വീട്ടിൽ ഓൺലൈൻ ക്ലാസെടുക്കുന്നതിനിടയിൽ അതിക്രമിച്ചെത്തിയ സംഘം അധ്യാപകനെ കഴുത്തു ഞെരിച്ചു കൊന്നു

വീട്ടിൽ അതിക്രമിച്ചെത്തിയ ഇരുവർ സംഘം യുവാവിനെ കഴുത്ത് ഞെരിച്ചു കൊന്നു. ഉത്തർപ്രദേശിലെ ഗോണ്ട ജില്ലയിലാണ് സംഭവം. സ്വകാര്യ സ്കൂളിലെ അധ്യാപകനായ കൃഷ്ണകുമാർ യാദവ് ( 32) ആണ് കൊല്ലപ്പെട്ടത്. കൃഷ്ണകുമാർ യാദവ് ഓൺലൈൻ ക്ലാസ് നടത്തുന്നതിനിടയിലാണ് സംഘം വീട്ടിൽ അതിക്രമിച്ചു കയറി കൊലപ്പെടുത്തിയത്.

ഓൺലൈൻ ക്ലാസിന് ഉപയോഗിച്ചിരുന്ന ഫോണിൽ രണ്ടു പേർ വീട്ടിലേക്ക് എത്തുന്നതും കൃഷ്ണകുമാറുമായി തർക്കമുണ്ടാകുന്നതും ഒടുവിൽ കൊലപ്പെടുത്തുന്നതുമെല്ലാം റെക്കോർഡ് ചെയ്തിരുന്നു. കൊലപാതകികളെ കണ്ടെത്താൻ പൊലീസിനെ സഹായിച്ചത് ഈ വീഡിയോ ആണ്.
Also Read- കൊല്ലം കടയ്ക്കലിൽ വീട്ടമ്മ റബ്ബർ മരത്തിൽ തൂങ്ങിമരിച്ച നിലയിൽ കണ്ട സംഭവം കൊലപാതകമെന്ന് ബന്ധുക്കൾ

ഉത്തർപ്രദേശിലെ അംബേദ്കർനഗർ സ്വദേശിയാണ് കൃഷ്ണകുമാർ യാദവ്. സഹോദരിക്കൊപ്പം വാടക വീട്ടിലാണ് ഇയാൾ കഴിഞ്ഞിരുന്നത്. സഹോദരിയും അധ്യാപികയാണ്. ശനിയാഴ്ച്ച വൈകിട്ടാണ് കൊലപാതകം നടന്നതെന്ന് പൊലീസ് പറയുന്നു. ഈ സമയത്ത് വീട്ടിൽ കൃഷ്ണകുമാർ തനിച്ചായിരുന്നു. മുറിയിലിരുന്ന് ഓൺലൈൻ ക്ലാസ് ന‌ടത്തുകയായിരുന്നു കൃഷ്ണകുമാർ. സംഭവത്തിൽ രണ്ട് പ്രതികളേയും പിടികൂടിയതായും പൊലീസ് അറിയിച്ചു.
Also Read- പ്ലേ സ്കൂളിൽ പോയില്ലെന്ന് പറഞ്ഞ് മൂന്ന് വയസുകാരിയെ ക്രൂരമായി മര്‍ദിച്ച കേസിൽ മുത്തശ്ശിയും അച്ഛനും അറസ്റ്റിൽ

കൃഷ്ണകുമാറിന്റെ സഹോദരിയുമായി പ്രണയത്തിലായിരുന്ന യുവാവാണ് കൊലപാതകത്തിനു പിന്നിലെന്നാണ് സൂചന. സന്ദീപ് യാദവ്, ജവഹിർ മിശ്ര എന്നിവരാണ് പിടിയിലായത്. കൃഷ്ണകുമാറിന്റെ സഹോദരിയുമായി താൻ പ്രണയത്തിലായിരുന്നുവെന്നും ഈ ബന്ധം കൃഷ്ണകുമാർ എതിർത്തതാണ് കൊലപാതകത്തിനു കാരണമെന്നുമാണ് സന്ദീപ് പൊലീസിന് നൽകിയ മൊഴി.

വീട്ടിൽ അതിക്രമിച്ചെത്തിയ സന്ദീപും ജവഹിർ മിശ്രയും വാക്കുതർക്കത്തിനൊടുവിലാണ് കഴുത്തു ഞെരിച്ചു കൊലപാതകം നടത്തിയത്. കൃഷ്ണകുമാറിനെ കൊലപ്പെടുത്താൻ സന്ദീപ് സുഹൃത്തായ ജവഹിർ മിശ്രയുടെ സഹായം തേടുകയായിരുന്നു.