HOME » NEWS » Gulf » TWO MALAYALEE NURSES DIE IN ROAD ACCIDENT IN SAUDI FIVE PEOPLE WERE INJURED

രണ്ടു മലയാളി നഴ്സുമാർ സൗദിയിൽ വാഹനാപകടത്തിൽ മരിച്ചു; അഞ്ചുപേർക്ക് പരിക്ക്

ഈ മാസം മൂന്നിന് സൌദിയിലെ റിയാദിൽ എത്തി ജിദ്ദയിലെ വിവിധ ആശുപത്രികളിൽ ജോലിക്ക് കയറേണ്ടിയിരുന്നവരാണ് അപകടത്തിൽ പെട്ടത്

News18 Malayalam | news18-malayalam
Updated: February 28, 2021, 7:52 PM IST
രണ്ടു മലയാളി നഴ്സുമാർ സൗദിയിൽ വാഹനാപകടത്തിൽ മരിച്ചു; അഞ്ചുപേർക്ക് പരിക്ക്
malayali nurses died
  • Share this:
ജിദ്ദ: സൗദി അറേബ്യയിലെ റിയാദ് - ജിദ്ദ പാതയില്‍ ത്വായിഫിന് സമീപം ഉണ്ടായ വാഹന അപകടത്തില്‍ രണ്ടു മലയാളി നഴ്‌സുമാര്‍ മരിച്ചു. ഇവരെ കൂടാതെ ഒരാൾ കൂടി അപകടത്തിൽ മരിച്ചു. കൊല്ലം, കോട്ടയം ജില്ലകളില്‍ നിന്നുള്ള നഴ്‌സുമാരാണ് അപകടത്തിൽ മരിച്ചത്. കൊല്ലം, ആയൂര്‍ സ്വദേശി സുബി (33) കോട്ടയം, വൈക്കം, വഞ്ചിയൂര്‍ സ്വദേശി അഖില (29) എന്നിവരാണ് മരിച്ച മലയാളി നഴ്സുമാര്‍. അപകടത്തിൽ അഞ്ചു പേർക്കു പരിക്കേറ്റു.

ഡ്രൈവര്‍ ഉള്‍പ്പെടെ എട്ടു പേര്‍ അടങ്ങുന്ന സംഘത്തില്‍ പെട്ടവർ സഞ്ചരിച്ച വാൻ ആണ് അപകടത്തിൽ പെട്ടത്. അപകടത്തിൽ മലയാളി നഴ്സുമാരെ കൂടാതെ പശ്ചിമ ബംഗാൾ സ്വദേശിയായ ഡ്രൈവര്‍ ആണ് മരണപ്പെട്ട മൂന്നാമത്തെയാള്‍. മലയാളികളായ മറ്റു രണ്ടു നഴ്സുമാരെയും തമിഴ്‌നാട്ടുകാരായ മൂന്ന് നഴ്‌സുമാരെയും പരിക്കുകളോടെ ആശുപതിയില്‍ പ്രവേശിപ്പിച്ചിട്ടുമുണ്ട്. ഇവരെ ത്വായിഫിലെ ആശുപത്രിയിലാണ് പ്രവേശിപ്പിച്ചിരിക്കുന്നത്. ഇവരുടെ ആരോഗ്യനില നിരീക്ഷിച്ചു വരുകയാണെന്നും തീവ്ര പരിചരണ വിഭാഗത്തിൽ ചികിത്സയിലാണെന്നും ആശുപത്രി അധികൃതർ അറിയിച്ചു. അതേസമയം ഇവരുടെ പരിക്ക് സാരമുള്ളതല്ലെന്നാണ് വിവരം.

ഈ മാസം മൂന്നിന് സൌദിയിലെ റിയാദിൽ എത്തി ജിദ്ദയിലെ വിവിധ ആശുപത്രികളിൽ ജോലിക്ക് കയറേണ്ടിയിരുന്നവരാണ് അപകടത്തിൽ പെട്ടത്. റിയാദിലെ ഹോട്ടലിൽ ക്വറന്‍റീൻ പൂർത്തിയാക്കിയ ശേഷമാണ് ഇവർ ജിദ്ദയിലേക്കു തിരിച്ചത്. റിയാദില്‍ നിന്ന് ജിദ്ദയിലേക്ക് മടങ്ങുകയായിരുന്ന സംഘമാണ് അപകടത്തിൽ പെട്ടത്. മലയാളി നഴ്സുമാർ ഉൾപ്പടെ സഞ്ചരിക്കുകയായിരുന്ന മിനി ബസ് ത്വായിഫിന് സമീപം വെച്ച്‌ അപകടത്തില്‍ പെടുകയായിരുന്നു. നിയന്ത്രണം തെറ്റിയ മിനി ബസ് റോഡിന് അരികിലുള്ള താഴ്ചയിലേക്കു മറിയുകയായിരുന്നു. ഡ്രൈവർ ഉറങ്ങി പോയതാകാം അപകട കാരണമെന്ന് പൊലീസ് പറയുന്നു. അമിത വേഗതയിലായിരുന്നതാണ് അപകടത്തിന്‍റെ ആഘാതം വലുതാക്കിയത്. താഴ്ചയിലേക്ക് മറിഞ്ഞ വാഹനം പൂർണമായും തകർന്നു. വാഹനം വെട്ടി പൊളിച്ചാണ് പരിക്കേറ്റവരെ പുറത്തെടുത്തത്. സമീപ വാസികളും പൊലീസും ചേർന്നാണ് രക്ഷാ പ്രവർത്തനം നടത്തിയത്.

You May Also Like- ഭാര്യ അതിർത്തി കടന്നു; ഭർത്താവിന് 3 ലക്ഷം രൂപയോളം പിഴ; മലയാളി ദമ്പതികളെ ചതിച്ചത് സിം കാർഡ്

അപകടത്തില്‍ പെട്ട സംഘത്തില്‍ നിന്ന് പരിക്കേറ്റ നഴ്‌സുമാരില്‍ രണ്ടു പേർ മലയാളികളാണ് - നാന്‍സി, പ്രിയങ്ക എന്നിവര്‍. ഇവരെയും തമിഴ്ന്നാട്ടുകാരായ കുമുദ, റജിത, റോമിയോ കുമാര്‍ എന്നിവരെയും പരിക്കുകളോടെ ആശുപത്രിയിൽ പ്രവേശിപ്പിച്ചു. ഇതിൽ നാൻസി, പ്രിയങ്ക എന്നിവരെ ത്വായിഫിലെ കിംഗ് ഫൈസല്‍ ആശുപത്രിയിയിലും കുമുദ, റജിത, റോമിയോ കുമാര്‍ എന്നിവരെ ത്വായിഫിലെ പ്രിൻസ് സുൽത്താൻ ആശുപത്രിയിലും പ്രവേശിപ്പിച്ചിട്ടുണ്ട്.

മരിച്ച മൂന്നു പേരുടെയും മൃതദേഹം ആശുപത്രിയിലെ മോർച്ചറിയിലേക്കു മാറ്റി. കോവിഡ് പരിശോധനയും പോസ്റ്റു മോർട്ടം ഉൾപ്പടെയുള്ള നടപടിക്രമങ്ങളും പൂർത്തിയാക്കിയ ശേഷമായിരിക്കും മൃതദേഹം നാട്ടിലേക്കു കൊണ്ടുപോകുന്ന കാര്യം തീരുമാനിക്കുക. പ്രവാസി സംഘടനാ ഭാരവാഹികൾ ഉൾപ്പടെ ആശുപത്രിയിൽ എത്തിയിട്ടുണ്ട്.
Published by: Anuraj GR
First published: February 28, 2021, 7:52 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories