ശരീരഭാരം കുറക്കാത്തവരോട് സ്വയം വിരമിക്കാൻ ആവശ്യപ്പെടുമെന്ന് ആസാം പോലീസ്; സമയം നവംബർ വരെ

പോലീസ് ഉദ്യോഗസ്ഥരുടെ ശരീരഭാരം സംബന്ധിക്കുന്ന കണക്കുകൾ ഔദ്യോഗികമായി രേഖപ്പെടുത്താൻ ഒരുങ്ങി ആസാം പോലീസ്. അമിതവണ്ണം ഉള്ളവർക്ക് ശരീരഭാരം കുറയ്ക്കാൻ ഈ വർഷം നവംബർ വരെ സമയം നൽകുമെന്നും കുറക്കാത്തവരോട് സ്വയം വിരമിക്കാൻ ആവശ്യപ്പെടുമെന്നും ഡിജിപി അറിയിച്ചു. മുഖ്യമന്ത്രി ഹിമന്ത ബിശ്വ ശർമ്മയുടെ നിർദ്ദേശപ്രകാരമാണ് ഈ തീരുമാനം എന്നും പോലീസ് ഡയറക്ടർ ജനറൽ ( ഡിജിപി ) ഗ്യാനേന്ദ്ര പ്രതാപ് സിംഗ് വ്യക്തമാക്കി.

ഐ.പി.എസ്, എ.പി.എസ് ഉദ്യോഗസ്ഥരുള്‍പ്പെടെ ആസാം പൊലീസിലെ എല്ലാ ഉദ്യോഗസ്ഥരുടെയും ബോഡി മാസ് ഇൻഡക്സ് ( ബി.എം.ഐ ) ഔദ്യോഗികമായി രേഖപ്പെടുത്താൻ പോലീസ് ഹെഡ്കോട്ടേഴ്സ് തീരുമാനിച്ചതായി അറിയിച്ചുകൊണ്ട് ഡിജിപി ജി. പി സിംഗ് ട്വീറ്റ് ചെയ്തിട്ടുമുണ്ട്. ബി.എം.ഐ 30ൽ കൂടുതലായി അമിതവണ്ണം ഉള്ളവർക്ക് ശരീരഭാരം കുറയ്ക്കാൻ മൂന്നുമാസം കൂടി ( നവംബർ മാസം വരെ ) സമയം നൽകുമെന്നും അറിയിച്ചിട്ടുണ്ട്. ആദ്യമായി തന്ബിറെ.എം.ഐ ആയിരിക്കും രേഖപ്പെടുത്തുന്നത് എന്നും ഡിജിപി കൂട്ടിച്ചേർത്തു.

അസമിലെ ‘ലേഡി സിങ്കം’ സബ് ഇൻസ്പെക്ടർ ജുൻമോനി രാഭ കാറപകടത്തിൽ കൊല്ലപ്പെട്ടു; ദുരൂഹത ആരോപിച്ച് കുടുംബം

ആസാം പോലീസ് സേനയിൽ സ്ഥിരമായി മദ്യപിക്കുന്നവരുടേതും അമിതവണ്ണം ഉള്ളവരുടേയും ഉൾപ്പെടെ 680 പേരുടെ പട്ടിക തയ്യാറാക്കിയിട്ടുണ്ട്. ഒന്നിലധികം അവലോകനങ്ങൾ നടത്തിയതിനു ശേഷം ഡ്യൂട്ടിക്ക് യോഗ്യരല്ലെന്ന് കണ്ടെത്തുന്നവരോട് സ്വയം വിരമിക്കാൻ ആ​വശ്യപ്പെടുമെന്നും നേരത്തെ ജി പി സിംഗ് പറഞ്ഞിരുന്നു. കൂടാതെ അമിത മദ്യപാനത്തെ തുടർന്ന് ആസം പോലീസ് ഉദ്യോഗസ്ഥരിൽ 300 പേർ വിരമിക്കുമെന്ന് ഏപ്രിലിൽ മുഖ്യമന്ത്രിയും പറഞ്ഞിരുന്നു. ആരോഗ്യമുള്ള, കാര്യക്ഷമരായ ഉദ്യോഗസ്ഥരെ നിലനിർത്തി മറ്റുള്ളവരെ പിരിച്ചുവിടാനാണ് ഈ നീക്കം.