പശുവിറച്ചി കൈവശം വെച്ചെന്നാരോപിച്ച് രണ്ട് മുസ്ലിം യുവാക്കളെ തല്ലിച്ചതച്ചു; അഞ്ച് അക്രമികൾ അറസ്റ്റിൽ

ഭോപ്പാൽ: പശുവിറച്ചി കൈവശംവെച്ചെന്നാരോപിച്ച് രണ്ട് മുസ്ലിം യുവാക്കളെ ഗോരക്ഷ പ്രവർത്തകർ തല്ലിച്ചതച്ചു. മധ്യപ്രദേശിലെ സിയോനിയിലാണ് സംഭവം. സംഭവവുമായി ബന്ധപ്പെട്ട് അഞ്ച് ഗോരക്ഷ പ്രവർത്തകരെ പൊലീസ് അറസ്റ്റ് ചെയ്തു.

also read: BREAKING- ശബരിമല ബാധിച്ചില്ല; ശൈലി തുടരും; തിരിച്ചറിയാനാകാത്ത ഘടകങ്ങൾ ഉണ്ടായി; രാജി ആവശ്യം തളളി മുഖ്യമന്ത്രി

വെള്ളിയാഴ്ചയാണ് സംഭവം ഉണ്ടായത്. പശുവിറച്ചി കൈവശം വെച്ചെന്നാരോപിച്ച് നടു റോഡിൽ വെച്ചാണ് ഇവരെ ആക്രമിച്ചത്. വടികൊണ്ട് ക്രൂരമായി തല്ലിച്ചതയ്ക്കുകയായിരുന്നുവെന്ന് പൊലീസ് പറഞ്ഞു. അക്രമികളിൽ ഒരാൾ രാം സേന നേതാവ് ശുഭം ബാഘലാണെന്ന് തിരിച്ചറിഞ്ഞിട്ടുണ്ട്. സംഭവത്തിൽ അന്വേഷണം ആരംഭിച്ചിട്ടുണ്ട്.

ഒരു സ്ത്രീയെയും രണ്ട് പുരുഷന്മാരെയും ബാഘൽ തടഞ്ഞു നിർത്തി. എന്നിട്ട് ബാഘലും സുഹൃത്തുക്കളും ചേർന്ന് രണ്ട് പുരുഷന്മാരെയും തല്ലിച്ചതച്ചു. സംഭവത്തിന്റെ വീഡിയോ വൈറലായിട്ടുണ്ട്. പ്രതികൾക്കെതിരെ കേസ് രജിസ്റ്റർ ചെയ്തിട്ടുണ്ട്. ഇതിൽ അഞ്ചു പേർ അറസ്റ്റിലായി. എല്ലാവരെയും ഉടൻ ജുഡീഷ്യൽ കസ്റ്റഡിയിൽ വിടും- പൊലീസ് പറഞ്ഞു.

അതേസമയം മർദനത്തിനിരയായവരെയും പൊലീസ് അറസ്റ്റ് ചെയ്തു. പശുവിറച്ചി കടത്തിയതിന് ഗോവധ നിരോധന നിയമ പ്രകാരമാണ് ഇവരെ അറസ്റ്റ് ചെയ്തത്. തൗഫീഖ്, അൻജും ഷാമ, ദിലീപ് മാൽവിയ എന്നിവരാണ് അറസ്റ്റിലായത്. ഇവരെ ജുഡീഷ്യൽ കസ്റ്റഡിയിൽ വിട്ടു.