'ജെയ്റ്റ്ലിയുടെയും സുഷമാ സ്വരാജിന്റെയും മരണത്തിന് കാരണം പ്രതിപക്ഷത്തിന്റെ കൂടോത്രം': പ്രഗ്യ സിംഗ് താക്കൂർ

ഭോപ്പാൽ: വിവാദ പ്രസ്താവനയുമായി ബിജെപി എം പി പ്രഗ്യ സിംഗ് താക്കൂർ വീണ്ടും രംഗത്ത്. ബിജെപി നേതാക്കളെ കൊലപ്പെടുത്താൻ 'ദുഷ്ടശക്തി'കളെ പ്രതിപക്ഷം ഉപയോഗിക്കുകയാണെന്നും മുൻ കേന്ദ്രമന്ത്രിമാരായ അരുണ്‍ ജെയ്റ്റ്ലിയുടെയും സുഷമ സ്വരാജിന്റെയും മരണത്തിന് കാരണം ഇതാണെന്നും പ്രഗ്യാ സിംഗ് താക്കൂർ പറഞ്ഞു. ബിജെപി നേതാക്കളെ ആപത്തിൽപ്പെടുത്താൻ പ്രതിപക്ഷം കൂടോത്രവുമായി ഇറങ്ങിയ സാഹചര്യത്തിൽ പാർട്ടി വിഷമഘട്ടത്തിലൂടെയാണ് കടന്നുപോകുന്നതെന്നും ഈ സമയത്ത് തന്റെ സാധന കൈവിടരുതെന്നും ഒരു സന്യാസിവര്യൻ ഉപദേശിച്ചുവെന്നും മാലേഗാവ് സ്ഫോടന കേസിൽ ഒൻപതുവർഷം ജയിലിൽ കഴിഞ്ഞശേഷം പുറത്തെത്തിയ പ്രഗ്യ സിംഗ് പറഞ്ഞു.

'ആ സന്യാസി വര്യൻ എന്താണ് പറഞ്ഞത് എന്നത് ഞാൻ മറന്നുപോയിരുന്നു. പക്ഷേ പാർട്ടിയുടെ മുതിർന്ന നേതാക്കളായ സുഷമ സ്വരാജിനും അരുൺ ജെയ്റ്റ്ലിക്കും ബാബുലാൽ ഗൗർ യാദവിനും ഒന്നിനുപുറകെ ഒന്നായി ജീവൻ നഷ്ടമായി. ഇതാണ് എന്നെ ഇക്കാര്യത്തെപറ്റിചിന്തിക്കാൻ പ്രേരിപ്പിച്ചത്. ആ സന്യാസി വര്യൻ പറഞ്ഞത് ശരിയല്ലേ? അകാലത്തിൽ നേതാക്കൾ പൊലിയുകയാണല്ലോ' - പ്രഗ്യസിംഗ് പറഞ്ഞു.

• Also Read- 32 വർഷം മുൻപുള്ള മണവാളൻ; ഇന്ന് ആ പേര് മലയാളികൾക്ക് സുപരിചിതം

അരുൺ ജെയ്റ്റ്ലിക്കും മധ്യപ്രദേശ് മുൻ മുഖ്യമന്ത്രി ബാബുലാൽ ഗൗറിനും അനുശോചനം അർപ്പിക്കാനായി മധ്യപ്രദേശിൽ സംഘടിപ്പിച്ച സമ്മേളനത്തിലാണ് പ്രഗ്യ സിംഗ് വിവാദ പരാമർശം നടത്തിയത്. ഓഗസ്റ്റ് 20നാണ് ബാബുലാൽ ഗൗർ അന്തരിച്ചത്. അരൺ ജെയ്റ്റ്ലി ഓഗസ്റ്റ് 24നും സുഷമ സ്വരാജ് ഓഗസ്റ്റ് ആറിനുമാണ് അന്തരിച്ചത്. ചടങ്ങിന് ശേഷം പ്രസംഗത്തിലെ പരാമർശത്തെ കുറിച്ച് മാധ്യമപ്രവർ‌ത്തകർ പ്രഗ്യ സിംഗിനോട് ചോദിച്ചെങ്കിലും അവർ പ്രതികരിക്കാൻ തയാറായില്ല.

കോൺഗ്രസ് നേതാവ് ദിഗ്വിജയ് സിംഗിനെ പരാജയപ്പെടുത്തി‌ ഭോപ്പാലിൽ നിന്ന് ലോക്സഭയിലെത്തിയ പ്രഗ്യാ സിംഗ് മുൻപും നിരവധി വിവാദപരാമർശങ്ങൾ നടത്തിയിട്ടുണ്ട്. ഇതിൽ ചിലതിന് പിന്നീട് മാപ്പ് പറയുകയും ചെയ്തു. മഹാത്മാഗാന്ധിയുടെ ഘാതകൻ ഗോഡ്സെയെ രാജ്യസ്നേഹിയെന്ന് വിശേഷിപ്പിച്ചതിന് ബിജെപി നേതൃത്വം കാര‌ണം കാണിക്കൽ നോട്ടീസ് അയച്ചിരുന്നു. തന്റെ ശാപം കാരണമാണ് മഹാരാഷ്ട്ര ഭീകരവിരുദ്ധ സേനാ തലവൻ ഹേമന്ത് കർക്കറെ കൊല്ലപ്പെട്ടതെന്നും പ്രഗ്യാ സിംഗ് നേരത്തെ അവകാശപ്പെട്ടിരുന്നു.