Jodhpur High Court| ഭാര്യയ്ക്ക് അമ്മയാകണം; ജയിലിലുള്ള ഭർത്താവിന് 15 ദിവസത്തെ പരോൾ അനുവദിച്ച് കോടതി

ജോധ്പൂര്‍: ഭാര്യയ്ക്ക് ഗർഭിണിയാകാൻ ജയിൽ കഴിയുന്ന ഭർത്താവിന് പരോൾ അനുവദിച്ച് ജോധ്പൂർ ഹൈക്കോടതി. ഭർത്താവിന്റെ മോചനം ആവശ്യപ്പെട്ട് ഭാര്യ നൽകിയ ഹർജിയിലാണ് ഹൈക്കോടതി പരോൾ അനുവദിച്ചത്.

ഭർത്താവ് ജയിലായത് ഭാര്യയുടെ വൈകാരികവും ലൈംഗികവുമായ ആവശ്യങ്ങളെ ബാധിച്ചുവെന്ന് പരോൾ അനുവദിച്ചു കൊണ്ട് ജസ്റ്റിസുമാരായ സന്ദീപ് മേഹ്തയും ഫർസാന്ദ് അലിയും അടങ്ങുന്ന ബഞ്ച് ചൂണ്ടിക്കാട്ടി. സ്ത്രീയെ സംബന്ധിച്ച് ഗർഭിണിയാകുക എന്നത് പ്രഥമമായതും അവകാശവുമാണെന്നും കോടതി വ്യക്തമാക്കി.

നന്ദലാൽ (34) എന്നയാൾക്കാണ് കോടതി പരോൾ അനുവദിച്ചത്. ഗർഭിണിയാകാനുള്ള അവകാശമുണ്ടെന്ന് കാണിച്ചായിരുന്നു നന്ദലാലിന്റെ ഭാര്യ ഹൈക്കോടതിയെ സമീപിച്ചത്. ഋഗ്വേദമുൾപ്പെടെയുള്ള ഹൈന്ദവ ഗ്രന്ഥങ്ങളും ജൂതമതം, ക്രിസ്ത്യൻ മതം, ഇസ്ലാം എന്നിവയിലെ തത്വങ്ങൾ ചൂണ്ടിക്കാട്ടിയാണ് കോടതി പരോൾ അനുവദിച്ചത്.
Also Read-മഹലുകളിലും കൊട്ടാരങ്ങളിലും ജീവിച്ചിരുന്നവർ ഇന്ന് കൂരകളിലും മൺകുടിലുകളിലും; പ്രതാപം മങ്ങിയ ഇന്ത്യൻ രാജകുടുംബങ്ങൾ

തടവുകാരന്റെ ഭാര്യയ്ക്ക് സന്താനങ്ങളുണ്ടാകാനുള്ള അവകാശം നിഷേധിക്കപ്പട്ടതായി കോടതി നിരീക്ഷിച്ചു. യുവതി കുറ്റവാളിയോ ശിക്ഷിക്കപ്പെടുകയോ ചെയ്തിട്ടില്ല. അതിനാൽ കുഞ്ഞുണ്ടാകുക എന്നതിനു വേണ്ടി തടവുകാരനായ ഭർത്താവുമായുള്ള ദാമ്പത്യബന്ധം നിഷേധിക്കുന്നത് ഭാര്യയുടെ അവകാശങ്ങളെ ബാധിക്കുന്നതാണെന്നും കോടതി ചൂണ്ടിക്കാട്ടി.

ജീവപര്യന്തം തടവിനാണ് നന്ദലാലിനെ രാജസ്ഥാൻ കോടതി ശിക്ഷിച്ചത്. അജ്മീർ ജയിലിൽ കഴിയുന്ന ഇയാൾക്ക് 2021 ൽ 20 ദിവസത്തെ പരോൾ അനുവദിച്ചിരുന്നു. പരോൾ കാലത്ത് നന്ദലാൽ നന്നായി പെരുമാറിയെന്നും കൃത്യസമയത്ത് തിരിച്ചെത്തിയെന്നും കോടതി നിരീക്ഷിച്ചു.