22 മണിക്കൂറിൽ ഒരു ലക്ഷം ട്വീറ്റ്; റെക്കോർഡിട്ട് മമ്മൂട്ടിയുടെ മധുരരാജ

ഇനി ഒരു മാസം കൂടി. വെക്കേഷൻ കാലത്ത് തിയേറ്ററുകൾ വാഴാൻ മമ്മൂട്ടിയുടെ മധുര രാജ എത്താൻ ഇനി ഇത്രയും കൂടി കാത്തിരിക്കണം. എന്നാൽ ആ കാത്തിരിപ്പിനിടെ വന്ന വാർത്തയാണ് മമ്മൂട്ടി ആരാധകരെ ഇളക്കിമറിക്കുന്നത്. #1MonthForMadhuraRaja എന്ന ഹാഷ് ടാഗ് ആരംഭിച്ച്‌ 22 മണിക്കൂർ കഴിഞ്ഞതും ഒരു ലക്ഷത്തിലേറെ ട്വീറ്റുകളിൽ ഇടം നേടിയിരിക്കുന്നു. ഇത് മലയാള സിനിമയിൽ മറ്റു ചിത്രങ്ങളുമായി താരതമ്യം ചെയ്യുമ്പോൾ റെക്കോർഡ് ആണ്. പോക്കിരി രാജയുടെ രണ്ടാം ഭാഗമാണ് മധുര രാജ.



ട്വീറ്റിനും മുൻപ് ഒരു പ്രത്യേക കാരണത്താൽ മധുര രാജ വാർത്തകളിൽ ഇടം നേടിയിരുന്നു. പ്രേക്ഷക ലക്ഷങ്ങളുടെ ഹരമായ സണ്ണി ലിയോണി മമ്മൂട്ടിക്കൊപ്പം നൃത്ത രംഗത്ത് അവതരിക്കുന്നുവെന്നതാണ് പ്രത്യേകത. ഐറ്റം ഗാന രംഗത്തിന്റെ ചിത്രീകരണം പൂർത്തിയായി. കൂടാതെ രംഗീല എന്ന മലയാള ചിത്രത്തിൽ സണ്ണി മുഖ്യ വേഷത്തിലെത്തും.

മലയാളത്തിൽ ഏറ്റവും കൂടുതൽ കളകഷൻ നേടിയ ചിത്രമായ പുലിമുരുകന് ശേഷം വൈശാഖ് സംവിധാനം ചെയ്യുന്ന ചിത്രമാണ് മധുരരാജ. ഉദയകൃഷ്ണയുടേതാണ് തിരക്കഥ. പീറ്റർ ഹെയ്ൻ ആക്ഷൻ കൊറിയോഗ്രാഫി ഒരുക്കുന്നു എന്നതാണ് മറ്റൊരു പ്രത്യേകത. നെൽസൺ ഐപാണ് നിർമ്മാണം.