ഭൂചലനം: പാകിസ്ഥാനിൽ 19 പേർ മരിച്ചു, 300 പേർക്ക് പരിക്ക്

ന്യൂഡൽഹി: ചൊവ്വാഴ്ച വൈകിട്ടുണ്ടായ ഭൂചലനത്തിൽ പാകിസ്ഥാന്റെ വടക്കൻ  മേഖലയിൽ 19 പേർ കൊല്ലപ്പെട്ടതായി റിപ്പോർട്ട്. മുന്നൂറിലധികം പേർക്ക് പരുക്കേറ്റു. പാകിസ്ഥാന്റെ തലസ്ഥാനമായ ഇസ്ലാമാബാദ്  ഉൾപ്പെടെ വടക്കൻ മേഖലയിലാണ് ഭൂചലനം നാശനഷ്ടം വിതച്ചത്. ഇന്ത്യയിൽ ഡൽഹി, ഡെറഡൂൺ, കശ്മീർ മേഖലകളിലും നേരിയ തോതിൽ ചലനമുണ്ടായി.

പാകിസ്ഥാനിലെ മിർപുറിലും പ്രാന്തപ്രദേശങ്ങളിലും 19 ലധികം പേർ മരിച്ചെന്ന് മിർപുർ ഡെപ്യൂട്ടി ഇൻസ്പെക്ടർ ജനറൽ സർദാർ ഗുൾഫാറാസ് ഖാനെ ഉദ്ധരിച്ച് വാർത്താ ഏജൻസികൾ റിപ്പോർട്ട് ചെയ്യുന്നു.

റിക്ടർ സ്കെയിലിൽ 5 .8 തീവ്രത രേഖപ്പെടുത്തിയ ഭൂചലത്തിന്റെ പ്രഭവ കേന്ദ്രം ഇസ്ലാമാബാദിൽ നിന്നും 120 കിലോ മീറ്റർ അകലെയാണെന്നാണ് റിപ്പോർട്ട്.

ഇന്ത്യാ-പാക് അതിർത്തിയോട് ചേർന്നു കിടക്കുന്ന പട്ടണമായ റാവൽപിണ്ടിയിൽ ഭൂചലനം വൻനാശനഷ്ടമുണ്ടാക്കിയതായി നാഷണൽ സെന്റർ ഫോർ സീസ്മോളജി തലവൻ ജെ.എൽ ഗൗതം വ്യക്തമാക്കി.

Also Read ഉത്തരേന്ത്യയിൽ ഭൂചലനം; പ്രഭവകേന്ദ്രം ഇന്ത്യാ-പാക് അതിർത്തിക്ക് സമീപം