തിരക്കേറിയ ഹൈവേയിൽ ചെറുവിമാനത്തിന്‍റെ അടിയന്തര ലാൻഡിങ്; ഞെട്ടിത്തരിച്ച് ജനങ്ങൾ

ന്യൂഡൽഹി: രാജ്യതലസ്ഥാനത്തിന് സമീപം തിരക്കേറിയ ഹൈവേയിൽ ചെറുവിമാനം അടിയന്തരമായി ലാൻഡ് ചെയ്തു. ഗാസിയാബാദ് എക്സ്പ്രസ് വേയിൽ ഇന്ന് ഉച്ചയ്ക്ക് 1.45നായിരുന്നു സംഭവം. വിമാനം പറന്നിറങ്ങുന്നത് കണ്ട് ഇതുവഴി വന്ന വാഹനങ്ങളിലുള്ളവർ ശരിക്കുമൊന്ന് ഞെട്ടി.

ഗാസിയാബാദ് എക്സ്പ്രസ് വേയിൽ സദർപുർ ഗ്രാമത്തിന് സമീപത്തായിരുന്നു സംഭവം. ബറേലിയിലെ ഹിൻഡൻ എയർബേസിലേക്ക് പോയ എൻസിസി വിമാനമാണ് സാങ്കേതിക തകരാറിനെത്തുടർന്ന് എമർജൻസി ലാൻഡിങ് നടത്തിയത്. അത്യാഹിതമൊന്നും റിപ്പോർട്ട് ചെയ്തിട്ടില്ല. വിമാനത്തിലുണ്ടായിരുന്നവരെല്ലാം സുരക്ഷിതരാണെന്നാണ് റിപ്പോർട്ട്.

ഹരിയാനയെയും ഉത്തർപ്രദേശിനെയും തമ്മിൽ ബന്ധിപ്പിക്കുന്ന എക്സ്പ്രസ് വേയിലാണ് വിമാനം ഇറങ്ങിയത്. 135 കിലോമീറ്റർ ദൈർഘ്യമുള്ള എക്സ്പ്രസ് വേ 50 കിലോമീറ്റർ ദൂരം ഡൽഹിയിലൂടെയാണ് കടന്നുപോകുന്നത്.