കോട്ടയത്ത്‌ ബസ് യാത്ര തോന്നുംപടി; വ്യാപക പരിശോധനയുമായി മോട്ടോർ വാഹനവകുപ്പ്

ഏറ്റവും കൂടുതൽ ജനങ്ങൾ ഉപയോഗിക്കുന്ന പൊതുഗതാഗത സംവിധാനമായ ബസുകളിൽ സാമൂഹിക അകലം പാലിക്കാൻ വേണ്ടി കൃത്യമായ മാർഗനിർദേശങ്ങൾ നൽകിയിട്ടുണ്ടെങ്കിലും ഇവയെല്ലാം ലംഘിച്ച് പൊതുജനങ്ങൾ ബസ്സുകളിൽ യാത്ര ചെയ്യുന്നതായി മോട്ടോർവാഹനവകുപ്പ് എൻഫോഴ്സ്മെൻറ് വിഭാഗം പരിശോധനയിൽ കണ്ടെത്തി.

മോട്ടോർ വാഹനവകുപ്പ്  എൻഫോഴ്സ്മെന്റ് ആർടിഒ ടോജോ യുടെ നേതൃത്വത്തിൽ നടന്ന പരിശോധനയിലാണ് ലോക്ക്ഡൗൺ ലംഘനം കണ്ടെത്തിയത്. തലയോലപ്പറമ്പിലാണ് കൂടുതൽ ലംഘനം. ജില്ലയിൽ വ്യാപകമായി പരിശോധന നടത്താൻ തീരുമാനിച്ചതായി ആർ.ടി.ഒ. പറഞ്ഞു.

TRENDING:'നല്ല സ്റ്റൈലായി ക്വാറന്റീനിലേക്ക്; ചിത്രം പങ്കുവച്ച് പൃഥ്വിരാജ് [NEWS]COVID 19 | കേരളത്തിൽ രണ്ടാഴ്ചയ്ക്കിടെ 183 പേർക്ക് രോഗബാധ; 83 ശതമാനവും സംസ്ഥാനത്തിന് പുറത്തു നിന്ന് വന്നവർ [NEWS]'ലാൽ അന്ന് പൂജപ്പുര ക്രിക്കറ്റ് ടീമിലെ അംഗം'; നടന വിസ്മയത്തിന് ജന്മദിനാശംസകൾ നേർന്ന് ദുബായിൽ നിന്നൊരു സഹപാഠി [NEWS]

പൊതുജനങ്ങളുടെ സുരക്ഷയെ മുൻനിർത്തിയാണ്  ലോക്ഡൗൺ കാലത്തെ പൊതു ഗതാഗത സംവിധാനങ്ങൾക്ക്  യാത്രക്കാരുടെ എണ്ണം കുറച്ച് സാമൂഹിക അകലം പാലിക്കത്തക്ക വിധത്തിൽ നിജപ്പെടുത്തിയിരിക്കുന്നതും ഉയർന്ന യാത്രക്കൂലി ഈടാക്കാൻ അനുവദിച്ചിരിക്കുന്നതും. ഇത്തരത്തിൽ നിർദ്ദേശങ്ങൾക്ക് വിരുദ്ധമായി കൂടുതൽ യാത്രക്കാർ പൊതുഗതാഗത സംവിധാനങ്ങളിൽ യാത്ര ചെയ്യുന്നത് അപകടകരമാണെന്നത് മനസ്സിലാക്കി പൊതുജനങ്ങൾ ഇത്തരം യാത്രകൾ ഒഴിവാക്കേണ്ടതാണ്.

ബസ് ജീവനക്കാരുടെ നിർദ്ദേശങ്ങൾ അനുസരിക്കാൻ  സ്റ്റോപ്പുകളിൽ നിൽക്കുന്ന യാത്രക്കാർ കൂട്ടാക്കുന്നില്ല എന്നും പരാതിയുണ്ട്. വരും ദിവസങ്ങളിൽ ഇത്തരത്തിൽ നിയമം ലംഘിച്ച് സർവീസ് നടത്തുന്ന ബസ്സുകൾക്ക് എതിരെ നിയമ നടപടികൾ സ്വീകരിക്കുമെന്നും ആയതിനാൽ ഇക്കാര്യത്തിൽ പൊതുജനങ്ങൾ സഹകരിക്കണമെന്നും മോട്ടോർ വാഹന വകുപ്പ് അറിയിച്ചു.