മധുര രാജക്കൊപ്പം ഉണ്ടയും, ശേഷം തിയേറ്ററിൽ

ഒരു മെഗാ ചിത്രത്തോടൊപ്പം മറ്റൊരു ചിത്രത്തിന്റെ ടീസറും ട്രെയ്‌ലറും അനൗൺസ്‌മെന്റും ഇറക്കുന്ന ട്രെൻഡ് ഈ അടുത്തിടെയായി മലയാള സിനിമയിൽ വർധിച്ചു വരികയാണ്. അതിൽ ഏറ്റവും പുതുതായി ചേരുന്ന ചിത്രങ്ങളാണ് മമ്മൂട്ടി നായകനാവുന്ന മധുര രാജയും ഉണ്ടയും. മധുര രാജ പുറത്തുവരുന്ന ഏപ്രിൽ അഞ്ചിന് ഉണ്ടയുടെ ടീസറും തിയേറ്ററുകളിലെത്തും. മധുര രാജ കഴിഞ്ഞാൽ തിയേറ്ററിലെത്താൻ കാത്തിരിക്കുന്ന മമ്മൂട്ടി ചിത്രമാണ് ഉണ്ട.

മലയാളത്തിൽ ഏറ്റവും കൂടുതൽ കളകഷൻ നേടിയ ചിത്രമായ പുലിമുരുകന് ശേഷം വൈശാഖ് സംവിധാനം ചെയ്യുന്ന ചിത്രമാണ് മധുരരാജ. തിരക്കഥ ഉദയകൃഷ്ണ. പീറ്റർ ഹെയ്ൻ ആക്ഷൻ കൊറിയോഗ്രാഫി ഒരുക്കുന്നു. നെൽസൺ ഐപാണ് നിർമാണം.

Read: ലാലേട്ടൻ ആരാ മോൻ? ഗൂഗിൾ ട്രെൻഡിൽ നമ്പർ വൺ ആയി ലൂസിഫർ

അനുരാഗ കരിക്കിൻവെള്ളം സംവിധായകൻ ഖാലിദ് റഹ്മാൻ കഥയും ഹർഷദ് തിരക്കഥയും എഴുതിയ ഉണ്ടയിൽ കേരളത്തിൽ നിന്നും ഉത്തരേന്ത്യയിലെ നക്സൽ പ്രദേശത്തു തിരഞ്ഞെടുപ്പ് ജോലിക്കു പോകുന്ന പോലീസുകാർക്ക് സംഭവിക്കുന്ന കാര്യങ്ങളാണ് പ്രതിപാദ്യം. ആക്ഷനും ഹാസ്യത്തിനും തുല്യ പ്രാധാന്യമാവുമുണ്ടാവുക. ജിഗർദണ്ടയിൽ ക്യാമറ ചലിപ്പിച്ച ഗ്വെമിക് യൂ. ആരിയാണ് ഛായാഗ്രഹണം. സംഗീതം പ്രശാന്ത് പിള്ള. ബോളിവുഡിൽ നിന്നും ഷാം കൗശലാണ് സംഘട്ടന രംഗങ്ങൾ ചിട്ടപ്പെടുത്തുക. ജെമിനി സ്റ്റുഡിയോക്കൊപ്പം മൂവി മില്ലിലെ കൃഷ്ണൻ സേതുകുമാറും ചേർന്നാണ് ചിത്രം നിർമ്മിക്കുന്നത്. ആസിഫ് അലി, വിനയ് ഫോർട്ട് എന്നിവരും പോലീസ് വേഷം കൈകാര്യം ചെയ്യുന്നുണ്ട്. ഷൈൻ ടോം ചാക്കോ, ജേക്കബ് ഗ്രിഗറി, സുധി കോപ്പ, അർജുൻ അശോകൻ, ദിലീഷ് പോത്തൻ, അലെൻസിയർ എന്നിവരാണ് മറ്റഭിനേതാക്കൾ.