പീഡന കേസ് പ്രതി ഡാമിൽ ചാടി; പൊലീസും നാട്ടുകാരും ചേർന്ന് സാഹസികമായി പിടികൂടി

കൽപ്പറ്റ: വയനാട്ടിൽ ഡാമിൽ ചാടി രക്ഷപെടാൻ ശ്രമിച്ച പീഡന കേസ് പ്രതിയെ പോലീസും നാട്ടുകാരും ചേർന്ന് സാഹസികമായി പിടികൂടി. പീഡന കേസിൽ പ്രതിയായ തിരൂർ കൊടിയച്ചൻ വീട്ടിൽ നഹീം(28)നെയാണ് അമ്പലവയൽ എസ് ഐ. വേണുഗോപാലും നാട്ടുകാരും ചേർന്ന് പിടികൂടിയത്.

പീഡനകേസിൽ പ്രതിയായ ഇയാൾ അമ്പലവയൽ കാരാപ്പുഴ ഡാമിനോട് ചേർന്ന നെല്ലറച്ചാലിലെ റിസോർട്ടിൽ അഞ്ച് ദിവസമായി ഒളിവിൽ കഴിക്കുകയായിരുന്നു. തിരൂർ സി.ഐ ഹർഷദിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പൊലീസ് സംഘം സ്ഥലത്തെത്തിയത്.

എന്നാൽ പോലീസിനെ കണ്ടതോടെ ഇറങ്ങിയോടിയ പ്രതി സമീപത്തു തന്നെയുള്ള കാരാപ്പുഴ ഡാം റിസർവേയറിലേക്ക് ചാടുകയായിരുന്നു. തുടർന്ന് നാട്ടുകാരും പോലീസും ചേർന്ന് സാഹസികമായി ഇയാളെ പിടികൂടുകയായിരുന്നു.