നടിയെ ആക്രമിച്ച കേസ്: മെമ്മറി കാർഡിന്റെ പകർപ്പ് ആവശ്യപ്പെട്ടുള്ള ദിലീപിന്റെ ഹർജി പരിഗണിക്കുന്നത് മാറ്റി

ന്യൂഡൽഹി: നടിയെ ആക്രമിച്ച കേസിൽ പ്രധാന തെളിവായ മെമ്മറി കാർഡിന്റെ പകര്‍പ്പ് ആവശ്യപ്പെട്ട് നടൻ ദിലീപ് നൽകിയ ഹർജി പരിഗണിക്കുന്നത് സുപ്രീംകോടതി മെയ് ഒന്നിലേക്ക് മാറ്റി. സംസ്ഥാന സർക്കാർ ആവശ്യപ്പെട്ടതിനെ തുടർന്നാണ് ഹർജി പരിഗണിക്കുന്നത് മാറ്റിയത്. കാർഡിന്റെ പകർപ്പ് ദിലീപിന് നൽകിയാൽ ദുരുപയോഗം ചെയ്യപ്പെടും എന്നു ചൂണ്ടിക്കാട്ടി സംസ്ഥാന സർക്കാർ അപേക്ഷയെ എതിർത്തിരുന്നു. ദിലീപിന് വേണ്ടി മുതിർന്ന അഭിഭാഷകൻ മുകുൾ റോഹ്‌തഗിയും സർക്കാരിന് വേണ്ടി മുതിർന്ന അഭിഭാഷകൻ ഹരേൻ പി റാവലുമാണ് കോടതിയിൽ ഹാജരായത്.