Anti Love Jihad Campaign| ക്രിസ്ത്യൻ വിഭാഗങ്ങളെ ഒപ്പം നിർത്താൻ ലൗ ജിഹാദ് ക്യാമ്പയിനുമായി ബിജെപി; വാലന്റൈന്‍സ് ദിനത്തില്‍ മത നേതാക്കളെ പങ്കെടുപ്പിച്ച് സെമിനാറുകള്‍

തിരുവനന്തപുരം: നിയമസഭാ തെരഞ്ഞെടുപ്പില്‍ ക്രിസ്ത്യന്‍ വിഭാഗങ്ങളെ പാർട്ടിയോട് അടുപ്പിക്കാൻ ലൗ ജിഹാദ് ക്യാമ്പയിനുമായി ബിജെപി. 'ഹൃദയം പണയം വെക്കരുത്' എന്ന പേരില്‍ വാലന്റൈൻസ് ദിനത്തിൽ ന്യൂനപക്ഷ മോര്‍ച്ചയുടെ നേതൃത്വത്തിലാണ് വിവിധ പരിപാടികള്‍ സംഘടിപ്പിക്കുന്നത്. ലൗ ജിഹാദ് വിഷയത്തില്‍ ക്രിസ്ത്യന്‍ നേതാക്കളെ ഉള്‍പ്പെടുത്തി സെമനാറുകളും ചര്‍ച്ചകളും മറ്റും നടത്താനും ബിജെപി ലക്ഷ്യമിടുന്നുണ്ട്. സാമൂഹിക മാധ്യമങ്ങളില്‍ സംഘപരിവാര്‍ കേന്ദ്രങ്ങളില്‍ നിന്ന് ലൗ ജിഹാദ് പ്രചാരണങ്ങള്‍ നടക്കാറുണ്ടെങ്കിലും ബിജെപി ആദ്യമായാണ് പരസ്യമായി ലൗ ജഹിഹാദ് ക്യാമ്പയിനുമായി രംഗത്തു വരുന്നത്.

Also Read- 'ഇതാണ് ശരിയായ ഭാരതവും ഭാരതീയരും, നമ്മളോട് കളിക്കല്ലേ; മാന്തിയാൽ വലിച്ചു കീറും ഇതാണ് പുതിയ ഇന്ത്യ' - നടൻ കൃഷ്ണകുമാർ

നിയമസഭ തെരഞ്ഞെടുപ്പ് പടിവാതിൽക്കൽ എത്തി നിൽക്കുന്ന ഘട്ടത്തിലുള്ള പ്രചരണത്തിന് രാഷ്ട്രീയ പ്രാധാന്യം ഏറെയാണ്. പ്രചരണത്തിന്റെ ആശയത്തിന് പിന്നിൽ ആർഎസ്എസും ബിജെപിയും ആണെങ്കിലും ക്യാമ്പെയിൻ നടത്താനുള്ള ചുമതല ന്യൂനപക്ഷ മോർച്ചയാണ്. ജസ്‌ന തിരോധാനം മുന്‍നിര്‍ത്തിയായിരിക്കും പ്രചാരണപരിപാടികള്‍. എല്ലാ ജില്ലകളിലും പൊതുപരിപാടികളുണ്ടാവും. ഓരോ ദിവസവും ഓരോ ജില്ലകളിലായി പൊതു പരിപാടികൾ സംഘ‍ടിപ്പിക്കും. പ്രാസംഗികരുടെ വേഷത്തിൽ പ്രമുഖ ബിജെപി നേതാക്കളുമെത്തും.

Also Read- ' സ്രാവുകൾക്കൊപ്പം നീന്തിയ' മുന്‍ ഡിജിപി ജേക്കബ് തോമസ് ഇനി ബിജെപിയില്‍

ക്യാമ്പെയിന് തുടക്കം കുറിച്ചത് ജസ്നയുടെ നാടായ പത്തനംതിട്ടയിൽ നിന്നാണ്. പ്രണയദിനമായ ഫെബ്രുവരി 14 ന് എറണാകുളത്ത് സമാപന പരിപാടി നടക്കും. കേന്ദ്ര- സംസ്ഥാന നേതാക്കള്‍ ഈ പരിപാടിയില്‍ പങ്കെടുക്കും. ഇതിനു പുറമെ പ്രണയ വിവാഹങ്ങള്‍ക്ക് ശേഷം കാണാതായ യുവതികളെപറ്റിയുള്ള ലഘുപുസ്തകവും പുറത്തിറക്കും. ജസ്‌നയുടെ തിരോധാനത്തില്‍ കേന്ദ്രം ഇടപെടണമെന്നാവശ്യപ്പെട്ട് പിതാവ് ജയിംസ് പ്രധാനമന്ത്രിക്ക് നിവേദനം നല്‍കിയിരുന്നു. യുവമോര്‍ച്ച ദേശീയ സെക്രട്ടറി അനൂപ് ആന്റണിക്കാണ് ജയിംസ് നിവേദനം കൈമാറിയത്.

Also Read- സിപിഎമ്മിന് വോട്ടുചെയ്യാൻ BJP-BDJS പ്രവർത്തകർക്ക് നിർദേശമെന്ന് ആരോപണം; BDJS പിളർന്നു

സിറോ മലബാർ സഭാ സിനഡ് തന്നെ ലൗ ജിഹാദിനെതിരേ രംഗത്തെത്തിയ സാഹചര്യത്തിൽ കാമ്പയിൻ നടത്തുന്നത് ഗുണകരമാകുമെന്നാണ് ബി ജെ പി നേതൃത്വത്തിന്റെ വിലയിരുത്തൽ. ലൗ ജിഹാദിന് കേരളത്തിൽ ഒട്ടേറെ തെളിവുകളും ഇരകളുമുണ്ടെന്നും എന്നാൽ ഇക്കാര്യം പുറത്ത് പറയാൻ പൊലീസ് പോലും ഭയക്കുന്നുവെന്നും ന്യൂപക്ഷ മോർച്ച നേതാക്കൾ പറയുന്നു. ഈ പരിപാടികൾക്ക് തെരഞ്ഞെടുപ്പുമായി ബന്ധമില്ലെന്നും അവർ പറയുന്നു. ഈ നിയമ സഭ തെരഞ്ഞെടുപ്പിൽ ഭൂരിപക്ഷം ക്രിസ്ത്യൻ വോട്ടുകളും ബിജെപിക്ക് അനുകൂലമാകുമെന്ന് സംസ്ഥാന അധ്യക്ഷൻ കെ. സുരേന്ദ്രന്റെ അവകാശ വാദത്തിന്റെ പിന്നാലെയാണ് ലൗ ജിഹാദ് ക്യാമ്പയിൻ സംഘടിപ്പിക്കുന്നത്.