രണ്ടാമൂഴം സിനിമയാക്കുമോ ? 'ഇനി ഒരു ഊഴവുമില്ല..മരക്കാർ എടുത്തതോടെ എല്ലാം നിർത്തി'യെന്ന് പ്രിയദര്‍ശന്‍

മലയാള സിനിമയില്‍ അനേകം സൂപ്പര്‍ ഹിറ്റുകള്‍ സമ്മാനിച്ച സംവിധായകനാണ് പ്രിയദര്‍ശന്‍. കോമഡിയും ആക്ഷനുമടക്കം എല്ലാത്തരം പ്രേക്ഷകര്‍ക്കും ആസ്വദിക്കാന്‍ കഴിയുന്ന സിനിമകള്‍ ഒരുക്കിയിരുന്ന പ്രിയദര്‍ശന്‍ വീണ്ടും മറ്റൊരു ത്രില്ലര്‍ ചിത്രവുമായി എത്തുകയാണ്. ഷെയ്ന്‍ നിഗവും ഷൈന്‍  ടോം ചാക്കോയും പ്രധാന വേഷത്തിലെത്തുന്ന കൊറോണ പേപ്പേഴ്സ് എന്ന ചിത്രവുമായാണ് അദ്ദേഹം വീണ്ടും പ്രേക്ഷകരിലേക്കെത്തുന്നത്.

ചിത്രത്തിന്‍റെ പ്രൊമോഷന്‍റെ ഭാഗമായി നടന്ന പ്രസ് മീറ്റില്‍ പ്രിയദര്‍ശനോട് ഒരു  ഓണ്‍ലൈന്‍ മാധ്യമപ്രവര്‍ത്തകന്‍ ചോദിച്ച ചോദ്യവും അദ്ദേഹം  നല്‍കിയ മറുപടിയുമാണ് സോഷ്യല്‍ മീഡിയയില്‍ വൈറലാകുന്നത്. എംടിയുടെ സ്ക്രിപ്റ്റില്‍ രണ്ടാമൂഴം സിനിമയാക്കുമോ എന്നായിരുന്നു പ്രിയദര്‍ശനോടുള്ള ചോദ്യം. ‘ഇനി ഒരു ഊഴവുമില്ല..ഒരു ഊഴത്തോടെ മതിയായി..കുഞ്ഞാലി മരക്കാരുടെ ഊഴത്തോടെ ഞാന്‍ എല്ലാപരിപാടിയും നിര്‍ത്തി’ എന്നായിരുന്നു പ്രിയന്‍റെ മറുപടി. സംവിധായകന്‍റെ പ്രതികരണം കേട്ട നടന്‍ സിദ്ധിഖ് അടക്കമുള്ളവര്‍ക്ക് ചിരി അടക്കാനായില്ല.

മോഹന്‍ലാലിനെ നായകനാക്കി വന്‍ മുതല്‍ മുടക്കില്‍ നിര്‍മ്മിച്ച് 2021ല്‍ പുറത്തിറക്കിയ മരക്കാര്‍ അറബിക്കടലിന്‍റെ സിംഹം എന്ന ചിത്രത്തിന് പ്രേക്ഷകരില്‍ നിന്ന് പ്രതീക്ഷിച്ച പ്രതികരണം ലഭിച്ചിരുന്നില്ല. കാലാപാനി അടക്കമുള്ള പിരിയോഡിക് സിനിമകള്‍ ഒരുക്കിയ പ്രിയദര്‍ശനില്‍ നിന്ന് പ്രതീക്ഷക്കൊത്ത സിനിമയായി മരക്കാര്‍ മാറിയില്ല എന്നതാണ് പ്രേക്ഷകരുടെ സമ്മിശ്ര പ്രതികരണത്തിന് കാരണം.

‘കൊറോണ പേപ്പേഴ്സ്’; ഷെയ്‌ൻ നിഗം നായകനായ പ്രിയദര്‍ശൻ ചിത്രത്തിന്റെ ട്രെയിലർ

അതിനിടെ യുവതാരങ്ങളായ ഷെയ്ൻ നിഗം, ഷൈൻ ടോം ചാക്കോ എന്നിവരെ കേന്ദ്ര കഥാപാത്രങ്ങളാക്കി പ്രിയദർശൻ സംവിധാനം ചെയ്യുന്ന പുതിയ ചിത്രം കൊറോണ പേപ്പേഴ്സിന്റെ ഒഫീഷ്യൽ ട്രെയിലർ പുറത്തിറങ്ങി. ജനപ്രിയ താരങ്ങളായ മോഹൻലാൽ, സൂര്യ, മഞ്ജു വാര്യർ, ജ്യോതിക എന്നിവരോടൊപ്പം മലയാളത്തിലെ ഒരുപിടി താരങ്ങളും, നിർമ്മാതാക്കളും, മറ്റ് പ്രമുഖരും ചേർന്നാണ് ട്രെയിലർ റിലീസ് ചെയ്തത്. ചിത്രം ഏപ്രിൽ മാസം റിലീസിനെത്തുമെന്ന് അണിയറ പ്രവർത്തകർ അറിയിച്ചു.