കർണാടകയിൽ വീണ്ടും പ്രതിസന്ധി; മുഖ്യമന്ത്രിസ്ഥാനം ഒഴിയാൻ തയാറെന്ന് കുമാരസ്വാമി

ബെംഗളൂരു: കര്‍ണാടകയില്‍ കോണ്‍ഗ്രസ്- ജെഡിഎസ് സഖ്യത്തില്‍ തര്‍ക്കം മൂർച്ഛിക്കുന്നു. കര്‍ണാടക മുഖ്യമന്ത്രിസ്ഥാനം രാജിവെക്കാന്‍ തയാറാണെന്ന് എച്ച്.ഡി. കുമാര സ്വാമി തുറന്നടിച്ചു. വേണ്ടിവന്നാല്‍ രാജി വെക്കാന്‍ തയ്യാറാണെന്നും കോണ്‍ഗ്രസ് എംഎല്‍എമാര്‍ പരിധി ലംഘിക്കുന്നുവെന്നും എച്ച്.ഡി. കുമാരസ്വാമി പറഞ്ഞു. സിദ്ധരാമയ്യ തന്നെ മുഖ്യമന്ത്രിയായാല്‍ മതിയായിരുന്നുവെന്നും കര്‍ണാടകയില്‍ നിരവധി വികസനങ്ങള്‍ ഉണ്ടാകുമായിരുന്നുവെന്നും ചില മുതിര്‍ന്ന് കോണ്‍ഗ്രസ് എംഎല്‍എമാര്‍ പറഞ്ഞിരുന്നു. മുന്‍ മുഖ്യമന്ത്രിയായ സിദ്ധരാമയ്യയാണ് തങ്ങളുടെ നേതാവ് എന്ന് കോണ്‍ഗ്രസ് എംഎല്‍എമാര്‍ പറയുകയും ചെയ്തതോടെയാണ് കുമാരസ്വാമി രാജി സന്നദ്ധത പരസ്യമായി അറിയിച്ചത്.

• BJPക്കെതിരേ ശിവസേന: 'സവർക്കർക്ക് എന്തുകൊണ്ട് ഭാരതരത്നം നൽകിയില്ല?'

കോണ്‍ഗ്രസ് എംഎല്‍എമാര്‍ക്ക് താനല്ല നേതാവെന്ന് തോന്നുന്നുവെങ്കില്‍ മുഖ്യമന്ത്രി സ്ഥാനം രാജിവെക്കാന്‍ താന്‍ തയാറാണെന്ന് കുമാരസ്വാമി പറഞ്ഞു. എംഎല്‍എമാരെ നിലക്കുനിര്‍ത്താന്‍ കോണ്‍ഗ്രസ് നേതാക്കള്‍ തയാറാകണമെന്നും കുമാരസ്വാമി പറഞ്ഞിരുന്നു. കോൺഗ്രസ് മന്ത്രി സി പുട്ടരംഗ ഷെട്ടിയാണ് തന്നെ സംബന്ധിച്ചിടത്തോളം സിദ്ധരാമയ്യയാണ് ഇപ്പോഴും മുഖ്യമന്ത്രി എന്ന് തുറന്നടിച്ചത്.