Kashmir | കശ്മീരിലെ പുഞ്ചിൽ ഭീകരരുമായി ഏറ്റുമുട്ടി അഞ്ച് സൈനികർക്ക് വീരമൃത്യൂ

ന്യൂഡല്‍ഹി: ജമ്മു കശ്മീരിലെ പൂഞ്ച് ജില്ലയില്‍ ഭീകരരുമായുണ്ടായ ഏറ്റുമുട്ടലില്‍ ഒരു ആര്‍മി ഓഫീസറും മലയാളി ജവാനും ഉള്‍പ്പെടെ അഞ്ച് സൈനികര്‍ കൊല്ലപ്പെട്ടു. കൊല്ലം കൊട്ടാരക്കര ഓടനാവട്ടം സ്വദേശി എച്ച്. വൈശാഖ് ആണ് ഏറ്റുമുട്ടലില്‍ കൊല്ലപ്പെട്ട മലയാളി. ഇന്ന് ഉച്ചയോടെയാണ് പൂഞ്ചില്‍ ഭീകരരുമായുണ്ടായ ഏറ്റുമുട്ടലിനിടെ ഒരു ജൂനിയര്‍ കമ്മീഷന്‍ ഓഫീസറടക്കം അഞ്ച് സൈനികരാണ് വീരമൃത്യു വരിച്ചത്. അതിർത്തിക്കപ്പുറത്തുനിന്ന് ഭീകരരുടെ നുഴഞ്ഞുകയറ്റം തടയുന്നതിനുള്ള സുരക്ഷാ സേനയുടെ ശ്രമമാണ് ഏറ്റുമുട്ടലിൽ കലാശിച്ചത്. സൂറന്‍കോട് മേഖലയില്‍ നാല് മുതല്‍ അഞ്ച് വരെ ആയുധധാരികളായ ഭീകരർ നുഴഞ്ഞുകയറിയത്. ഇതേത്തുടർന്ന് സുരക്ഷാസേന വെടിയുതിർക്കുകയായിരുന്നു. അതേസമയം അനന്ത്‌നാഗിലും ബന്ദിപോറയിലും നടന്ന മറ്റു രണ്ട് ഏറ്റുമുട്ടലുകളില്‍ രണ്ട് ഭീകരരെ സൈന്യം വധിച്ചു.

തീവ്രവാദികളുടെ സാന്നിധ്യത്തെക്കുറിച്ചുള്ള രഹസ്യവിവരത്തെത്തുടർന്ന് സൂറൻകോട്ടിലെ ഡികെജിക്കു സമീപമുള്ള ഗ്രാമത്തിൽ അതിരാവിലെ ഓപ്പറേഷൻ ആരംഭിച്ചതായി പ്രതിരോധ വക്താവ് പറഞ്ഞു. ആദ്യം സുരക്ഷാസേനയ്ക്കു നേരെ ഭീകരർ കനത്ത വെടിവെപ്പ് നടത്തിയെന്നും അതിന്റെ ഫലമായി ജെസിഒയ്ക്കും മറ്റ് നാല് റാങ്കുകൾക്കും ഗുരുതര പരിക്കേറ്റതായും അദ്ദേഹം പറഞ്ഞു. പരിക്കേറ്റ അഞ്ചു പേരും പിന്നീട് വീരമൃത്യു വരിക്കുകയായിരുന്നു.

ഭീകരരുമായുള്ള ഏറ്റുമുട്ടൽ തുടരുകയാണെന്നും കൂടുതൽ വിവരങ്ങൾക്കായി കാത്തിരിക്കുകയാണെന്നും പ്രതിരോധ വക്താവ് പറഞ്ഞു. നിയന്ത്രണരേഖയിൽ (എൽഒസി) കടന്നുകയറിയ ശേഷം ചമ്രർ വനത്തിൽ ഒരു കൂട്ടം തീവ്രവാദികൾ ഉണ്ടായിരുന്നതായി റിപ്പോർട്ടുകളുണ്ടെന്ന് ഉദ്യോഗസ്ഥർ പറഞ്ഞു.

തീവ്രവാദികളെ നിർവീര്യമാക്കുന്നുവെന്ന് ഉറപ്പുവരുത്തുന്നതിനായി കൂടുതൽ സുരക്ഷാസൈനികർ പ്രദേശത്തേക്ക് തിരിച്ചിട്ടുണ്ട്. അതിർത്തിയിൽ ഇന്ത്യയും പാകിസ്ഥാനും തമ്മിലുള്ള വെടിനിർത്തൽ പ്രഖ്യാപിച്ചതിന് ശേഷം പ്രദേശത്ത് സേനയ്‌ക്കെതിരായ ഏറ്റവും ശക്തമായ ആക്രമണമായിരുന്നു ഇന്നു നടന്ന വെടിവയ്പ്പ്.

കഴിഞ്ഞയാഴ്ച രണ്ട് അധ്യാപകരുൾപ്പെടെ ഒരു തീവ്രവാദ സംഘടന നടത്തിയ ആക്രമണങ്ങളിൽ പ്രദേശത്തെ സാധാരണക്കാരെ വെടിവച്ചുകൊന്നതോടെയാണ് വീണ്ടും സംഘർഷാവസ്ഥ ഉടലെടുത്തത്. "ഫെബ്രുവരി 25 ന് രണ്ട് ഡി‌ജി‌എം‌ഒകൾ (സൈനിക ഓപ്പറേഷൻ ഡയറക്ടർ ജനറൽ) തമ്മിലുള്ള പുതുക്കിയ ഉടമ്പടിക്ക് പിന്നാലെ ഒരു ചെറിയ ഇടവേളയ്ക്ക് ശേഷം, ജമ്മു കശ്മീരിലേക്കുള്ള നുഴഞ്ഞുകയറ്റം പുനരാരംഭിച്ചു" കൂടാതെ "ഭീകര ക്യാമ്പുകൾ" അതിർത്തിയിലുടനീളം ഇപ്പോഴും തുടരുകയും ചെയ്യുന്നു ”- ഓഗസ്റ്റ് 10 ന്, ഡയറക്ടർ ജനറൽ ഓഫ് പോലീസ് ദിൽബാഗ് സിംഗ് പറഞ്ഞു,

സമീപകാലത്ത് രജൗരി സെക്ടറിൽ നാല് ഏറ്റുമുട്ടലുകൾ നടന്നിട്ടുണ്ട് - നൗഷേരയിലെ ദദ്ദൽ, സുന്ദമബാനി, തന്നാമണ്ടിയിലെ പങ്കൈ, കാരിയോട്ട് എന്നിവിടങ്ങളിലാണ് അത് നടന്നത്.