Mann Ki Baat| 'ജനാധിപത്യം നമ്മുടെ സിരകളിലും സംസ്കാരത്തിലും': പ്രധാനമന്ത്രി; പത്മ പുരസ്കാര ജേതാക്കൾക്ക് അഭിനന്ദനം

പ്രധാനമന്ത്രി നരേന്ദ്ര മോദി 2023 ലെ തന്റെ ആദ്യ മൻ കി ബാത്തിൽ ഞായറാഴ്ച ജനങ്ങളെ അഭിസംബോധന ചെയ്തു. പ്രതിമാസ റേഡിയോ പരിപാടിയുടെ 97-ാം പതിപ്പായിരുന്നു പ്രധാനമന്ത്രി അഭിസംബോധന ചെയ്യുന്നത്. 2022 ഡിസംബർ 25 നായിരുന്നു പ്രധാനമന്ത്രിയുടെ അവസാനത്തെ മൻ കി ബാത്ത്.

2023-ലെ പത്മ പുരസ്‌കാരങ്ങൾ മുതൽ ഇന്ത്യൻ ജനാധിപത്യം വരെ, പ്രധാനമന്ത്രി നരേന്ദ്ര മോദി തന്റെ അര മണിക്കൂർ പ്രസംഗത്തിൽ എടുത്തു പറഞ്ഞു. നമ്മുടെ ജൈവവൈവിധ്യം സംരക്ഷിക്കേണ്ടതിന്റെയും ശരിയായ ഇ-മാലിന്യ നിർമാർജനം നടത്തുന്നതിന്റെയും പ്രാധാന്യം എടുത്തുകാണിക്കുകയും നിരവധി പ്രശ്‌നങ്ങളെക്കുറിച്ച് സംസാരിക്കുകയും ചെയ്തു.

പ്രധാന മന്ത്രിയുടെ പ്രസംഗത്തിൽ നിന്ന്

• ഇത്തവണ പത്മാപുരസ്‌കാരജേതാക്കളില്‍ ആദിവാസിസമൂഹത്തിനും ആദിവാസിജീവിതവുമായി ബന്ധപ്പെട്ട ആളുകള്‍ക്കും മികച്ച പ്രാതിനിധ്യമുണ്ട്. ആദിവാസി ജീവിതം നഗരങ്ങളിലെ തിരക്കുകളില്‍ നിന്നും വ്യത്യസ്തമാണ്, അവര്‍ നേരിടുന്ന വെല്ലുവിളികളും വ്യത്യസ്തമാണ്. ഇതൊക്കെയാണെങ്കിലും, ആദിവാസി സമൂഹങ്ങള്‍ അവരുടെ പാരമ്പര്യം സംരക്ഷിക്കാന്‍ എപ്പോഴും താല്പര്യപ്പെടുന്നു.
• നക്‌സല്‍ ബാധിതമായിരുന്ന പ്രദേശങ്ങളില്‍പോലും ഈ വര്‍ഷം പത്മ പുരസ്‌കാരങ്ങളുടെ പ്രതിധ്വനികള്‍ മുഴങ്ങികേള്‍ക്കുന്നു. നക്‌സല്‍ ബാധിത പ്രദേശങ്ങളിലെ യുവാക്കള്‍ക്ക് മാര്‍ഗ്ഗദര്‍ശികളായവരെ പത്മ പുരസ്‌കാരങ്ങള്‍ നല്‍കി ആദരിച്ചിട്ടുണ്ട്.
• ഗോത്ര സമൂഹങ്ങളെ കുറിച്ച് സംസാരിച്ച പ്രധാനമന്ത്രി മോദി പറഞ്ഞു, “ആദിവാസി സമൂഹങ്ങളുമായി ബന്ധപ്പെട്ട വശങ്ങൾ സംരക്ഷിക്കാനും ഗവേഷണം നടത്താനും ശ്രമങ്ങൾ നടക്കുന്നുണ്ട്. അതുപോലെ, ടോട്ടോ, ഹോ, കുയി, കൂവി, മണ്ട തുടങ്ങിയ ഗോത്രഭാഷകളിൽ പ്രവർത്തിച്ച നിരവധി മഹത് വ്യക്തികൾക്ക് പത്മ പുരസ്‌കാരങ്ങൾ ലഭിച്ചിട്ടുണ്ട്.
• ഇന്ന് നമ്മള്‍ സ്വാതന്ത്ര്യത്തിന്റെ അമൃത് മഹോത്സവത്തില്‍ റിപ്പബ്ലിക് ദിനത്തെക്കുറിച്ച് ചര്‍ച്ച ചെയ്യുമ്പോള്‍, രസകരമായ ഒരു പുസ്തകത്തെക്കുറിച്ചും ഞാന്‍ ഇവിടെ പരാമര്‍ശിക്കുന്നു. ഏതാനും ആഴ്ചകള്‍ക്ക് മുമ്പ് എനിക്ക് ലഭിച്ച ഈ പുസ്തകം വളരെ രസകരമായ ഒരു വിഷയമാണ് ചര്‍ച്ച ചെയ്യുന്നത്. ‘ഇന്ത്യ-ജനാധിപത്യത്തിന്റെ മാതാവ്’ എന്നാണ് ഈ പുസ്തകത്തിന്റെ പേര്, അതില്‍ നിരവധി മികച്ച ലേഖനങ്ങള്‍ ഉണ്ട്.
• ഇന്ത്യയിലെ ജനാധിപത്യത്തിന്റെ ചരിത്രത്തെക്കുറിച്ച് പ്രധാനമന്ത്രി പറഞ്ഞു, “ജനാധിപത്യം നമ്മുടെ സിരകളിലാണ്, അത് നമ്മുടെ സംസ്കാരത്തിലാണ് – ഇത് നൂറ്റാണ്ടുകളായി നമ്മുടെ പ്രവർത്തനത്തിന്റെ അവിഭാജ്യ ഘടകമാണ്. സ്വഭാവമനുസരിച്ച്, ഞങ്ങൾ ഒരു ജനാധിപത്യ സമൂഹമാണ്. ഡോ. അംബേദ്കർ ബുദ്ധസന്യാസിസംഘത്തെ ഇന്ത്യൻ പാർലമെന്റിനോട് താരതമ്യപ്പെടുത്തി.
• തമിഴ്‌നാട്ടില്‍ ചെറുതും എന്നാല്‍ പ്രശസ്തവുമായ ഒരു ഗ്രാമമുണ്ട് ഉതിര്‍മേരൂര്‍. ഇവിടെയുള്ള 1100-1200 വര്‍ഷങ്ങള്‍ പഴക്കമുള്ള ഒരു ശിഖാലിഖിതം ലോകത്തെ മുഴുവന്‍ അത്ഭുതപ്പെടുത്തുന്നു. ഈ ലിഖിതം ഒരു മിനിഭരണഘടനപോലെയാണ്. ഗ്രാമസഭ എങ്ങനെ നടത്തണമെന്നും അതിലെ അംഗങ്ങളെ തെരഞ്ഞെടുക്കുന്ന പ്രക്രിയ എങ്ങനെയായിരിക്കണമെന്നും ഇതില്‍ വിശദീകരിച്ചിട്ടുണ്ട്.
• സംരംഭകന്‍ എന്ന വാക്ക് നിങ്ങള്‍ കേട്ടിട്ടുണ്ടായിരിക്കും. എന്നാല്‍, Milletpreneurs എന്ന് നിങ്ങള്‍ കേട്ടിട്ടുണ്ടോ? ഒഡീഷയിലെ Milletpreneurs ഇന്ന് വളരെയധികം ചര്‍ച്ച ചെയ്യപ്പെടുകയാണ്. ആദിവാസി ജില്ലയായ സുന്ദര്‍ഗഡിലെ ആയിരത്തി അഞ്ഞൂറോളം സ്ത്രീകളുടെ സ്വയംസഹായസംഘം, ഒഡീഷ മില്ലറ്റ്‌സ് മിഷനുമായി ബന്ധപ്പെട്ടിരിക്കുന്നു.
• ഇന്ത്യൻ പേറ്റന്റ് ഫയലിംഗ്: ഇന്ത്യയുടെ പേറ്റന്റ് ഫയലിംഗ് റെക്കോർഡിനെ പ്രധാനമന്ത്രി അഭിനന്ദിക്കുകയും പേറ്റന്റ് ഫയലിംഗിൽ ഇന്ത്യ നിലവിൽ ഏഴാം സ്ഥാനത്തും വ്യാപാരമുദ്രകളിൽ അഞ്ചാം സ്ഥാനത്തുമാണെന്ന് പറഞ്ഞു. കഴിഞ്ഞ അഞ്ച് വർഷത്തിനിടെ പേറ്റന്റ് ഫയലിംഗിൽ 50% വർധനയുണ്ടായതായി അദ്ദേഹം പറഞ്ഞു. “ഇന്ത്യയിൽ കഴിഞ്ഞ 11 വർഷത്തിനിടെ ആദ്യമായി, ആഭ്യന്തര പേറ്റന്റ് ഫയലിംഗിന്റെ എണ്ണം വിദേശ ഫയലിംഗിനെക്കാൾ കൂടുതലായി കണ്ടു. ഇത് ഇന്ത്യയുടെ വളർന്നുവരുന്ന ശാസ്‌ത്രീയ വൈദഗ്‌ധ്യത്തെയും കാണിക്കുന്നു,” പ്രധാനമന്ത്രി മോദി പറഞ്ഞു.
• ഗ്ലോബൽ ഇന്നൊവേഷൻ ഇൻഡക്സ്: ഗ്ലോബൽ ഇന്നൊവേഷൻ ഇൻഡക്സിൽ ഇന്ത്യയുടെ നേട്ടങ്ങളെക്കുറിച്ച് പ്രധാനമന്ത്രി മോദി സംസാരിച്ചു. ഇന്ത്യയുടെ റാങ്കിംഗ് വളരെയധികം മെച്ചപ്പെട്ടു, ഇപ്പോൾ അത് 40-ാം സ്ഥാനത്തെത്തി, 2015 ൽ ആഗോള ഇന്നൊവേഷൻ സൂചികയിൽ ഇന്ത്യ 80-ാം സ്ഥാനത്തായിരുന്നുവെന്ന് അദ്ദേഹം പറഞ്ഞു.
• ഗോവയിലെ പർപ്പിൾ ഫെസ്റ്റ്: ജനുവരി 6 മുതൽ 8 വരെ ഗോവയിലെ പനാജിയിൽ സംഘടിപ്പിച്ച പർപ്പിൾ ഫെസ്റ്റിനെ പ്രധാനമന്ത്രി മോദി പ്രശംസിച്ചു. “ദിവ്യാംഗങ്ങളുടെ ക്ഷേമത്തിനായുള്ള അതുല്യമായ ഒരു ശ്രമമായിരുന്നു ഇത്. 50,000-ത്തിലധികം ആളുകൾ അതിൽ പങ്കെടുത്തു. ഇപ്പോൾ മിരാമർ ബീച്ച് പരമാവധി ആസ്വദിക്കാൻ കഴിഞ്ഞതിൽ ആളുകൾ ആവേശഭരിതരായി,” പ്രധാനമന്ത്രി പറഞ്ഞു.
• ഇ-മാലിന്യ നിർമാർജനം: ഇ-മാലിന്യങ്ങൾ ഫലപ്രദമായി നിർമാർജനം ചെയ്യുന്നതിനെക്കുറിച്ച് പ്രധാനമന്ത്രി മോദി സംസാരിച്ചു.ആരെങ്കിലും ഒരു പുതിയ ഉപകരണം വാങ്ങുമ്പോഴോ പഴയ ഉപകരണം മാറ്റി വാങ്ങുമ്പോഴോ, അത് ശരിയായ രീതിയില്‍ നിർമാർജനം ചെയ്‌തോ ഇല്ലയോ എന്നത് ശ്രദ്ധിക്കേണ്ടത് ആവശ്യമാണ്. ഇ-മാലിന്യം ശരിയായി സംസ്‌കരിച്ചില്ലെങ്കില്‍ അത് നമ്മുടെ പരിസ്ഥിതിക്ക് ദോഷം ചെയ്യും. പക്ഷേ, ശ്രദ്ധാപൂര്‍വം ചെയ്താല്‍, റീസൈക്കിള്‍, റീ യൂസ് എന്നിവ വഴിയുള്ള സര്‍ക്കുലര്‍ എക്കണോമിക്ക് ഇത് കരുത്ത് പകരും. പ്രതിവര്‍ഷം 50 ദശലക്ഷം ടണ്‍ ഇ-മാലിന്യം തള്ളപ്പെടുന്നതായി ഐക്യരാഷ്ട്രസഭയുടെ റിപ്പോര്‍ട്ടില്‍ പറയുന്നു.
• ജൈവവൈവിധ്യം സംരക്ഷിക്കുന്നു: നമ്മുടെ ഭൂമിയുടെ നിലനിൽപ്പിന് തണ്ണീർത്തടങ്ങൾ വളരെ പ്രധാനമാണെന്ന് പ്രധാനമന്ത്രി മോദി പറഞ്ഞു, കാരണം നിരവധി പക്ഷികളും മൃഗങ്ങളും അവയെ ആശ്രയിച്ചിരിക്കുന്നു. ജൈവവൈവിധ്യം സമ്പുഷ്ടമാക്കുന്നതിനൊപ്പം, വെള്ളപ്പൊക്ക നിയന്ത്രണവും ഭൂഗർഭജല റീചാർജും അവഉറപ്പാക്കുന്നു.
• കശ്മീരിലെ സ്നോ ക്രിക്കറ്റ് : മഞ്ഞുമൂടിയ ജമ്മു കശ്മീരിന്റെ ‘സ്വർഗ്ഗീയ’ ചിത്രങ്ങളെക്കുറിച്ച് പ്രധാനമന്ത്രി മോദി സംസാരിച്ചു, കശ്മീരിലെ സയ്യിദാബാദിൽ സംഘടിപ്പിച്ച ശൈത്യകാല ഗെയിമുകൾ കാണാൻ ആളുകളെ അഭ്യർത്ഥിച്ചു. സ്‌നോ ക്രിക്കറ്റിനെക്കുറിച്ച് സംസാരിക്കുകയും ആളുകളോട് പങ്കെടുക്കാൻ അഭ്യർത്ഥിക്കുകയും ചെയ്തു.