കൊറോണ: ഇറ്റലിയിൽ നിന്നെത്തിയ രോഗി റാന്നിയിലെ ബാറിലുമെത്തി; അടച്ചുപൂട്ടിയത് സമീപത്തെ ബിവറേജസ് ഔട്ട്ലെറ്റ്

പത്തനംതിട്ട: കൊറോണ ബാധയുമായി ഇറ്റലിയിൽ നിന്നെത്തിയ റാന്നിയിലെ കുടുംബാംഗം റാന്നിയിലെ ബാർ ഹോട്ടലിലും സന്ദർശനം നടത്തി. രോഗവാഹകരുടെ യാത്ര സംബന്ധിച്ച് ജില്ല ഭരണകൂടം പുറത്തുവിട്ട റൂട്ട്മാപ്പിലാണ് ഇക്കാര്യം വ്യക്തമാക്കിയിരിക്കുന്നത്. അതേസമയം കോവിഡ് 19 രോഗം പടർന്നു പിടിക്കാതിരിക്കാനുള്ള മുന്നറിയിപ്പിന്റെ ഭാഗമായി റാന്നിയിലെ ബിവറേജസ് ഔട്ട്ലെറ്റ് അടച്ചു പൂട്ടി.

റാന്നിയിലെ കുടുംബാംഗം മാർച്ച് അഞ്ചിനാണ് റാന്നി ഗേറ്റ് ഹോട്ടലിലെ ബാറിലെത്തിയത്. വൈകിട്ട് മൂന്നിനായിരുന്നു സന്ദർശനം. തൊട്ടടുത്ത ദിവസം ജില്ലാ ഭരണകൂടം ഇടപെട്ട് കുടുംബത്തെ ആശുപത്രിയിൽ ഐസൊലേറ്റ് ചെയ്തു. റാന്നിയിലെ KSBCFL 1-3008 എന്ന നമ്പരിലുള്ള ബിവറേജസ് ഔട്ട്ലെറ്റാണ് തിങ്കളാഴ്ച  രാത്രിയോടെ അടിച്ചുപൂട്ടിയത്. ജില്ലാ കളക്ടറുടെ നിര്‍ദേശപ്രകാരം എക്‌സൈസ് വകുപ്പാണ് നടപടി എടുത്തത്.
RELATED STORIES:COVID 19 | റാന്നിയിലെ ഇറ്റലിക്കാരടക്കമുള്ള ഏഴു രോഗബാധിതർ ആറു ദിവസം യാത്ര ചെയ്തത് എവിടെയൊക്കെ? [NEWS]Covid 19 | ഇറ്റലിയിൽ നിന്നെത്തിയ 3 വയസുകാരിയുടെ മാതാപിതാക്കൾക്കും രോഗബാധ; സംസ്ഥാനത്ത് 1495 പേര്‍ നിരീക്ഷണത്തില്‍ [NEWS]കോവിഡ് 19: കേരളത്തിൽ ചൊവ്വാഴ്ച നടന്ന 30 പ്രധാന കാര്യങ്ങൾ എന്തൊക്കെ? [NEWS]

ഫെബ്രുവരി 29 നാണ് റാന്നിയിലെ മൂന്നംഗ കുടുംബം കൊച്ചിയിൽ വിമാനമിറങ്ങിയത്. ഇതിനു ശേഷം രോഗബാധ മറച്ചുവച്ച്, ഇവർ മാർച്ച് അഞ്ച് വരെ സഞ്ചരിച്ചതിന്റെ റൂട്ട് മാപ്പാണ് ജില്ലാ ഭരണകൂടം ഇപ്പോൾ പുറത്തുവിട്ടിരിക്കുന്നത്. ഇവരുമായി ഇടപഴകിയ രണ്ട് ബന്ധുക്കളുടെ റൂട്ട് മാപ്പും ജില്ലാ ഭരണകൂടം തയാറാക്കിയിട്ടുണ്ട്. ഇവരെയും ഇവരുമായി സമ്പർക്കം പുലർത്തിയ കോട്ടയത്തെ കുടുംബത്തെയും ഐസൊലേറ്റ് ചെയ്തിട്ടുണ്ട്.