8 അതിഥി തൊഴിലാളികള്‍ അറസ്റ്റില്‍

ആലപ്പുഴ ഹരിപ്പാട് ആക്രികച്ചവടത്തിന്‍റെ മറവില്‍ ആളൊഴിഞ്ഞ വീട് കുത്തിതുറന്ന് മോഷണം നടത്തിയ 8 അതിഥി തൊഴിലാളികള്‍ അറസ്റ്റില്‍. ചിങ്ങോലി  12-ാം വാർഡിലെ ആളൊഴിഞ്ഞ വീട്ടിൽ 2022 നവംബറിലാണ് സംഘം മോഷണം നടന്നത്. പുറകുവശത്തെ അടുക്കള വാതിൽ കുത്തിതുറന്ന് അകത്തുകയറി മോഷ്ടാക്കള്‍ ബാത്ത് റൂം ഫിറ്റിങ്ങുകളും ഇൻവെർട്ടറും ബാറ്ററിയും ചെമ്പ് പാത്രങ്ങളും ഉൾപ്പെടെ 70,000 രൂപയുടെ സാധനങ്ങളാണ് മോഷ്ടിച്ചത്.

Also Read – ഡല്‍ഹി എയര്‍പോര്‍ട്ടിലെത്തിയ വിമാനത്തിൻ്റേ ടോയ്‌ലറ്റിൽനിന്ന് കണ്ടെടുത്തത് രണ്ടുകോടിയുടെ സ്വര്‍ണം

മുട്ടം ഭാഗത്ത് ആക്രി കച്ചവടം നടത്തി വന്നിരുന്ന ഉത്തർപ്രദേശിലെ മൊറാദാബാദ് ജില്ലയിൽ അസ്സലാപുര ഗുൽഷൻ നഗറിൽ ജസീം ഖാൻ (23), ഡൽഹി സൗത്ത് ശ്രീനിവാസപുരി ന്യൂ ഫ്രഷ് കോളനിയിൽ മുഹമ്മദ്‌ ഫരൂഖ് (53), ഉത്തര്‍പ്രദേശ് മൊറാദാബാദ് ജില്ലയിൽ തെക്കേ ധർവാലി മസ്ജിദ് സെയ്ദ് (26), ഉത്തർപ്രദേശ് ഗൗതമ ബുദ്ധ നഗറിൽ ബി 16 ബുദ്ധ നഗർ അർജുൻ (19), ഡൽഹി സൗത്ത് ശ്രീനിവാസപുരി ഇന്ദിര ക്യാമ്പ് 2 ൽ ന്യൂ ഫ്രഷ് കോളനിയിൽ ആബിദ് അലി (28) എന്നിവരെയും മുട്ടം ഭാഗത്ത് മാർച്ച്‌ 2ന് രാത്രി 10.45ന് വീടുകളിൽ മോഷണം നടത്തുന്നതിനായി സ്ക്രൂ ഡ്രൈവർ, ചാക്ക് തുടങ്ങിയവയുമായി തയ്യാറെടുത്തു പതുങ്ങി നിന്ന ഉത്തർപ്രദേശ്  ഗാസിയബാദ് ജില്ലയിൽ മകൻ ആകാശ് (18), ഡൽഹി സംസ്ഥാനത്തു ചത്തർപ്പൂർ ദേശത്തു  ജുനൈദ് (27), ഉത്തർപ്രദേശ് സംസ്ഥാനത്തു ഗാസിയബാദ് ജില്ലയിൽ   സൂരജ് സൈനി (18) എന്നിവരെയുമാണ് പൊലീസ് പിടികൂടിയത്.

Also Read-വാതിലിന് അടുത്ത് ചെരുപ്പ് വെച്ചതിന് അയൽക്കാരനെ ദമ്പതികൾ കൊലപ്പെടുത്തി

ജില്ലാ പോലീസ് മേധാവി ചൈത്ര തെരേസ ജോണിന്റെ നിർദ്ദേശ പ്രകാരം കായംകുളം ഡി. വൈ. എസ്. പി അജയനാഥിന്റെ മേൽനോട്ടത്തിൽ കരീലകുളങ്ങര പൊലീസ് സബ് ഇൻസ്‌പെക്ടർ സുനുമോൻ, എസ്. ഐ മാരായ ഷമ്മി, സുരേഷ്, എ. എസ്. ഐ പ്രദീപ്‌, എസ്. സി. പി. ഒ മാരായ സുനിൽ, സജീവ്, വിനീഷ്, അനിൽ, ശ്യാംകുമാർ, സി. പി. ഒ മാരായ ഷമീർ, മണിക്കുട്ടൻ, അരുൺ, മനോജ്‌, വരുൺ എന്നിവർ ചേർന്ന് നാട്ടുകാരുടെ സഹായത്തോടെയാണ് പ്രതികളെ പിടികൂടിയത്.

കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. കഴിഞ്ഞ ദിവസം സംശയാസ്പദമായ രീതിയിൽ കണ്ട ഇവരെ നാട്ടുകാർ തടഞ്ഞു വെച്ച് പൊലീസിൽ ഏൽപ്പിക്കുകയായിരുന്നു. തുടർന്ന് നടത്തിയ ചോദ്യം ചെയ്യലിലാണ് പഴയ മോഷണക്കേസ് തെളിഞ്ഞതും ബാക്കി പ്രതികളെ പിടികൂടിയതും.