• HOME
  • »
  • NEWS
  • »
  • crime
  • »
  • Dileep case | വധശ്രമ ഗൂഡാലോചനക്കേസില്‍ ദിലീപിന് മുന്നിൽ സങ്കീർണ്ണതകൾ ഏറുന്നു; നിര്‍ണ്ണായക ചാറ്റുകള്‍ നശിപ്പിച്ചതിന്റെ തെളിവുകള്‍ പുറത്ത്

Dileep case | വധശ്രമ ഗൂഡാലോചനക്കേസില്‍ ദിലീപിന് മുന്നിൽ സങ്കീർണ്ണതകൾ ഏറുന്നു; നിര്‍ണ്ണായക ചാറ്റുകള്‍ നശിപ്പിച്ചതിന്റെ തെളിവുകള്‍ പുറത്ത്

ദിലീപിന്റെ ഒരു ഫോണില്‍ നിന്നുമാത്രം 12 വ്യത്യസ്ത നമ്പറുകളിലേക്കുള്ള ചാറ്റുകൾ ഡിലീറ്റ് ചെയ്തു എന്ന് കണ്ടെത്തൽ

ദിലീപ്

ദിലീപ്

  • Share this:
കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ വധിയ്ക്കാന്‍ ഗൂഡാലോചന നടത്തിയെന്ന കേസില്‍ (conspiracy case) നടന്‍ ദിലീപ് (actor Dileep) അടക്കമുള്ള പ്രതികള്‍ക്ക് കുരുക്കായി ഡിജിറ്റല്‍ തെളിവുകള്‍. ദിലീപിന്റെയും സഹോദരന്‍ ശിവകുമാറിന്റെയും (അനൂപ്) സഹോദരീ ഭര്‍ത്താവ് സൂരജിന്റെയുമടക്കം ഫോണുകളിലെ വാട്‌സാപ്പ് ചാറ്റുകള്‍ ബോധപൂര്‍വ്വം ഡിലീറ്റ് ചെയ്തതായി ക്രൈംബ്രാഞ്ച് കണ്ടെത്തി. ദിലീപിന്റെ ഒരു ഫോണില്‍ നിന്നുമാത്രം 12 വ്യത്യസ്ത നമ്പറുകളിലേക്കുള്ള ചാറ്റുകളാണ് ഡിലീറ്റ് ചെയ്തിട്ടുള്ളത്.

നടിയെ ആക്രമിച്ച കേസുമായി ബന്ധപ്പെട്ട നിർണ്ണായക സാക്ഷികളടക്കമുള്ളവരാണ് ഇവര്‍. ജനുവരി 30ന് ഉച്ചക്ക് 1.30നും 2.30നും ഇടയിലാണ് തെളിവുകള്‍ നശിപ്പിക്കപ്പെട്ടത്. ജനുവരി 31ന് ഫോണുകള്‍ കൈമാറാനായിരുന്നു ഹൈക്കോടതി ഉത്തരവിട്ടത്. ഇതിന് ഒരു ദിവസം മുമ്പാണ് തെളിവായേക്കുമെന്ന് കരുതുന്ന സന്ദേശങ്ങള്‍ നശിപ്പിക്കപ്പെട്ടത്. നശിപ്പിച്ച ചാറ്റുകള്‍ വീണ്ടെടുക്കാന്‍ ഫൊറന്‍സിക് സയന്‍സ് ലാബിന്റെ സഹായം ക്രൈംബ്രാഞ്ച് തേടിയിട്ടുണ്ട്. ഫോറന്‍സിക് റിപ്പോര്‍ട്ട് രണ്ട് ദിവസത്തിനകം ക്രൈം ബ്രാഞ്ചിന് ലഭയ്ക്കുമെന്നാണ് വിവരങ്ങള്‍.

മൊബൈല്‍ ഫോണുകളിലെ തെളിവുകള്‍ മുംബൈയിലെ ലാബില്‍ വെച്ച് നശിപ്പിച്ചതിന്റെ മിറര്‍ കോപ്പി ക്രൈം ബ്രാഞ്ച് നേരത്തെ കണ്ടെത്തിയിരുന്നു. ഫോറന്‍സിക് ലാബില്‍ നടത്തിയ പരിശോധനയിലാണ് നിർണ്ണായക രേഖകള്‍ കണ്ടെടുത്തത്. മുംബൈയിലെ ലാബ് സിസ്റ്റം ഇന്ത്യാ ലിമിറ്റഡില്‍ നിന്നും ഫോണിലെ വിവരങ്ങള്‍ മറ്റൊരു ഹാര്‍ഡ് ഡിസ്‌കിലേക്ക് പകര്‍ത്തി, ഒരോ ഫയലും പരിശോധിച്ച് തെളിവുകള്‍ നശിപ്പിക്കുകയായിരുന്നു.

ലാബ് സ്വന്തം നിലയില്‍ തയ്യാറാക്കിയ ഫോണുകളുടെ ഫോറന്‍സിക് പരിശോധനാ റിപ്പോര്‍ട്ടും പൊലീസ് സംഘം ശേഖരിച്ചിട്ടുണ്ട്. കൊച്ചിയില്‍ നിന്ന് കൊറിയര്‍ വഴിയാണ് ലാബിലേക്ക് ഫോണുകള്‍ അയച്ചത്. ഇതിന്റെ രസീതും ലാബില്‍ നിന്ന് കിട്ടി. ഫോണുകളിലെ രേഖകള്‍ ദിലീപിന്റെ അഭിഭാഷകര്‍ നേരിട്ട് കണ്ടതായും ലാബുടമ മൊഴി നല്‍കിയിരുന്നു. ലാബിലെ ജീവനക്കാരെയും ക്രൈംബ്രാഞ്ച് ചോദ്യം ചെയ്തിരുന്നു.

ദിലീപിന്റെ അഭിഭാഷകര്‍ക്ക് മുംബെയിലെ ലാബുമായി പരിചയപ്പെടുത്തിയത് മുംബൈയില്‍ താമസിക്കുന്ന മലയാളി വിന്‍സെന്റ് ചൊവ്വല്ലുരാണെന്നും ക്രൈം ബ്രാഞ്ച് കണ്ടെത്തി. മുന്‍ ആദായ നികുതി അസിസ്റ്റന്റ് കമ്മീഷണറായ വിന്‍സെന്റ് സി.ബി.ഐ. കുറ്റപത്രം നല്‍കിയ അഴിമതി കേസിലെ പ്രതിയാണ്.

തന്റെയും ദിലീപിന്റെയും അഭിഭാഷകന്‍ ഒരേ ആളാണെന്നും അഭിഭാഷകന്‍ ആവശ്യപ്പെട്ട പ്രകാരമാണ് സഹായം നല്‍കിയതെന്നും വിന്‍സെന്റ് വ്യക്തമാക്കിയിരുന്നു നടി ആക്രമണത്തിനിരയാകുന്നതിന്റെ വീഡിയോ ദൃശ്യങ്ങള്‍ കാണാന്‍ ദിലീപിന്റെ അഭിഭാഷകരെ കോടതി അനുവദിച്ചതിന് പിന്നാലെയാണ് ലാബ് അധികൃതരുടെ ഉപദേശം ആദ്യം തേടിയതെന്നും വിന്‍സെന്റ് പറഞ്ഞു. ദിലീപിന്റെ അഭിഭാഷകര്‍ക്കൊപ്പം ഫോണുകള്‍ വാങ്ങാന്‍ താനും മുംബെയിലെ ലാബില്‍ പോയിരുന്നുവെന്നും വിന്‍സെന്റ് സമ്മതിച്ചിട്ടുണ്ട്.നടിയെ ആക്രമിച്ച കേസിലെ ഫോറന്‍സിക് ഉദ്യോഗസ്ഥരുടെ വിസ്താരത്തിന് മുമ്പായും ലാബിലെ ഉദ്യോഗസ്ഥരുടെ സഹായം അഭിഭാഷകര്‍ തേടിയിരുന്നു.

മുംബൈ ലാബിൻ്റ ഉടമയെ ചോദ്യം ചെയ്തതും തെളിവു നശിപ്പിക്കാൻ ദിലീപ് നടത്തിയ ശ്രമങ്ങളുമൊക്കെ ചേർത്ത് പ്രോസിക്യൂഷൻ കഴിഞ്ഞ ദിവസം കോടതിയിൽ സത്യവാങ്മൂലം സമർപ്പിച്ചിരുന്നു. ഇതിന് മറുപടി നൽകാൻ പ്രതിഭാഗം കൂടുതൽ സമയം ചോദിച്ചതിനേത്തുടർന്ന് കേസ് പരിഗണിയ്ക്കുന്നത് ഹൈക്കോടതി മാറ്റിയിരുന്നു.
Published by:user_57
First published: