വിലക്കിന് പിന്നാലെ 'അമ്മ'യിൽ അം​ഗത്വം നേടാൻ അപേക്ഷയുമായി ശ്രീനാഥ് ഭാസി

കൊച്ചി: സിനിമകളിൽ നിന്ന് വിലക്ക് നേരിട്ടതിന് പിന്നാലെ യുവനടൻ ശ്രീനാഥ് ഭാസി അം​ഗത്വത്തിനായി താരസംഘടനയായ അമ്മയ്ക്ക് അപേക്ഷ നൽകി. അമ്മയുടെ ഓഫിസിലെത്തി അംഗത്വം നേടാനുള്ള അപേക്ഷ നടൻ കൈമാറി. അമ്മയുടെ നിയമപ്രകാരം എക്സിക്യൂട്ടീവ് കമ്മിറ്റിയുടെ അനുമതിക്കു ശേഷം മാത്രമാകും അപേക്ഷയിൽ നടപടി സ്വീകരിക്കുക.

അമ്മയുടെ അടുത്ത എക്സിക്യൂട്ടീവ് കമ്മിറ്റിയിലാകും ശ്രീനാഥ് ഭാസിയുടെ അപേക്ഷ പരി​ഗണിക്കുക. അം​ഗത്വം നൽകുന്നതിന് സ്വഭാവം ഉൾപ്പെടെ പരി​ഗണിക്കണമെന്നാണ് സംഘടനയുടെ ചട്ടം. ഇതിനിടെ വിലക്കിനെതിരെ ഷെയ്ൻ നി​ഗവും അമ്മയെ സമീപിച്ചിട്ടുണ്ട്. തനിക്കെതിരായ ആരോപണങ്ങൾ അടിസ്ഥാനരഹിതമാണെന്നാണ് ഷെയ്ൻ പറയുന്നത്.

Also Read- ‘ഇങ്ങനെ ഉള്ളവർ വീട്ടിലിരിക്കുന്നതാണ് നല്ലത്, ശ്രീനാഥ് ഭാസിയുടെ അസഭ്യവും മോശം പെരുമാറ്റവും ഇനി സഹിക്കേണ്ട കാര്യമില്ല’; നിർമാതാവ് ഷിബു സുശീലൻ

ഏതാനും ദിവസങ്ങൾക്കുമുമ്പാണ് ശ്രീനാഥ് ഭാസി, ഷെയ്ൻ നി​ഗം എന്നിവരുമായി സഹകരിക്കില്ലെന്ന് ചലച്ചിത്ര നിർമാതാക്കൾ വാർത്താസമ്മേളനത്തിൽ തുറന്നടിച്ചത്. ഫെഫ്കയുടേയും അമ്മയുടേയും പ്രതിനിധികൾ ഉൾപ്പെടെ ഈ വാർത്താസമ്മേളനത്തിൽ പങ്കെടുത്തിരുന്നു.

Also Read- നടന്മാരായ ഷെയിൻ നിഗമിനും ശ്രീനാഥ് ഭാസിക്കും വിലക്ക്

ആർട്ടിസ്റ്റുകൾക്കും സാങ്കേതിക പ്രവർത്തകർക്കും നിർമാതാക്കൾക്കും നിരവധി ബുദ്ധിമുട്ടുകൾ ഈ താരങ്ങൾ ഉണ്ടാക്കിയതിന്റെ ഭാഗമായിട്ടാണ് നടപടി എന്നാണ് നിർമാതാക്കളുടെ സംഘടന പറഞ്ഞത്. പരാതികളുടെ അടിസ്ഥാനത്തിലാണ് നടപടി. രാസലഹരി ഉപയോഗിക്കുന്നവരുമായി സഹകരിക്കില്ലെന്നും ചില താരങ്ങൾ സ്വബോധമില്ലാതെ പെരുമാറുന്നുവെന്നും നിർമാതാക്കളുടെ സംഘടന വാർത്താസമ്മേളനത്തിൽ പറഞ്ഞിരുന്നു.