പ്രസ്താവന തെറ്റായി വ്യാഖ്യാനിച്ചു; മാപ്പ് പറഞ്ഞ് പിത്രോദ

ന്യൂഡൽഹി: 1984ലെ സിഖ് വിരുദ്ധ കലാപവുമായി ബന്ധപ്പെട്ട് നടത്തിയ പരാമർശത്തിൽ ഖേദം പ്രകടിപ്പിച്ച് സാം പിത്രോദ. തന്റെ പ്രസ്താവന തെറ്റായി വ്യാഖ്യാനിച്ചുവെന്നും സാഹചര്യത്തിൽ നിന്ന് അടർത്തി മാറ്റിയെന്നും പിത്രോദ ആരോപിച്ചു.

also read: സിഖ് വിരുദ്ധ കലാപത്തിലെ സാംപിത്രോദയുടെ പരാമർശം പാർട്ടിയുടേതല്ല; നിലപാട് വ്യക്തമാക്കി കോൺഗ്രസ്

പരാമർശം തെറ്റായി വ്യാഖ്യാനിക്കപ്പെട്ടതിൽ ഖേദമുണ്ടെന്നും മാപ്പ് പറയുകയാണെന്നും പിത്രോദ പറഞ്ഞു. തന്റെ ഹിന്ദി മോശമാണെന്നും പിത്രോദ പറഞ്ഞു.

പിത്രോദയുടെ പരാമർശം വ്യക്തിപരമാണെന്നും പാർട്ടിയുമായി ബന്ധമില്ലെന്നും കോൺഗ്രസ് വ്യക്തമാക്കിയതിനു പിന്നാലെയാണ് ഖേദം പ്രകടിപ്പിച്ച് പിത്രോദ എത്തിയത്. പരസ്യ പ്രസ്താവനകൾ നടത്തുമ്പോൾ ശ്രദ്ധിക്കണമെന്ന് പാർട്ടി മുന്നറിയിപ്പ് നൽകിയിട്ടുണ്ട്.

വ്യാഴാഴ്ച സിഖ് കലാപത്തെ കുറിച്ച് പിത്രോദ നടത്തിയ പരാമര്‍ശമാണ് വിവാദമായത്. 1984ൽ അത് സംഭവിച്ചു. അതിനെന്താ എന്നാണ് പിത്രോദ പറഞ്ഞത്. പരാമർശത്തിനെതിരെ പ്രധാനമന്ത്രി ഉൾപ്പെടെയുള്ളവർ രംഗത്തെത്തിയിരുന്നു.