ഉദ്വേഗഭരിതമായ നിമിഷങ്ങൾ കോർത്തിണക്കി ഇഷ്ഖ് രണ്ടാമത്തെ ടീസർ

വസുധയുടെയും സച്ചിദാനന്ദന്റെയും ജീവിതത്തെ, കേവലം ഒരു രാത്രി കൊണ്ട് മുൾമുനയിൽ നിർത്തിയ മുഹൂർത്തങ്ങൾ കോർത്തിണക്കി ഇഷ്ഖ് രണ്ടാമത്തെ ടീസർ പുറത്തിറങ്ങി. ഷെയ്ൻ നിഗം, ആൻ ശീതൾ തുടങ്ങിയവരാണ് നായികാ നായകന്മാരെ അവതരിപ്പിക്കുന്നത്. ചിത്രത്തിന്റെ ഉദ്വേഗഭരിതമായ ഷോട്ടുകൾ ചേർത്തു പിടിച്ചാണ് ഈ ടീസർ പ്രേക്ഷക മുന്നിലേക്ക് എത്തുന്നത്. സിനിമയിലെ എല്ലാ പ്രധാന കഥാപാത്രങ്ങളെയും ഉൾക്കൊള്ളിച്ചുള്ള മേക്കിങ് എന്നത് കൊണ്ടും ടീസർ ശ്രദ്ധേയമാണ്.



മുകേഷ് ആര്‍ മേത്ത, എ.വി. അനൂപ്, സി.വി. സാരഥി എന്നിവര്‍ ചേര്‍ന്നാണ് ഷെയ്ന്‍ നിഗമിന്റെ ഈ ചിത്രം E4 എന്റർടൈൻമെൻറ്സിന്റെ ബാനറിൽ നിർമ്മിച്ചത്. നവാഗതനായ അനുരാജ് മനോഹര്‍ ആണ് ഇഷ്ഖ് സംവിധായകൻ. ഷൈൻ ടോം ചാക്കോ, ജാഫർ ഇടുക്കി, മാല പാർവതി, ലിയോണ ലിഷോയ് തുടങ്ങിയവർ മറ്റു പ്രധാന കഥാപാത്രങ്ങളായി എത്തുന്നു. 'നോട്ട് എ ലവ് സ്റ്റോറി' എന്ന തലക്കെട്ടോടെ പ്രേക്ഷകരിലേക്ക് എത്തിയ ചിത്രം കൂടിയാണ് ഇഷ്ഖ്. ചിത്രത്തിന്റെ കഥ എഴുതിയിരിക്കുന്നത് രതീഷ് രവി.