• HOME
  • »
  • NEWS
  • »
  • film
  • »
  • Guru Somasundaram | മിന്നൽ മുരളിയിലെ 'ഷിബു' മികച്ച നടൻ; ഗുരു സോമസുന്ദരത്തിന് ഏഷ്യൻ അക്കാദമി ക്രിയേറ്റീവ് പുരസ്‌കാരം

Guru Somasundaram | മിന്നൽ മുരളിയിലെ 'ഷിബു' മികച്ച നടൻ; ഗുരു സോമസുന്ദരത്തിന് ഏഷ്യൻ അക്കാദമി ക്രിയേറ്റീവ് പുരസ്‌കാരം

ഏഷ്യ - പസഫിക് റീജിയണിലെ 16 രാജ്യങ്ങളിൽ നിന്നുമുള്ള സിനിമകളും ടെലിവിഷൻ പരമ്പരകളും പരിഗണിച്ചതിൽ നിന്നാണ് ഇന്ത്യയിൽ നിന്നും 'മിന്നൽ മുരളി' ഈ അഭിമാന നേട്ടം സ്വന്തമാക്കിയിരിക്കുന്നത്

ഗുരു സോമസുന്ദരം

ഗുരു സോമസുന്ദരം

  • Share this:
ഹോളിവുഡ് സൂപ്പർ ഹീറോ സിനിമകൾ കണ്ട് കൊതിച്ചിരുന്ന മലയാളികള്‍ക്ക് മുന്നിൽ മലയാളികളുടെ സ്വന്തം സൂപ്പർ ഹീറോ ചിത്രമായി അവതരിച്ച 'മിന്നൽ മുരളി'ക്ക് (Minnal Murali) വീണ്ടും അഭിമാന നേട്ടം. സിനിമയിൽ ഷിബു എന്ന കഥാപാത്രമായി സിനിമാപ്രേമികളുടെ മനസ്സിൽ ഇടം നേടിയ നടൻ ഗുരു സോമസുന്ദരത്തിന് (Guru Somasundaram) ഏഷ്യൻ അക്കാദമി ക്രിയേറ്റീവ് അവാർഡ്സിൽ മികച്ച നടനുള്ള പുരസ്കാരം. മിന്നൽ മുരളി സംവിധാനം ചെയ്ത ബേസിൽ ജോസഫിന് മികച്ച സംവിധായകനുള്ള ഏഷ്യൻ അക്കാദമി പുരസ്കാരവും ലഭിച്ചു. മികച്ച വിഷ്വൽ എഫ്.എക്സ് ഫീച്ചർ ഫിലിമിനുള്ള പുരസ്കാരവും മിന്നൽ മുരളിക്കാണ് ലഭിച്ചിരിക്കുന്നത്.

ഏഷ്യ - പസഫിക് റീജിയണിലെ 16 രാജ്യങ്ങളിൽ നിന്നുമുള്ള സിനിമകളും ടെലിവിഷൻ പരമ്പരകളും പരിഗണിച്ചതിൽ നിന്നാണ് ഇന്ത്യയിൽ നിന്നും 'മിന്നൽ മുരളി' ഈ അഭിമാന നേട്ടം സ്വന്തമാക്കിയിരിക്കുന്നത്. 52-ാം സംസ്ഥാന ചലച്ചിത്ര പുരസ്‌കാരം, സൈമ അവാർഡ്സ് ഉൾപ്പെടെ നിരവധി പുരസ്കാരങ്ങൾ ഇതിനകം മിന്നൽ മുരളി ടീം സ്വന്തമാക്കിക്കഴിഞ്ഞു. അതിന് പിന്നാലെയാണിപ്പോൾ വീണ്ടും അംഗീകാരം തേടിയെത്തിയിരിക്കുന്നത്.




2011 മുതൽ സിനിമാലോകത്ത് സജീവമായുള്ളയാളാണ് ഗുരു സോമസുന്ദരം. ആരണ്യകാണ്ഡം എന്ന തമിഴ് ചിത്രത്തിലായിരുന്നു ആദ്യമായി അഭിനയിച്ചത്. ജിഗർതണ്ട, ജോക്കർ തുടങ്ങിയ സിനിമകളിലൂടെ ഏറെ ശ്രദ്ധേയനായി. 2015-ൽ കോഹിന്നൂർ എന്ന മലയാളം സിനിമയിലും അഭിനയിച്ചിട്ടുണ്ട്. മിന്നൽ മുരളിയിലൂടെ മലയാളികൾക്ക് ഏറെ പ്രിയപ്പെട്ടവനായി മാറിയ അദ്ദേഹം ചട്ടമ്പി എന്ന സിനിമയിലും അഭിനയിച്ചിരുന്നു. നാലാം മുറ, ചേര, കാപ്പ, ഇന്ദിര, നീരജ തുടങ്ങിയ മലയാളം സിനിമകളും ഗുരു സോമസുന്ദരം അഭിനയിച്ച് പുറത്തിറങ്ങാനായിരിക്കുന്നുണ്ട്.

ഏഷ്യൻ അക്കാദമി ക്രിയേറ്റീവ് അവാർഡ്സിൽ തായ്ലൻഡ്, ഫിലിപ്പൈൻസ്, സൗത്ത് കൊറിയ, ഹോങ് കോങ്, ജപ്പാൻ, സിങ്കപ്പൂർ, ഇന്തോനേഷ്യ, ചൈന, ഓസ്ട്രേലിയ എന്നിവിടങ്ങളിൽ നിന്നുള്ള നടന്മാരും പുരസ്കാരത്തിന് അർഹരായിട്ടുണ്ട്.

ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ ചിത്രങ്ങൾക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്‍റെ ബാനറിൽ സോഫിയ പോളാണ് 2021 ഡിസംബറിൽ നെറ്റ്ഫ്ലിക്സിലൂടെ പ്രദർശനത്തിനെത്തിയ 'മിന്നൽ മുരളി' നിര്‍മ്മിച്ചത്. ടൊവിനോ തോമസ് നായക വേഷത്തിലെത്തിയ ചിത്രം മലയാളം, തമിഴ്, തെലുങ്ക്, ഹിന്ദി എന്നിങ്ങനെ നാല് ഭാഷകളിലായാണ് പുറത്തിറങ്ങിയിരുന്നത്. പി.ആർ.ഒ.- എ.എസ്. ദിനേശ്.

Summary: Minnal Murali fame Guru Somasundaram won the prestigious honour for best actor at the Asia Academy Creative Awards. Sharing the excitement of winning the award, he wrote on Instagram: Happy to share this acclaimed award with you all. Feeling gratitude for this level of recognition. Thank you Asian Academy Creative Awards,Team Minnal Murali
Published by:user_57
First published: