HOME » NEWS » India »

Covid 19 | കോവിഡ് കേസുകള്‍ വര്‍ദ്ധിക്കുന്നു; പൂനെയില്‍ ഏപ്രില്‍ മൂന്നു മുതല്‍ രാത്രി കര്‍ഫ്യൂ

തുടര്‍ച്ചയായ രണ്ടാം ദിവസവും 8,000 കേസുകള്‍ രേഖപ്പെടുത്തിയതിനെ തുടര്‍ന്നാണ് ഈ തീരുമാനം

News18 Malayalam | news18-malayalam
Updated: April 2, 2021, 4:58 PM IST
Covid 19 | കോവിഡ് കേസുകള്‍ വര്‍ദ്ധിക്കുന്നു; പൂനെയില്‍ ഏപ്രില്‍ മൂന്നു മുതല്‍ രാത്രി കര്‍ഫ്യൂ
(പ്രതീകാത്മക ചിത്രം)
  • Share this:
പൂനെ: നഗരത്തില്‍ കോവിഡ് കേസുകള്‍ വര്‍ദ്ധിക്കുന്ന സാഹചര്യത്തില്‍ ഏപ്രില്‍ മൂന്നു മുതല്‍ ഏഴു ദിവത്തേക്ക് ലോക്ക്ഡൗണിന് സമാനമായ നിയന്ത്രണങ്ങള്‍ ഏര്‍പ്പെടുത്താന്‍ പൂനെ ഭരണകൂടം തീരുമാനിച്ചിരിക്കുന്നു. തുടര്‍ച്ചയായ രണ്ടാം ദിവസവും 8,000 കേസുകള്‍ രേഖപ്പെടുത്തിയതിനെ തുടര്‍ന്നാണ് ഈ തീരുമാനം. പൂനെയില്‍ വ്യാഴാഴ്ച 8,011 കോവിഡ് കേസുകളാണ് റിപ്പോര്‍ട്ട് ചെയ്തത്. നിലവില്‍ 5,42,422 കേസുകള്‍ ഉണ്ട്.

ബാറുകള്‍, ഹോട്ടലുകള്‍, റെസ്‌റ്റോറന്റുകള്‍ എന്നിവ ഏഴു ദിവസത്തേക്ക് അടച്ചിരിക്കും. ഹോം ഡെലിവറി മാത്രമേ അനുവദിക്കുകയുള്ളൂ. വിവാഹങ്ങളും ശവസംസ്‌കാരങ്ങളും ഒഴികെ ഒരു പൊതുപരിപാടിയും അനുവദിക്കില്ല. ശവസംസ്‌കാര ചടങ്ങുകളില്‍ പരമാവധി 20 പേരും വിവാഹത്തിന് പരമാവധി 50 പേരെയും അനുവദിക്കും. പുതിയ ഉത്തരവ് നാളെ മുതല്‍ പ്രാബല്യത്തില്‍ വരുമെന്ന് പൂനെ ഡിവിഷണല്‍ കമ്മീഷണര്‍ സൗരഭ് റാവു പറഞ്ഞു.

ഏപ്രില്‍ മൂന്നു മുതല്‍ വൈകുന്നേരം ആറു മണി മുതല്‍ രാവിലെ ആറു മണി വരെ 12 മണിക്കൂര്‍ രാത്രി കര്‍ഫ്യു ഏര്‍പ്പെടുത്തുമെന്നും വെള്ളിയാഴ്ച സ്ഥിതിഗതികള്‍ അവലോകനം ചെയ്യുമെന്നും റാവു അറിയിച്ചു. അടുത്ത ഏഴു ദിവസത്തേക്ക് ആരാധനാലയങ്ങളും അടച്ചിടുമെന്നും പൂനെ ഡിവിഷണല്‍ കമ്മീഷണര്‍ പറഞ്ഞു.

പൂനെ ജില്ലയില്‍ വ്യാഴാഴ്ച 8,011 പുതിയ കോവിഡ് കേസുകളാണ് റിപ്പോര്‍ട്ട് ചെയ്തത്. നിലവില്‍ ജില്ലയില്‍ 5,42,422 കേസുകളാണ് റിപ്പോര്‍ട്ട് ചെയ്തിരിക്കുന്നത്. ബുധനാഴ്ച പൂനെയില്‍ 8,605 പേര്‍ക്ക് കൂടി സ്ഥിരീകരിച്ചിരുന്നു. കഴിഞ്ഞ വര്‍ഷം പകര്‍ച്ചവ്യാധി ആരംഭിച്ചതിനു ശേഷം ജില്ലയില്‍ റിപ്പോര്‍ട്ട് ചെയ്യുന്ന ഏറ്റവും വലിയ റിപ്പോര്‍ട്ടാണിത്. വ്യാഴാഴ്ച 65 പേരാണ് കോവിഡ് മൂലം മരണപ്പെട്ടത്. ഇതോടെ മരണസംഖ്യ 10,039 ആയി ഉയര്‍ന്നു.



പൂനെ മുന്‍സിപ്പല്‍ കോര്‍പ്പറേഷന്‍ പരിധിക്കുള്ളില്‍ പുതിയതായി 4,103 കേസുകളാണ് റിപ്പോര്‍ട്ട് ചെയ്തത്. കേസുകളുടെ എണ്ണം 2,73,446 ആയി ഉയരുകയും ചെയ്തു. പൂനെയിലെ അയല്‍ വ്യവസായ ടൗണ്‍ഷിപ്പായ പിംപ്രി ചിഞ്ച്വാഡില്‍ 2,113 കേസുകള്‍ റിപ്പോര്‍ട്ട് ചെയ്തത്. കേസുകളുടെ എണ്ണം 21,42,251 ആയി ഉയരുകയും ചെയ്തു. കോവിഡിനെ നേരിടാന്‍ പൂനെയില്‍ മെഡിക്കല്‍ സൗകര്യങ്ങള്‍ ഉണ്ട് എന്ന് മേയര്‍ അറിയിച്ചിരുന്നു.

അതേസമയം രാജ്യത്ത് വര്‍ദ്ധിച്ച വരുന്ന കോവിഡ് കേസുകള്‍ ആശങ്കജനകമാണെന്നും കോവിഡ് 19 കേസുകള്‍ നഗരത്തില്‍ വര്‍ദ്ധിച്ചതിനെ തുടര്‍ന്ന് ആശുപത്രികളില്‍ കിടക്കകളുടെയും വെന്റിലേറ്ററുകളുടെയും കുറവ് നേരിടുന്നുണ്ടെന്ന് മുംബൈ മേയര്‍ കിഷോരി പെദ്‌നേക്കര്‍ പറഞ്ഞു. കോവിഡ് മാനദണ്ഡങ്ങള്‍ ജനങ്ങള്‍ പാലിക്കാത്തതുകൊണ്ടാണ് കോവിഡ് കേസുകള്‍ വര്‍ദ്ധിക്കുന്നതെന്ന് അദ്ദേഹം പറഞ്ഞു.

"കഴിഞ്ഞ മാര്‍ച്ച് മുതല്‍ ഞങ്ങള്‍ ജനങ്ങളോട് കോവിഡ് നിയന്ത്രണങ്ങള്‍ പാലിക്കുവാന്‍ അഭ്യര്‍ത്ഥിക്കുന്നു. എന്നാല്‍ അവര്‍ അശ്രദ്ധ കാണിക്കുന്നു. ലോക്ഡൗണ്‍ ഏര്‍പ്പെടുത്താന്‍ ആരും ആഗ്രഹിക്കുന്നില്ല. എന്നാല്‍ കോവിഡ് കേസുകള്‍ വര്‍ദ്ധിക്കുന്നതും ആരോഗ്യ മേഖലയിലെ അടിസ്ഥാന സൗകര്യങ്ങള്‍ സമ്മര്‍ദ്ദം നേരിടുന്നതും കര്‍ശന നടപടികള്‍ സ്വീകരിക്കേണ്ട അവസ്ഥ സൃഷ്‌ടിക്കുന്നു," പെദ്‌നേക്കര്‍ പറഞ്ഞു.

അതേസമയം മഹാരാഷ്ട്രയില്‍ കോവിഡ് കേസുകള്‍ വര്‍ദ്ധിക്കുന്ന സാഹചര്യത്തില്‍ വെള്ളിയാഴ്ച രാത്രി 8:30ന് മുഖ്യമന്ത്രി ഉദ്ധവ് താക്കറെ ജനങ്ങളെ അഭിസംബോധന ചെയ്യും.
Published by: Jayesh Krishnan
First published: April 2, 2021, 4:58 PM IST
കൂടുതൽ കാണുക
അടുത്തത് വാര്‍ത്തകള്‍

Top Stories