സാധ്വി പ്രഗ്യ മത്സരിക്കുന്നത് തടയാനാവില്ല; അത് ഇലക്ഷൻ കമ്മീഷന്റെ ജോലി: ഹർജി തള്ളി കോടതി

മുംബൈ : സാധ്വി പ്രഗ്യയെ തെരഞ്ഞെടുപ്പിൽ മത്സരിക്കുന്നതിൽ നിന്ന് തടയാനാവില്ലെന്ന് കോടതി. മാലെഗാവ് സ്ഫോടനക്കേസിൽ ആരോപണവിധേയയായ സാധ്വി തെരഞ്ഞെടുപ്പിൽ മത്സരിക്കുന്നതിനെതിരെ സ്ഫോടനത്തിൽ കൊല്ലപ്പെട്ട സയ്യദ് അഹമ്മദ് എന്നയാളുടെ പിതാവാണ് എൻഐഎ പ്രത്യേക കോടതിയെ സമീപിച്ചത്. വിചാരണ ഇപ്പോഴും തുടരുന്ന കേസിൽ ഉൾപ്പെട്ട ആൾ തെരഞ്ഞെടുപ്പിൽ മത്സരിക്കുന്നത് തടയണമെന്നാവശ്യപ്പെട്ടായിരുന്നു പരാതി.

എന്നാൽ ഒരാളെ തെരഞ്ഞെടുപ്പിൽ മത്സരിക്കുന്നതിൽ നിന്ന് വിലക്കാൻ തങ്ങൾക്ക് അധികാരമില്ലെന്ന് വ്യക്തമാക്കിയ കോടതി ഇലക്ഷൻ കമ്മീഷനാണ് ഇക്കാര്യത്തിൽ തീരുമാനമെടുക്കേണ്ടതെന്ന് അറിയിച്ച് പരാതി തള്ളുകയായിരുന്നു. ' നടന്നു കൊണ്ടിരിക്കുന്ന തെരഞ്ഞെടുപ്പിൽ മത്സരിക്കുന്നതിൽ നിന്ന് ആരെയെങ്കിലും വിലക്കാനുള്ള നിയമപരമായ അധികാരം കോടതിക്കില്ല എന്നറിയിച്ചു കൊണ്ടാണ് പരാതി തള്ളിയത്.

Also Read-'നിനക്കും നിന്റെ വംശത്തിനും സർവ നാശം വരും'; കർക്കറെയുടെ മരണത്തിനു കാരണം തന്റെ ശാപമെന്ന് സാധ്വി പ്രഗ്യ സിംഗ് താക്കൂർ

ഭോപ്പാലിലെ കോൺഗ്രസ് സ്ഥാനാർഥി ദിഗ് വിജയ് സിംഗിനെതിരെ മത്സരിക്കാൻ ബിജെപി പ്രഗ്യാ സിംഗിനെ രംഗത്തിറക്കിയത് വിവാദങ്ങള്‍ സൃഷ്ടിച്ചിരുന്നു. ധ്രുവീകരണം സൃഷ്ടിക്കാനാണ് ഇത്തരമൊരു നീക്കം ബിജെപി നടത്തുന്നതെന്നായിരുന്നു മുഖ്യ ആരോപണം.

എന്നാൽ സാധ്വി  പ്രഗ്യ സിംഗ് താക്കൂറിന്റെ സ്ഥാനാർഥിത്വത്തെ ന്യായീകരിച്ച് ബിജെപി രംഗത്തെത്തിയിരുന്നു. ഹൈന്ദവ ഭീകരത എന്ന കോൺഗ്രസിന്റെ കണ്ടുപിടിത്തത്തിനുള്ള മറുപടിയാണ് സാധ്വി പ്രഗ്യയുടെ സ്ഥാനാർഥിത്വമെന്നായിരുന്നു ബിജെപി അധ്യക്ഷൻ അമിത്ഷായുടെ പ്രതികരണം.