പച്ചവെള്ളത്തിൽ ഇട്ടാൽ ഉടൻ കട്ടൻചായ ആകുന്ന അദ്ഭുത തേയില; എറണാകുളത്ത് ഹോട്ടൽ പൂട്ടിച്ചു

പറവൂർ: പച്ചവെള്ളത്തിൽ ഇട്ടാൽ കട്ടൻചായ ആകുന്ന ചായപ്പൊടി കണ്ടെത്തിയതിനെ തുടർന്ന് എറണാകുളത്ത് ഹോട്ടൽ പൂട്ടിച്ച് ഭക്ഷ്യസുരക്ഷാ വകുപ്പ്. ചേന്ദമംഗലം കവലയിൽ നഗരസഭയുടെ ലൈസൻസ് ഇല്ലാതെ പ്രവർത്തിച്ച മജ്‌ലിസ് ഹോട്ടലിൽ നിന്നാണു മായം ചേർത്ത 2 കിലോഗ്രാം തേയില കണ്ടെത്തിയത്.

ഭക്ഷ്യസുരക്ഷ വിഭാഗം നടത്തിയ പരിശോധനയിലാണ് മയം ചേർക്കലിന്റെ തട്ടിപ്പ് കണ്ടെത്തിയത്. പ്രാഥമിക പരിശോധനയിൽ തന്നെ വ്യാജൻ ആണെന്ന് കണ്ടെത്തിയിരുന്നു. വെള്ളത്തിൽ ഇട്ടപ്പോൾ തന്നെ തേയിലയുടെ കളര്‍ ഇളകി കടുപ്പമമുള്ള കട്ടൻചായ പോലെയായി. വെടിമറ സ്വദേശി ഹസൻ വിതരണം ചെയ്ത തേയിലയാണെന്നു കടയുടമ മൊഴി നൽകിയതായി അധികൃതർ പറഞ്ഞു.

Also Read-കോട്ടയത്ത് ഭക്ഷ്യവിഷബാധയേറ്റ് യുവതി മരിച്ച സംഭവം: ഹോട്ടലിലെ മുഖ്യപാചകക്കാരൻ മലപ്പുറത്ത് അറസ്റ്റിൽ

വിദഗ്ധ പരിശോധനയ്ക്കായി തേയില ലാബിലേക്ക് അയച്ചു. സിന്തറ്റിക് കളർ ആകാനാണു സാധ്യതയെന്നാണ് നിഗമനം. ബിൽ നൽകാതെ ഹസൻ ഇതു വ്യാപകമായി വിൽപന നടത്തുന്നുണ്ടെന്ന് അധികൃതർക്കു ലഭിച്ച വിവരം. മായം ചേർത്ത ചായപ്പൊടി വിൽപന നടത്തിയതിന് ഇയാൾക്കെതിരെ അധികൃതർ കൊടുത്ത കേസ് കോടതിയിലുണ്ട്.