അഭിനന്ദൻ സൈനിക ആശുപത്രിയിൽ; ആ പേരിന് ഇന്ത്യ പുതിയ അർത്ഥം നൽകിയതായി പ്രധാനമന്ത്രി

ന്യൂഡൽഹി: പാകിസ്താനിൽ നിന്ന് ഇന്ത്യക്ക് വിട്ടു കിട്ടിയ വിംഗ് കമാൻഡർ അഭിനന്ദൻ വർധമാന് ഡൽഹിയിലെ സൈനിക ആശുപത്രിയിൽ പരിശോധനകൾ തുടരുന്നു. എയർ വൈസ് മാർഷൽ അടക്കമുള്ള ഉന്നത വ്യോമസേന ഉദ്യോഗസ്ഥർ അഭിനന്ദനെ സന്ദർശിച്ചു. ശാരീരിക മാനസിക ആരോഗ്യം തൃപ്തികരമെന്ന് ബോധ്യപ്പെട്ടാൽ വിവരശേഖരണം നടക്കും. അഭിനന്ദൻ എന്ന വാക്കിന്റെ അർത്ഥം തന്നെ ഇന്ത്യ മാറ്റിയതായി പ്രധാനമന്ത്രി നരേന്ദ്രമോദി പറഞ്ഞു.

• പാകിസ്ഥാനിൽ സുരക്ഷിതമായി കഴിയുന്ന 20 ഭീകരരുടെ പട്ടിക ലോകരാഷ്ട്രങ്ങൾക്ക് കൈമാറി

നെഞ്ചു വിരിച്ച് വാഗാ അതിർത്തി കടന്നെത്തിയ അഭിനന്ദന്റെ ആരോഗ്യ നിലയിൽ പ്രശനങ്ങൾ ഇല്ലെന്നാണ് പ്രാഥമിക പരിശോധനയിൽ വ്യക്തമായത്. മുഖത്തും ശരീരത്തിലും ഏറ്റ പരിക്കുകൾ ഭേദമാക്കണം. പാകിസ്ഥാനിൽ കഴിഞ്ഞ 60മണിക്കൂർ നേരിട്ട മാനസിക സമ്മർദത്തിൽ നിന്ന് മുക്തനാക്കണം. ഇതിനായുള്ള പരിചരണമാണ് ഡൽഹിയിലെ സൈനിക ആശുപത്രിയിൽ പുരോഗമിക്കുന്നത്. വാഗയിൽ നിന്ന് ഇന്നലെ രാത്രി ആശുപത്രിയിൽ എത്തിച്ച അഭിനന്ദനുമായി കുടുംബാംഗങ്ങൾ ഹൃസ്വ കൂടിക്കാഴ്ച നടത്തി. അതേസമയം, അഭിനന്ദൻ എന്ന വാക്കിന് ഇന്ത്യ പുതിയ അർത്ഥം നൽകിയതായി പ്രധാനമന്ത്രി നരേന്ദ്രമോദി പറഞ്ഞു.

• പാകിസ്ഥാൻ ഇന്ത്യയെ F16 വിമാനം ഉപയോഗിച്ച് ആക്രമിച്ചു; തെളിവ് അമേരിക്കയ്ക്ക് കൈമാറി

എയർ വൈസ് മാർഷൽ ആർജികെ കപൂർ അഭിനന്ദനെ സന്ദർശിച്ചു. പാകിസ്ഥാനിൽ എത്തിയത് എങ്ങനെ, അവിടെ നേരിട്ട ഉപദ്രവങ്ങൾ എന്തൊക്കെ തുടങ്ങിയ വിവരങ്ങൾ ശേഖരിക്കാൻ അഭിനന്ദനെ വിശദമായ ചോദ്യം ചെയ്യലിന് വിധേയനാക്കും. വ്യോമസേന ഇന്റലിജൻസ്, ഐബി, റോ എന്നീ ഏജൻസികൾ ആണ് വിവർങ്ങൾ ശേഖരിക്കുക. പാകിസ്ഥാൻ പുറത്തു വിട്ട അഭിനന്ദന്റെ വീഡിയോ ഭീഷപ്പെടുത്തിയാണ് ചിത്രീകരിച്ചതെന്ന് വ്യക്തമായാൽ ജനീവ കൺവെൻഷൻ ലംഘനം ഉന്നയിക്കാനും ഇന്ത്യ പദ്ധതിയിടുന്നുണ്ട്.