സൗദിയില്‍ നിന്ന്​ ചികിത്സക്കായി നാട്ടിലേക്ക് തിരിച്ച പ്രവാസി വീട്ടിലെത്തിയ ഉടൻ മരിച്ചു

കൊല്ലം: സൗദി അറേബ്യയില്‍ നിന്ന്​ ചികിത്സക്കായി നാട്ടിലേക്ക് തിരിച്ച മലയാളി വീട്ടിലെത്തിയ​ ഉടന്‍ മരിച്ചു. കൊല്ലം ചവറ കൊട്ടുകാട് സ്വദേശി മിദ്​ലാജ് ഇബ്രാഹീം ആണ്​ വീട്ടിലെത്തിയ ഉടൻ തന്നെ മരിച്ചത്​. സൗദിയിലെ ദമ്മാമില്‍ നിന്ന്​ ചാര്‍ട്ടേഡ് വിമാനത്തിലാണ്​ മിദ്​ലാജ്​ നാട്ടിലെത്തിയത്​.

ഭാര്യ ഷംനയോടൊപ്പം എയര്‍പോര്‍ട്ടില്‍ നിന്ന് വീട്ടിലെത്തി, കാത്തിരുന്ന മക്കളെ കണ്ടയുടനെ മിദ്​ലാജ് ഇബ്രാഹീം കുഴഞ്ഞു വീണു മരിക്കുകയായിരുന്നു. മിദ്​ലാജ് ഇബ്രാഹിന്‍റെ മരണത്തിൽ ദമ്മാമിൽ ഹഫര്‍ അല്‍ബാത്വിനിലെ വിവിധ പ്രവാസ സംഘടനകൾ അനുശോചിച്ചു.

Also Read- Covid 19 Vaccine| സൗദി കിരീടാവകാശി മുഹമ്മദ് ബിന്‍ സല്‍മാന്‍ കോവിഡ് വാക്സിന്‍ സ്വീകരിച്ചു

വർഷങ്ങളായി സൗദിയില്‍ പ്രവാസിയായിരുന്ന മിദ്​ലാജ് വൃക്കരോഗം മൂലം നേരത്തെ ജോലി ഉപേക്ഷിച്ചു നാട്ടില്‍ പോയിരുന്നു. എന്നാൽ ചികിത്സയ്ക്കൊടുവിൽ രോഗം നിയന്ത്രണവിധേയമായതോടെ വീണ്ടും സൗദിയിൽ തിരിച്ചെത്തുകയായിരുന്നു. സാമ്പത്തിക പ്രതിസന്ധി രൂക്ഷമായതോടെയാണ് വീണ്ടും പ്രവാസലോകത്തേക്ക് മടങ്ങിയെത്തിയത്.

ഹഫര്‍ അല്‍ബാത്വിനിലെ ഒരു ബഖാലയിലാണ് മിദ്​ലാജ് ഇബ്രാഹീം​ ജോലി ചെയ്​തിരുന്നത്​. അതിനിടയില്‍ വൃക്കരോഗം മൂര്‍ച്​ഛിച്ചതിനെ തുടര്‍ന്നാണ്​ ചികിത്സക്ക്​ വേണ്ടി നാട്ടിലേക്ക് തിരിച്ചത്.