നാട്ടിലേക്കു മടങ്ങാൻ ഔട്ട് പാസ് ലഭിച്ച മലയാളി സൗദിയിൽ മരിച്ചു

റിയാദ്​: ഇഖാമ ഉൾപ്പടെയുള്ള ഔദ്യോഗിക രേഖകള്‍ നഷ്​ടപ്പെട്ടതിനെ തുടർന്ന് നാട്ടിലേക്ക് മടങ്ങാനിരുന്ന മലയാളി യുവാവ് റിയാദിൽ മരിച്ചു. നാട്ടില്‍ പോകാന്‍ ഇന്ത്യന്‍ എംബസിയില്‍ നിന്ന്​ ഔട്ട് പാസ് നേടി നില്‍ക്കുന്നതിനിടയിലാണ് തിരുവനന്തപുരം തുണ്ടത്തില്‍ സ്വദേശി പള്ളി​ച്ചവിള വീട്ടില്‍ ഷാഫി (41) മരിച്ചത്​.

ശാരീരിക വിഷമതകള്‍ കാരണം മന്‍ഫുഅയിലെ അല്‍ഈമാന്‍ ആശുപത്രിയില്‍ ചികിത്സയില്‍ കഴിയുകയായിരുന്നു. ഷാഫി നാട്ടിൽ പോയിട്ട് നാലു വർഷത്തോളമായിരുന്നു. കഴിഞ്ഞ ഏപ്രിലിൽ നാട്ടിലേക്കു മടങ്ങാൻ ശ്രമിച്ചെങ്കിലും കോവിഡ് മൂലമുള്ള ലോക്ക്ഡൌൺ കാരണം നടന്നില്ല.

Also Read-സൗദിയില്‍ നിന്ന്​ ചികിത്സക്കായി നാട്ടിലേക്ക് തിരിച്ച പ്രവാസി വീട്ടിലെത്തിയ ഉടൻ മരിച്ചു

ഇതിനിടെ ഇഖാമ ഉള്‍പ്പെടെ ഔദ്യോഗിക രേഖക​ള്‍ നഷ്ടമായതോടെ ഷാഫി നിയമപ്രശ്​നത്തിൽ അകപ്പെട്ടിരുന്നു. ഒടുവിൽ ഇന്ത്യന്‍ എംബസിയില്‍ നിന്ന്​ ഔട്ട്​പാസ്​ വാങ്ങി തര്‍ഹീലില്‍ നിന്ന്​ എക്​സിറ്റ്​ നേടി നാട്ടില്‍ പോകാനുള്ള ഒരുക്കത്തിലായിരുന്നു. അതിനിടെയാണ് ആരോഗ്യപ്രശ്നങ്ങളെ തുടർന്ന് അല്‍ഈമാന്‍ ആശുപത്രിയില്‍ ചികിത്സ തേടിയത്. അവിടെവെച്ചാണ് മരണം സംഭവിച്ചത്.

അഹമ്മദ് കുഞ്ഞു പിതാവും കുല്‍സം ബീവി മാതാവുമാണ്. ഭാര്യ: സുമി. മൃതദേഹം റിയാദില്‍ ഖബറടക്കാന്‍ നടപടിക്രമങ്ങൾ റിയാദിലെ പ്രവാസി സംഘടനയുടെ നേതൃത്വത്തിൽ നടന്നുവരുന്നു.