മകന്റെ ചവിട്ടേറ്റ് വാരിയെല്ലുകൾ ഒടിഞ്ഞ പിതാവ് മരിച്ചു; 6 വാരിയെല്ലുകൾ തകർന്നു; ആന്തരികാവയവങ്ങൾക്ക് ക്ഷതമേറ്റു

കോട്ടയം: മകന്റെ ചവിട്ടേറ്റ് വാരിയെല്ലുകൾ ഒടിഞ്ഞ് ഗുരുതരമായി പരിക്കേറ്റ പിതാവ് മരിച്ചു. കറുകച്ചാൽ ശാന്തിപുരം റൈട്ടൻകുന്ന് ചക്കുങ്കൽ കൊച്ചൂട്ടി എന്ന് വിളിക്കുന്ന ജോൺ ജോസഫ് (65) ആണ് മരിച്ചത്. ചെത്തിപ്പുഴയിലെ സ്വകാര്യ ആശുപത്രിയിൽ ചികിത്സയിലിരിക്കെ വ്യാഴാഴ്ച പുലർച്ചെയാണ് മരണം. കറുകച്ചാൽ പൊലീസ് കസ്റ്റഡിയിലെടുത്ത മകൻ ജോസി ജോണിനെ (37) കോടതി റിമാൻഡ് ചെയ്തു.

Also Read- രാത്രി ഭക്ഷണം ഉണ്ടാക്കാൻ സഹായം ചോദിച്ച ഭാര്യയ്ക്ക് നേരെ ഭർത്താവിന്റെ ആക്രമണം

റബർ ടാപ്പിങ് തൊഴിലാളിയായിരുന്നു ജോൺ.‍ ഇരുവൃക്കകളും തകരാറിലായതോടെ മൂന്നുവർഷമായി ഡയാലിസിസ് ചെയ്താണ് കഴിഞ്ഞിരുന്നത്. ഞായറാഴ്ച രാവിലെ 11നായിരുന്നു ക്രൂരമായ മർദനത്തിന് ഇരയായത്. മദ്യപിച്ചെത്തിയ ജോസി അച്ഛനെയും തടയാനെത്തിയ അമ്മ അന്നമ്മ (62)യെയും മർദിച്ചെന്നാണ് പൊലീസ് കേസ്.

Also Read- ആലപ്പുഴയിൽ വൻ ബാങ്ക് കവർച്ച; മോഷ്ടിച്ചത് 22 ലക്ഷത്തോളം രൂപയുടെ സ്വർണ്ണവും നാലര ലക്ഷം രൂപയും

ജോണിനെ കട്ടിലിൽ നിന്നു വലിച്ച് നിലത്തിട്ട് വയറിൽ ചവിട്ടുകയായിരുന്നു. ജോണിന്റെ ആറുവാരിയെല്ലുകൾ ചവിട്ടേറ്റ് ഒടിഞ്ഞു. ആന്തരികാവയവങ്ങൾക്കും ഗുരുതരമായി പരിക്കേറ്റു. രക്തസ്രാവവുമുണ്ടായി. ഉടൻ ശസ്ത്രക്രിയ നടത്തിയെങ്കിലും രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനു ശേഷം ബന്ധുക്കൾക്ക് വിട്ടുനൽകും. സംസ്കാരം പിന്നീട് കൂത്രപ്പള്ളി സെന്റ് മേരീസ് പള്ളിയിൽ.