• HOME
  • »
  • NEWS
  • »
  • film
  • »
  • എക്കാലത്തെയും മികച്ച ഇന്ത്യൻ സിനിമയായി 'പഥേർ പാഞ്ചാലി' തിരഞ്ഞെടുത്ത് FIPRESCI; പട്ടികയിൽ ഒരു മലയാള ചിത്രവും

എക്കാലത്തെയും മികച്ച ഇന്ത്യൻ സിനിമയായി 'പഥേർ പാഞ്ചാലി' തിരഞ്ഞെടുത്ത് FIPRESCI; പട്ടികയിൽ ഒരു മലയാള ചിത്രവും

1955-ൽ പുറത്തിറങ്ങിയ പഥേർ പാഞ്ചാലിയിൽ കരുണ ബാനർജി, സുബിർ ബാനർജി, ചുനിബാല ദേവി, ഉമാ ദാസ് ഗുപ്ത എന്നിവരാണ് പ്രധാന വേഷങ്ങളിൽ അഭിനയിച്ചിരിക്കുന്നത്

  • Share this:
എക്കാലത്തെയും മികച്ച പത്ത് ഇന്ത്യൻ സിനിമകളുടെ പട്ടിക പുറത്തിറക്കി ഇന്റർനാഷണൽ ഫെഡറേഷൻ ഓഫ് ഫിലിം ക്രിട്ടിക്‌സ് (International Federation of Film Critics) അഥവാ ഫിപ്രസ്കി (IPRESCI). ഇന്ത്യയിലെ മുപ്പത് അംഗങ്ങൾക്കിടയിൽ നടത്തിയ രഹസ്യ വോട്ടെടുപ്പിലൂടെയാണ് ഈ പത്ത് സിനിമകൾ കണ്ടെത്തിയത്. അഞ്ച് ഹിന്ദി സിനിമകളും മൂന്ന് ബംഗാളി സിനിമകളും മലയാളം, കന്നഡ ഭാഷകളിൽ നിന്ന് ഓരോ സിനിമകളും വീതമാണ് പട്ടികയിൽ ഇടം നേടിയിരിക്കുന്നത്. സത്യജിത് റേയുടെ പഥേർ പാഞ്ചാലിയാണ് (Pather Panchali) പട്ടികയിൽ ഒന്നാം സ്ഥാനത്ത്. അടൂർ ​ഗോപാലക‍ൃഷ്ണന്റെ സംവിധാനത്തിൽ 1981 ൽ പുറത്തിറങ്ങിയ എലിപ്പത്തായം പട്ടികയിൽ നാലാം സ്ഥാനത്തുണ്ട്. അമിതാബ് ബച്ചൻ നായകനായി അഭിനയിച്ച ബോളിവുഡ് ചിത്രം ഷോലെയും (Sholay) പട്ടികയില്‍ ഇടംനേടി.

1955-ൽ പുറത്തിറങ്ങിയ പഥേർ പാഞ്ചാലിയിൽ കരുണ ബാനർജി, സുബിർ ബാനർജി, ചുനിബാല ദേവി, ഉമാ ദാസ് ഗുപ്ത എന്നിവരാണ് പ്രധാന വേഷങ്ങളിൽ അഭിനയിച്ചിരിക്കുന്നത്. പഥേർ പാഞ്ചാലി എന്ന പേരിൽ തന്നെ ബിഭൂതിഭൂഷൺ ബന്ദ്യോപാധ്യായ എഴുതിയ ബംഗാളി നോവലിനെ അടിസ്ഥാനമാക്കിയുള്ളതാണ് ചിത്രം. കടുത്ത ദാരിദ്ര്യത്തിലൂടെ കടന്നുപോകുന്ന അപുവിനെയും സഹോദരി ദുർഗയെയും ചുറ്റിപ്പറ്റിയാണ് കഥ മുന്നോട്ടു നീങ്ങുന്നത്. 'അപു ട്രിയോളജി' (Apu Trilogy) ​ഗണത്തിലെ ആദ്യ സിനിമയാണ് പഥേർ പാഞ്ചാലി. അപരാജിതോ (1956), അപുർ സൻസാർ (1959) എന്നിവയാണ് ഈ ശ്രേണിയിലെ മറ്റു സിനിമകൾ. അപു എന്ന കഥാനായകനിൽ കേന്ദ്രീകൃതമായ സിനിമകളാണിവ.

1960 ൽ പുറത്തിറങ്ങിയ ബം​ഗാളി ചിത്രമായ മേഘേ ധാക്ക താര (Meghe Dhaka Tara) എന്ന ബം​ഗാളി ചിത്രമാണ് പട്ടികയിൽ രണ്ടാം സ്ഥാനത്ത്. 1969 ൽ പുറത്തിറങ്ങിയ മൃണാൾ സെന്നിന്റെ ഭുവൻ ഷോം (Bhuvan Shome) മൂന്നാമതും, അടൂർ ഗോപാലകൃഷ്ണന്റെ എലിപ്പത്തായം നാലാം സ്ഥാനത്തുമാണ്. 1977 ൽ ഗിരീഷ് കാസറവള്ളിയുടെ സംവിധാനത്തിൽ പുറത്തിറങ്ങിയ കന്ന‍ഡ ചിത്രം ഘടശ്രദ്ധയാണ് (Ghatashraddha) അഞ്ചാം സ്ഥാനത്ത്. എം എസ് സത്യു സംവിധാനം ചെയ്ത ഹിന്ദി സിനിമ ഗരം ഹവയാണ് (Garm Hava) പട്ടികയിൽ ആറാം സ്ഥാനത്തുള്ളത്. 1973 ലാണ് ഈ ചിത്രം പുറത്തിറങ്ങിയത്.

സത്യജിത് റേയുടെ തന്നെ ചാരുലത (Charulata) പട്ടികയിൽ ഏഴാം സ്ഥാനത്തും 1974-ൽ ശ്യാം ബെനഗൽ സംവിധാനം ചെയ്ത അങ്കുർ (Ankur) എട്ടാം സ്ഥാനത്തുമാണ്. ഗുരു ദത്തിന്റെ പ്യാസ (Pyaasa) എന്ന ​ഹിന്ദി സിനിമയാണ് പട്ടകയിൽ ഒൻപതാം സ്ഥാനത്ത് ഇടം പിടിച്ചിരിക്കുന്നത്. അമിതാഭ് ബച്ചൻ, ധർമേന്ദ്ര, അംജദ് ഖാൻ, ഹേമമാലിനി, ജയാ ബച്ചൻ എന്നിവരെ കേന്ദ്ര കഥാപാത്രങ്ങളാക്കി 1975-ൽ പുറത്തിറങ്ങിയ ഷോലെയെ (Sholay) എക്കാലത്തെയും മികച്ച പത്താമത്തെ ഇന്ത്യൻ സിനിമയായും ഫിപ്രസ്കി തിരഞ്ഞെടുത്തു.
Published by:Arun krishna
First published: