റിയാലിറ്റി ഷോ താരവും സുഹൃത്തും ലഹരി മരുന്നുമായി പിടിയിൽ; പിടിച്ചെടുത്തത് ഒരു ലക്ഷം രൂപ വിലവരുന്ന എം.ഡി.എം.എ

മംഗളൂരു: റിയാലിറ്റി ഷോ താരവും നൃത്തസംവിധായകനും സുഹൃത്തും ലഹരിമരുന്നുമായി പിടിയിൽ.കിഷോർ അമൻ ഷെട്ടി(30), സുഹൃത്ത് അഖീൽ നൗഷീൽ(28) എന്നിവരാണ് മയക്ക് മരുന്നുമായി മംഗളൂരു സിറ്റി പൊലീസിന്റെ പിടിയിലായത്. ഇവരിൽനിന്ന് ഒരുലക്ഷം രൂപ വിലവരുന്ന എം.ഡി.എം.എ. ലഹരിമരുന്നുകളും പിടിച്ചെടുത്തു.

ലഹരി മരുന്ന് ഉപയോഗിച്ചിരുന്ന ഇരുവരും വിൽപന നടത്തിയിരുന്നതായും പൊലീസ് കണ്ടെത്തിയിട്ടുണ്ട്. മുംബൈയിൽനിന്നാണ് ഇവർ ലഹരിമരുന്ന് എത്തിച്ചിരുന്നത്. ബോളിവുഡിലെ ലഹരിമരുന്ന് സംഘവുമായി പ്രതികൾക്ക് ബന്ധമുള്ളതായി സംശയിക്കുന്നതായി മംഗളൂരു സിറ്റി പോലീസ് കമ്മീഷണർ വികാഷ് കുമാർ വികാഷ് പറഞ്ഞു.

ഡാൻസ് ഇന്ത്യ ഡാൻസ് എന്ന റിയാലിറ്റി ഷോയിലൂടെ ശ്രദ്ധിക്കപ്പെട്ട കിഷോർ എബിസിഡി എന്ന ഹിന്ദി സിനിമയുമായി ബന്ധപ്പെട്ടും പ്രവർത്തിച്ചിട്ടുണ്ട്. ദുബായിൽ സെയിൽസ് ഓഫീസറായി ജോലിചെയ്തിരുന്ന അഖീൽ നൗഷീൽ ഒരു വർഷം മുമ്പാണ് തിരികെ നാട്ടിലെത്തിയത്.