ഏഴു ലക്ഷം കോടിയുടെ പദ്ധതികൾ; യുപിയുടെ ചരിത്രത്തിലെ ഏറ്റവും വലിയ ബജറ്റുമായി യോ​ഗി

യോഗി ആദിത്യനാഥിന്റെ നേതൃത്വത്തിലുള്ള ഉത്തർപ്രദേശ് സർക്കാർ 7 ലക്ഷം കോടി രൂപയുടെ ബജറ്റ് നിയമസഭയിൽ അവതരിപ്പിച്ചു. യുപിയിലെ ഏറ്റവും വലിയ ബജറ്റാണിതെന്നാണ് റിപ്പോർട്ടുകൾ. ഉത്തർപ്രദേശ് ധനമന്ത്രി സുരേഷ് ഖന്നയാണ് ബജറ്റ് അവതരിപ്പിച്ചത്. യുപി മുഖ്യമന്ത്രിയായി രണ്ടാമതും അധികാരത്തിലെത്തിയ ശേഷം യോഗി സർക്കാർ അവതരിപ്പിക്കുന്ന രണ്ടാമത്തെ ബജറ്റാണിത്. യുവാക്കളെയും സ്റ്റാർട്ടപ്പുകളെയും ലക്ഷ്യം വെച്ചു കൊണ്ടുള്ള ബജറ്റിൽ സ്ത്രീകർക്കും കർഷകർക്കുമായും പ്രത്യേകം പ്രഖ്യാപനങ്ങളുണ്ട്. വിദ്യാർത്ഥികൾക്കായി 3,600 സ്മാർട്ട്ഫോണുകളും ടാബ്ലറ്റുകളും വിതരണം ചെയ്യുമെന്നും സ്റ്റാർട്ടപ്പുകൾക്ക് ഫണ്ട് നൽകുമെന്നും പ്രഖ്യാപിച്ചിട്ടുണ്ട്.

ബജറ്റിലെ പ്രധാന പ്രഖ്യാപനങ്ങൾ എന്തൊക്കെയാണെന്നു നോക്കാം

പ്രധാനമന്ത്രി ആവാസ് യോജന

പ്രധാനമന്ത്രി ആവാസ് യോജന പദ്ധതി പ്രകാരം 2021-2022 വർഷത്തിൽ സംസ്ഥാനത്ത് 4,33,536 വീടുകളുടെ നിർമാണത്തിനാണ് അനുമതി ലഭിച്ചത്. ഇതിൽ 4,24,344 വീടുകളുടെ നിർമാണം പൂർത്തിയായി. ബാക്കിയുള്ളവയുടെ നിർമാണം പുരോ​ഗമിച്ചു വരികയാണെന്ന് ധനമന്ത്രി നിയമസഭയിൽ അറിയിച്ചു.

Also read-‘ഓരോ ജില്ലയിലും വളർത്തിയെടുത്തത് 7000 ത്തോളം കായിക താരങ്ങളെ’; യുപി മുഖ്യമന്ത്രി യോഗി ആദിത്യനാഥ്

മുഖ്യമന്ത്രി കന്യാ സുമംഗല യോജന

പെൺകുട്ടികളുടെ ക്ഷേമത്തിനായി യുപി സർക്കാർ കൊണ്ടുവന്ന മുഖ്യമന്ത്രി കന്യാ സുമംഗല യോജന പ്രകാരം ഒരു ഗുണഭോക്താവിന് 15,000 രൂപ വരെ ലഭിക്കും. 2023-2024 സാമ്പത്തിക വർഷത്തിൽ ഈ പദ്ധതിക്കായി 1050 കോടി രൂപ വകയിരുത്താനാണ് ഉദ്ദേശിക്കുന്നതെന്നും ബജറ്റ് പ്രസംഗത്തിൽ ധനമന്ത്രി അറിയിച്ചു.

കാൺപൂർ മെട്രോ റെയിൽ പദ്ധതിക്ക് 584 കോടി രൂപ, ആഗ്ര മെട്രോ റെയിൽ പദ്ധതിക്ക് 465 കോടി രൂപ

2023-2024 സാമ്പത്തിക വർഷത്തിൽ, കാൺപൂർ മെട്രോ റെയിൽ പദ്ധതിക്കായി 585 കോടി രൂപയും ആഗ്ര മെട്രോ റെയിൽ പദ്ധതിക്കായി 465 കോടി രൂപയും ബജറ്റിൽ വകയിരുത്തുമെന്നും പ്രഖ്യാപനമുണ്ട്.

Also read-‘2024ൽ ബിജെപി 2014നേതിനേക്കാൾ മികച്ച പ്രകടനം കാഴ്ച വയ്ക്കും; ഏറ്റവും കൂടുതൽ സീറ്റ് നേടുക യുപിയിൽ’: യോഗി ആദിത്യനാഥ്

ആ​രോ​ഗ്യം

2023-2024 സാമ്പത്തിക വർഷത്തിൽ, സംസ്ഥാനത്തെ ഉപ-ആരോഗ്യ കേന്ദ്രങ്ങൾക്കും (sub-health centers ) പ്രാഥമികാരോഗ്യ കേന്ദ്രങ്ങൾക്കുമായി (primary health centers) 15-ാം ധനകാര്യ കമ്മിഷന്റെ ശുപാർശ പ്രകാരം, ഏകദേശം 407 കോടി രൂപ ചെലവഴിക്കും.

ബജറ്റിലെ മറ്റ് പ്രധാന പ്രഖ്യാപനങ്ങളും അറിയിപ്പുകളും

•  വിദ്യാർത്ഥികൾക്ക് ടാബ്‌ലറ്റുകളും സ്മാർട്ട്‌ഫോണുകളും വിതരണം ചെയ്യാൻ 3600 കോടി രൂപയുടെ പദ്ധതി
• സംസ്ഥാനത്ത് സ്റ്റാർട്ടപ്പുകൾ പ്രോത്സാഹിപ്പിക്കുന്നതിന് 60 കോടി രൂപ വകയിരുത്തും.
• ഗ്രാമപ്രദേശങ്ങളിൽ പുതിയ കർഷകരെ പ്രോത്സാഹിപ്പിക്കുന്നതിനായി 20 കോടി രൂപ മാറ്റിവെയ്ക്കും.
•  യുവ അഭിഭാഷകരെ പ്രോത്സാഹിപ്പിക്കുന്നതിനായി 10 കോടി രൂപ വകയിരുത്തും, അഭിഭാഷകരുടെ ക്ഷേമത്തിനായി 5 കോടി രൂപ മാറ്റിവെയ്ക്കും
• വിധവാ പെൻഷൻ പദ്ധതി പ്രകാരം നിർധനരായ സ്ത്രീകളുടെ ക്ഷേമത്തിനായി 4,032 കോടി രൂപ വകയിരുത്തും
• കന്യാ സുമംഗല യോജനയ്ക്കായി 1050 കോടി രൂപ മാറ്റിവെയ്ക്കും.
• സമൂഹത്തിലെ എല്ലാ വിഭാഗങ്ങളിലും പെട്ട പാവപ്പെട്ട പെൺകുട്ടികളുടെ വിവാഹത്തിനായി 600 കോടി രൂപ ബജറ്റിൽ വകയിരുത്തും.
• ഒബിസി വിഭാഗത്തിലെ പാവപ്പെട്ട പെൺകുട്ടികളുടെ വിവാഹത്തിനായി 150 കോടി രൂപ മാറ്റിവെയ്ക്കും.
• പൂർവാഞ്ചൽ എക്സ്പ്രസ് വേയിലും ബുന്ദേൽഖണ്ഡ് എക്സ്പ്രസ് വേയിലും വ്യവസായ ക്ലസ്റ്ററുകൾ കൊണ്ടുവരുന്നതിൽ ശ്രദ്ധ കേന്ദ്രീകരിക്കും.
• ഗോരഖ്പൂർ പുർവാഞ്ചൽ എക്‌സ്പ്രസ് വേയുടെ 50 ശതമാനത്തിലധികം നിർമാണ പ്രവൃത്തനങ്ങൾ പൂർത്തിയായി.
• മീററ്റിനും പ്രയാഗ്‌രാജിനുമിടയിൽ 36,230 കോടി ചെലവിൽ നിർമിക്കുന്ന 5,004 കിലോമീറ്റർ നീളമുള്ള ഗംഗ എക്സ്പ്രസ് വേയുടെ പ്രവൃത്തി പുരോഗമിച്ചു വരുന്നു.
• പുതിയ സാമ്പത്തിക വർഷത്തിൽ ഝാൻസി-ലിങ്ക് എക്‌സ്പ്രസ് വേയും ചിത്രകൂട്-ലിങ്ക് എക്‌സ്‌പ്രസ് വേക്കും അനുമതി
•  ബുന്ദേൽഖണ്ഡ് എക്‌സ്പ്രസ് വേയിലെ പ്രതിരോധ ഇടനാഴിക്കായി 500 കോടി രൂപ മാറ്റിവെയ്ക്കും.
• ഗൊരഖ്പൂർ ലിങ്ക് എക്സ്പ്രസ് വേയിൽലെ വ്യവസായ ഇടനാഴിക്കായി 200 കോടി രൂപ വകയിരുത്തും.
• യമുന എക്‌സ്‌പ്രസ്‌വേയിൽ 10,000 കോടി ചെലവാക്കിയുള്ള ഫിലിം സിറ്റിയുടെ നിർമാണം പുരോഗമിക്കുന്നു.