Dolby | മനുഷ്യൻ്റെ കണ്ണിനും കാതിനും അനുഭവിക്കാവുന്ന മികച്ച കാഴ്ചയും ശബ്ദവുമായി കേരളത്തിൽ രണ്ടിടത്ത് സിനിമാ തീയറ്റർ വരുന്നു

ആകർഷകമായ വിനോദ അനുഭവങ്ങളിൽ മുൻപന്തിയിലുള്ള ഡോൾബി ലബോറട്ടറീസ്, ഈ വർഷം ഡോൾബി സിനിമ ഇന്ത്യയിലേക്ക് കൊണ്ടുവരുമെന്ന് പ്രഖ്യാപിച്ചു കഴിഞ്ഞു. ഇത് പ്രീമിയം സിനിമാ അനുഭവങ്ങളിൽ ഒരു വഴിത്തിരിവാകും. എന്നാൽ ഐമാക്സിന്റെ സ്ക്രീൻ സൈസ് ഡോൾബിക്കില്ല താനും.

പൂനെയിലെ സിറ്റി പ്രൈഡ്, ഹൈദരാബാദിലെ അല്ലു സിനിപ്ലെക്സ്, ട്രിച്ചിയിലെ എൽഎ സിനിമ, ബെംഗളൂരുവിലെ എഎംബി സിനിമാസ്, കൊച്ചിയിലെ ഇവിഎം സിനിമാസ്, ഉളിക്കലിലെ ജി സിനിപ്ലെക്സ് എന്നിവയാണ് ഇന്ത്യയിൽ ഡോൾബി സിനിമ സ്‌ക്രീനുകൾ തുറക്കുന്ന ആദ്യ ആറ് സ്ഥലങ്ങൾ. ഇതിൽ പൂനെയിലെ തിയേറ്റർ കഴിഞ്ഞ ദിവസം തുറന്നു.

"ഇന്ത്യയിൽ ഡോൾബി സിനിമയുടെ ലോഞ്ച് രാജ്യത്തെ വിനോദ മേഖലയ്ക്ക് ഒരു നിർണായക നിമിഷമാണ്," ഡോൾബി ലബോറട്ടറീസിലെ വേൾഡ്‌വൈഡ് സിനിമാ സെയിൽസ് ആൻഡ് പാർട്ണർ മാനേജ്‌മെന്റിന്റെ വൈസ് പ്രസിഡന്റ് മൈക്കൽ ആർച്ചർ പറഞ്ഞു.

"ഇന്ത്യൻ പ്രേക്ഷകർക്ക് സിനിമകളോട് വലിയ അഭിനിവേശമുണ്ട്. ഡോൾബി സിനിമ അവർക്ക് ആത്യന്തിക ചലച്ചിത്രാസ്വാദന അനുഭവവും. 2014 ൽ ആദ്യത്തെ ഡോൾബി സിനിമ ആരംഭിച്ചതിനുശേഷം, ഡോൾബി സിനിമ അതിവേഗം വളർന്നു, 35 എക്സിബിറ്റർ പങ്കാളികളെയും 14 രാജ്യങ്ങളെയും ഉൾക്കൊള്ളുന്ന നെറ്റ്‌വർക്കായി മാറി. ഈ പ്രഖ്യാപനത്തോടെ, അസാധാരണമായ വിനോദ അനുഭവങ്ങൾ നൽകുന്നതിനായി സിനിമാറ്റിക് കഥപറച്ചിൽ മുന്നോട്ട് കൊണ്ടുപോകുന്നതിനും ചലച്ചിത്ര നിർമ്മാതാക്കൾ, സ്റ്റുഡിയോകൾ, എക്സിബിറ്റർമാർ എന്നിവരുമായി അടുത്ത് പ്രവർത്തിക്കുന്നതിനുമുള്ള ഞങ്ങളുടെ പ്രതിബദ്ധത അടിവരയിടുന്നു."