HOME » NEWS » Crime » NRI MAN WAS HACKED TO DEATH AND BURIED NEAR A RELATIVES HOUSE IN KOLLAM

പ്രവാസിയെ വീട്ടിലേക്കു വിളിച്ചുവരുത്തി വെട്ടിക്കൊന്നു, ബന്ധുവീടിന് സമീപം കുഴിച്ചിട്ടു; കൊല്ലത്ത് രണ്ടുപേർ അറസ്റ്റിൽ

മുമ്പ് ഗൾഫിൽ ഒരുമിച്ച് ജോലി ചെയ്തിട്ടുള്ളവരാണ് ഷറഫുദ്ദീനും ഹാഷിമും. ആ സമയത്ത് ഷറഫുദ്ദീന് ഹാഷിം 20000 രൂപ കടമായി നൽകിയിരുന്നു

News18 Malayalam | news18-malayalam
Updated: April 5, 2021, 3:25 PM IST
പ്രവാസിയെ വീട്ടിലേക്കു വിളിച്ചുവരുത്തി വെട്ടിക്കൊന്നു, ബന്ധുവീടിന് സമീപം കുഴിച്ചിട്ടു; കൊല്ലത്ത് രണ്ടുപേർ അറസ്റ്റിൽ
News18 Malayalam
  • Share this:
കൊല്ലം: പ്രവാസിയായ മദ്ധ്യവയസ്ക്കനെ വീട്ടിലേക്കു വിളിച്ചു വരുത്തി വെട്ടിക്കൊന്ന ശേഷം ബന്ധു വീടിന് സമീപം കുഴിച്ചിട്ടു. കൊല്ലം ജില്ലയിലെ പൂയപ്പള്ളി പൊലീസ് സ്റ്റേഷൻ പരിധിയിൽ ഓയൂർ കരിങ്ങന്നൂർ ആറ്റൂർകോണത്താണ് സംഭവം. ആറ്റൂര്‍കോണം പള്ളിവടക്കതില്‍ ഹാഷിം(56) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ആറ്റൂര്‍കോണം സ്വദേശിയായ ഷറഫുദ്ദീന്‍, നിസാം എന്നിവരെ പൂയപ്പള്ളി പൊലീസ് അറസ്റ്റ് ചെയ്തു.

സംഭവത്തെ കുറിച്ച് പൊലീസ് പറയുന്നത് ഇങ്ങനെ, ഹാഷിമിനെ കാണാനില്ലെന്ന് കാട്ടി ഇക്കഴിഞ്ഞ ഏപ്രിൽ രണ്ടിനാണ് ബന്ധുക്കൾ പൂയപ്പള്ളി പൊലീസിൽ പരാതി നൽകിയത്. മാർച്ച് 31ന് രാത്രി മുതൽ ഹാഷിമിനെ കാണാനില്ലെന്നായിരുന്നു പരാതിയിൽ പറഞ്ഞിരുന്നത്. തുടർന്നു നടത്തിയ അന്വേഷണത്തിലാണ് ഷറഫുദ്ദീനും നിസാമും പിടിയിലാകുന്നത്. ഇവരെ ചോദ്യം ചെയ്തതിൽനിന്ന് ചാരായം നൽകാമെന്ന് വീട്ടിലേക്കു വിളിച്ചു വരുത്തുകയും മദ്യം നൽകിയ ശേഷം കൊടുവാളിന് ഷറഫുദ്ദീൻ ഹാഷിമിനെ കൊലപ്പെടുത്തുകയുമായിരുന്നു. അതിനു ശേഷം മൃതദേഹം മറവു ചെയ്യാനാണ് സുഹൃത്തായ നിസാമിന്‍റെ സഹായം ഷറഫുദ്ദീൻ തേടിയത്.

മുമ്പ് ഗൾഫിൽ ഒരുമിച്ച് ജോലി ചെയ്തിട്ടുള്ളവരാണ് ഷറഫുദ്ദീനും ഹാഷിമും. ആ സമയത്ത് ഷറഫുദ്ദീന് ഹാഷിം 20000 രൂപ കടമായി നൽകിയിരുന്നു. ലോക്ക് ഡൌൺ കാലത്ത് ജോലി നഷ്ടപ്പെട്ട് ഇരുവരും നാട്ടിലെത്തിയതോടെ ഷറഫുദ്ദീനോട് ഹാഷിം പണം തിരികെ ആവശ്യപ്പെട്ടു. കാണുമ്പോഴൊക്കെ പോക്കറ്റിൽ നിന്ന് അഞ്ഞൂറും ആയിരവും ഹാഷിം എടുത്തുകൊണ്ടുപോകുന്നതും പതിവായി. മുമ്പ് ചില ക്രിമിനൽ കേസുകളിൽ പ്രതിയായിരുന്ന ഹാഷിമിനോട് എതിർത്തു നിൽക്കാനുള്ള ധൈര്യം ഷറഫുദ്ദീന് ഇല്ലായിരുന്നു. ഇതോടെയാണ് ഹാഷിമിനെ തന്ത്രപരമായി വിളിച്ചുവരുത്തി കൊലപ്പെടുത്താൻ ഷറഫുദ്ദീൻ തീരുമാനിച്ചത്.

ഇതുപ്രകാരമാണ് മാർച്ച് 31ന് വാറ്റു ചാരായം നൽകാമെന്ന് പറഞ്ഞു ഹാഷിമിനെ ഷറഫുദ്ദീൻ വിളിച്ചു വരുത്തുന്നത്. ഷറഫുദ്ദീന്‍റെ വീട്ടിൽ ചാരായം വാറ്റുന്നത് പതിവായിരുന്നു. അമിതമായി മദ്യപിച്ച് അർദ്ധോധാവസ്ഥയിലായതോടെ ഹാഷിമിനോട് അവിടെ കിടക്കാമെന്നും വീട്ടിലേക്കു രാവിലെ പോകാമെന്നും ഷറഫുദ്ദീൻ ആവശ്യപ്പെടുകയായിരുന്നു. ഉറക്കത്തിനിടെയാണ് കൊടുവാൾ കൊണ്ട് ഷറഫുദ്ദീൻ ഹാഷിമിനെ വെട്ടിക്കൊന്നത്. മരണം ഉറപ്പാക്കിയ ശേഷം നിസാമിനെ വിളിച്ചു വരുത്തിയ ശേഷം സമീപത്തുള്ള ബന്ധു വീടിന്‍റെ പിൻവശത്ത് വലിയ കുഴിയെടുത്ത് മൃതദേഹം അതിൽ ഇട്ടു മൂടുകയായിരുന്നു.

Also Read- അബദ്ധത്തിൽ വെടിയേറ്റ് സുഹൃത്ത് കൊല്ലപ്പെട്ടു; കുറ്റബോധം താങ്ങാനാകാതെ മൂന്ന് യുവാക്കൾ വിഷം കഴിച്ചു മരിച്ചു

സംഭവം മറ്റാരും അറിയില്ലെന്ന മട്ടിൽ മുന്നോട്ടു പോകുന്നതിനിടെയാണ് ഷറഫുദ്ദീനെ പൊലീസ് കസ്റ്റഡിയിലെടുക്കുന്നത്. ഹാഷിമിന്‍റെ ബന്ധുക്കൾ നൽകിയ പരാതിയിൽ ആരംഭിച്ച അന്വേഷണത്തിന്‍റെ ഭാഗമായി പൊലീസ് നായ മണംപിടിച്ച് ഷറഫുദ്ദീന്‍റെ വീട്ടിൽ എത്തുകയായിരുന്നു. തുടർന്നു നടത്തിയ ചോദ്യം ചെയ്യലിലാണ് ഷറഫുദ്ദീൻ കൊലപാതക കുറ്റം സമ്മതിച്ചത്. തുടർന്ന് മൃതദേഹം മറവു ചെയ്ത സ്ഥലവും ഷറഫുദ്ദീൻ കാണിച്ചു കൊടുത്തു. സഹായിയായ നിസാമിനെയും പൊലീസ് അറസ്റ്റു ചെയ്തു.

കൊട്ടാരക്കര ഡി വൈ എസ് പിയുടെ നേതൃത്വത്തിൽ മൃതദേഹം ഇന്നു പുറത്തെടുക്കും. ഫോറൻസിക് വിദഗ്ദ്ധരും സ്ഥലത്തെത്തിയിട്ടുണ്ട്. മൃതദേഹം പോസ്റ്റുമോർട്ടത്തിനായി തിരുവനന്തപുരം മെഡിക്കൽ കോളേജിലേക്കു കൊണ്ടു പോകുമെന്ന് പൂയപ്പള്ളി പൊലീസ് അറിയിച്ചു.
Published by: Anuraj GR
First published: April 5, 2021, 3:25 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories