നിങ്ങളുടെ നഗരം തിരഞ്ഞെടുക്കുക

    • HOME
    • »
    • NEWS
    • »
    • explained
    • »
    • അധ്യാപകരായ വൈദികരുടെയും കന്യാസ്ത്രീകളുടെയും ശമ്പളം; 77 വർഷത്തെ ആനുകൂല്യം ഇല്ലാതായത് എങ്ങനെ?

    അധ്യാപകരായ വൈദികരുടെയും കന്യാസ്ത്രീകളുടെയും ശമ്പളം; 77 വർഷത്തെ ആനുകൂല്യം ഇല്ലാതായത് എങ്ങനെ?

    കാനോനിക നിയമപ്രകാരം സന്യസ്തവ്രതം എടുക്കുന്നതോടെ വൈദികനെയും കന്യാസ്ത്രീയെയും സംബന്ധിച്ചു ‘സിവിൽ ഡെത്ത്’ ആണു സംഭവിക്കുന്നതെന്ന വാദവും ഹൈക്കോടതിഅംഗീകരിച്ചില്ല

    പ്രതീകാത്മക ചിത്രം

    പ്രതീകാത്മക ചിത്രം

    • Share this:
      ശമ്പള വരുമാനമുണ്ടെങ്കിൽ ടിഡിഎസ് (സ്രോതസ്സിൽ ഈടാക്കുന്ന നികുതി) ബാധകമാകുമെന്നും ജീവിതാന്തസ്സിന്റെ അടിസ്ഥാനത്തിൽ ഇളവ് അനുവദിച്ചിട്ടില്ലെന്നും കേരള ഹൈക്കോടതി. സർക്കാർ, എയ്ഡഡ് വിദ്യാഭ്യാസ സ്ഥാപനങ്ങളിൽ അധ്യാപകരായ സന്യസ്തരുടെ ( വൈദികരുടെയും കന്യാസ്ത്രീകളുടെയും) ശമ്പളത്തിൽ നിന്നു ടിഡിഎസ് പിടിക്കാമെന്നു വ്യക്തമാക്കി കൊണ്ടാണ് ഹൈക്കോടതി ഡിവിഷൻ ബെഞ്ച് ഇക്കാര്യം പറഞ്ഞത്.

      മുക്കാൽ നൂറ്റാണ്ട് കടന്ന ആനുകൂല്യം

      1944 ലെയും 1977 ലെയും സർക്കുലറുകൾ അപ്പീലിനെ പിന്തുണയ്ക്കുന്നില്ല. ആദായ നികുതി നിയമം വരുംമുൻപാണ് ആദ്യ സർക്കുലർ. 1977 ലെ സർക്കുലർ മിഷനറിമാരുടെ ഫീസിനു ബാധകമായതാണ്, സർക്കാർ, എയ്ഡഡ് സ്ഥാപനങ്ങളിൽ ജോലി ചെയ്തു ശമ്പളം പറ്റുന്നവർക്കു ബാധകമല്ലെന്നു കോടതി പറഞ്ഞു.

      സർക്കുലർ നിലനിന്ന 1944 മുതൽ 2014 വരെ വൈദികർക്കും കന്യാസ്ത്രീകൾക്കും നൽകുന്ന ശമ്പളത്തിനു സർക്കാർ ടിഡിഎസ് ബാധകമാക്കിയിരുന്നില്ല. 2014 മുതൽ ഇതുവരെ കോടതികളും തുണച്ചു. എന്നാൽ, 77 വർഷമായി ടിഡിഎസ് ഈടാക്കിയില്ലെന്നതു പ്രത്യേക അവകാശമൊന്നും നൽകുന്നില്ലെന്നു കോടതി പറഞ്ഞു. 2014 ലാണ് സർക്കാർ, എയ്ഡഡ് അധ്യാപകരായ വൈദികരുടെയും കന്യാസ്ത്രീകളുടെയും ശമ്പളത്തിനു ടിഡിഎസ് ബാധകമാക്കാൻ ഇൻകം ടാക്സ് വകുപ്പ് ട്രഷറി വിഭാഗത്തിനു നിർദേശം നൽകിയത്.

      ‘സിവിൽ ഡെത്ത്’ തത്വം

      ദാരിദ്ര്യ വ്രതം സ്വീകരിക്കുന്ന സന്യസ്തരുടെ ശമ്പള വരുമാനം സന്യസ്ത സഭയിലേക്കു പോകുന്നതിനാൽ ടിഡിഎസ് ബാധകമാകില്ലെന്നുള്ള വാദം കോടതി തള്ളി. സന്യസ്തവ്രതം എടുക്കുന്നതോടെ വൈദികനെയും കന്യാസ്ത്രീയെയും സംബന്ധിച്ചു ‘സിവിൽ ഡെത്ത്’ ആണു സംഭവിക്കുന്നതെന്ന വാദവും കോടതി അംഗീകരിച്ചില്ല. കാനോനിക നിയമപ്രകാരമുള്ള ‘സിവിൽ ഡെത്ത്’ എന്ന ആശയം സന്യസ്തരുടെ എല്ലാ ജീവിത സാഹചര്യങ്ങളിലും ബാധകമല്ല. ഒരു വ്യക്തിയുടെ സിവിൽ അവകാശങ്ങൾ പൂർണമായോ ഭാഗികമായോ ഇല്ലാതെ ആകുന്ന അവസ്ഥയാണ് സിവിൽ ഡെത്ത് എന്ന് കണക്കാക്കപ്പെടുന്നത്. രാജ്യത്തെ നിയമങ്ങൾക്കു വ്യക്തിഗത നിയമങ്ങളെക്കാൾ പ്രാമുഖ്യമുണ്ട്. സഞ്ചാരസ്വാതന്ത്ര്യം, അഭിപ്രായ സ്വാതന്ത്ര്യം, തൊഴിലവകാശം ഉൾപ്പെടെ നിയമപരമായും ഭരണഘടനാപരമായും ഉള്ള എല്ലാ അവകാശങ്ങളും സന്യസ്തരും അനുഭവിക്കുന്നുണ്ട് കോടതി വ്യക്തമാക്കി.

      സീസറിനുള്ളതു സീസറിനും ദൈവത്തിനുള്ളതു ദൈവത്തിനും

      സീസറിനുള്ളതു സീസറിനും ദൈവത്തിനുള്ളതു ദൈവത്തിനും നൽകണമെന്ന ബൈബിൾ വാക്യം ആമുഖമായി ഉദ്ധരിച്ചുകൊണ്ടാണു കോടതിയുടെ വിധി. ഭരണഘടന അനുശാസിക്കുന്ന മതസ്വാതന്ത്ര്യത്തിന്റെ ഭാഗമായി ടിഡിഎസ് ഇളവ് അനുവദിക്കാനാവില്ലെന്നു കോടതി പറഞ്ഞു. നിയമപ്രകാരം നികുതി ഈടാക്കുന്നതു മതസ്വാതന്ത്ര്യത്തിലുള്ള കടന്നുകയറ്റമാകില്ലെന്നും കോടതി പറഞ്ഞു.

      ദാരിദ്ര്യം വ്രതമായി സ്വീകരിച്ചവരുടെ വരുമാനം ആർക്ക് ?

      ദാരിദ്ര്യം വ്രതമായി സ്വീകരിച്ച സന്യസ്തർ സ്വത്തു സമ്പാദിക്കുന്നില്ലെന്നും അവരുടെ വരുമാനം സന്യസ്ത സഭയിലേക്കാണു പോകുന്നതെന്നും അപ്പീൽ ഭാഗം വാദിച്ചു. എന്നാൽ, ശമ്പളവും പെൻഷനും ഗ്രാറ്റ്വിറ്റിയും പറ്റുന്ന വൈദികരും കന്യാസ്ത്രീകളും സർക്കാർ ജീവനക്കാരാണെന്ന് നികുതി വകുപ്പ് വാദിച്ചു. മറ്റേതെങ്കിലും നികുതിയിളവിന് അർഹതയുണ്ടെങ്കിൽ ടിഡിഎസ് ഒഴിവാക്കുകയല്ല, റീഫണ്ട് ആണു ചെയ്യേണ്ടതെന്നും അറിയിച്ചു.

      സിംഗിൾ ജഡ്ജിയുടെ സമാന ഉത്തരവിനെതിരെ സിസ്റ്റർ മേരി ലൂസിറ്റ നൽകിയതുൾപ്പെടെ 49 അപ്പീലുകൾ തള്ളിയാണ് ജസ്റ്റിസ് എസ്.വി. ഭട്ടി, ജസ്റ്റിസ് ബെച്ചു കുര്യൻ തോമസ് എന്നിവരുൾപ്പെട്ട ഡിവിഷൻ ബെഞ്ചിന്റെ ഉത്തരവ്.
      Published by:Chandrakanth viswanath
      First published:
      )}